شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (30 تیرماه 1402/ 22 جولای 2023) ملک ءِ پهکێن مشکل ءُ گپچلانی رۆتگانَ سیاسی زانت، پمێشا گهترین ءُ تهنا تۆجیل ءَ را هم سیاسی تۆجیل زانت.
🔹«حجاب»، «اقتصاد»، «مزن‌سسائانی لڈگ» ءُ دگه بن‌گپان گۆں سیاست ءَ همگرنچ انت
په سنی‌آنلاین ءِ سرهال ءَ شیخ‌الاسلام مولانا عبدالحمید ءَ گوشت: گێشتری پێشامد ءُ گپچلاں که اے رۆچان ملک گۆں آوان آماچ انت، سیاسی انت. اگاں ملک ءِ رۆزیگی جاور ناجۆڑ انت ءُ ایران ءِ رنگ رنگێں پاٹیاں گۆں مشکلاں آماچ انت، اے سیاسی بن‌گپے. اقتصاد ءُ سیاست همگرنچ انت. البت من نه گوش آں که دگه سبب نێست پچےکه بیت کنت یک مشکلے چنکه رۆتگ داشته بیت، بلێن مئے ملک ءِ رۆزیگی مشکلانی مهم‌ترین سبب سیاسی انت.
واجه ءَ سک سۆگه کرت: په منی دیدانک ءَ تاں وهدےکه ملکے تهے ءُ ڈنے سیاستاں بدل مه بےانت اگاں تیوگێن اقتصادزانتاں هم مچ بےانت نه توان انت ملک ءِ مشکلانَ جۆڑ کن انت. ماں دنیا ءِ هر کنڈ ءَ وختے سیاست جۆڑ بےانت رۆزیگی مشکلاں هم جۆڑ بےانت.
زاهدان ءِ آدێنگ ءِ امام ءَ گێش کرت: یکے شه ملک ءِ مشکلاں که مئے سر ءَ گران انت مزن‌سسائانی لڈگ شه ملک ءَ انت. من دێمتر ءَ هم گوشتگ که هر چاگرد ءِ ٹوهترێں هنتکان آیی بودێن مردم ءُ مزن‌سسا انت که اگاں لڈ انت ءُ برو انت آ چاگرد ٹوهێن نقصانے گند ایت.
مولانا عبدالحمید گوشت: اگاں حجاب هم گۆں انصاف ءُ بےدۆزواهی ءَ چارگ بیت گڑا سرپد به اێں که گێشتری بانکاں بےحجابی ءَ پسند نه کن انت، پچےکه حجاب اسلامی پوشش ءُ رۆدراتکی مردمانی پچ انت ءُ پێسر ءَ هم بوتگ. بلکێن لهتے جنێناں حجاب ءَ مه منّ انت، بلێن گێشتری حجاب ءَ منّ انت. البت نون ناوشنود ءُ خشمی انت ءُ لۆٹ انت وتی خشم ءَ گۆں چادر ءِ زورگ ءَ جار جن انت. اگاں آوانی مشکل حل بیت گڑا حجابَ کن انت.
واجه ءَ تچکاتچک گوشت: رد انت اگاں ما گت کن اێں که حجاب ءِ بن‌گپ ملک ءِ تها اعتقادی ءُ مذهبی بن‌گپے، بلکه حجاب یک سیاسی بن‌گپے. اگه لۆٹ ات مردم حجاب کن انت راه اے نه انت که آوانَ بندیگ ءُ لٹءُکٹ کن ات، بلکه تۆجیل سیاسی انت که وتی سیاست ءَ جۆڑ کن انت.
🔹چلءُچار سالے بےپۆکێن سیاستاں بدل گنگ بےانت
زاهدان ءِ آدێنگ ءِ امام ءَ درشان کرت: ملک ءِ تیوگێن مشکلانی رۆتگ سیاسی انت ءُ سیاسی مشکلانی تۆجیل هم سیاسی انت. ماں سجهێن دنیا ءَ همے داب انت که سیاسی مشکلانَ گۆں سیاست ءَ جۆڑ کن انت. بائد سیاسی مشکلانَ گۆں سیاست ءُ ترانکاری ءُ سیاستانی بدل کنگ ءَ حل کن اێں.
🔹 پیغمبرانی بعثت ءِ مهمترێن مولءُمراد آمید ءِ اێر دارگ بوتگ
مولانا عبدالحمید ماں دگه بهرے شه وتی هبراں گوشت: آمید ءُ انصاف په الله پاک ءَ باز هژدری انت. یکے شه پیغمبرانی هژدری ئێن بعثت ءِ سبباں آمید ءِ اێردارگ بوتگ. قرآن پاک ءَ هم آیی باروا درائێنتگ: «و أنزلنا معهم الکتاب و المیزان لیقوم الناس بالقسط».
واجه ءَ گێش کرت: اگه په جوانی دلگۆش کن اێں گڑا سرپد به اێں که تیوگێن دین شه توحید ءَ بگر تاں وش تبی ءُ نێکێن کرداراں پهکاں په آمید ءُ انصاف ءَ انت. «عدل» بزاں دوری شه ظلم ءَ انت. انسان ءِ سرجمێن زند بائد آمید ءُ انصاف ءِ روگه ءَ بیت که پیغمبرانی زند ءِ رد ءَ انت.
دارالعلوم زاهدان ءِ سرمستر ءَ گوشت: واجه رسول الله صلّی‌الله‌علیه‌وسلم وهدےکه حاکم ات انچش زند گوازێنت که اگه کسے مسیت ءَ یا صحابه ئانی دیوان ءَ پترتێں نه زانت ئِے که کجام رسول الله انت. واجه رسول الله ءُ صحابه ئانی پچاں ءُ گسانی میان ءَ هچ دگری ءِ نه ات. رسول الله صلّی‌الله‌علیه‌وسلم ءَ پهکانی گپان گۆش داشت ءُ گۆں وتی صحابه ئاں شۆرے کرت. مردماں ءُ بےوسان هم په آسانی توانت گۆں واجه ءَ نیاد کن انت.
🔹حکومت اسلامی وهدے جوان انت که «مردمی» بیت ءُ «آمید» ءَ اێر دار ایت
مولانا عبدالحمید گێش کرت: واجه رسول الله صلی‌الله‌علیه‌وسلم ءَ په وت هچ امتیازے نه زانتگ. واجه په بیت المال ءِ ساتگ سک آزگ‌سما ات. پد شه واجه صلّی‌الله‌علیه‌وسلم ءِ وفات ءَ آیی خلیفه ئانی داب همےرنگ بوتگ. آوان وتی حکومت ءِ زمانگ ءَ اێدگه مردمانی رنگ ءَ زند گوازێنتگ. یک رۆچے مهتر عمر رضی‌الله‌عنه منبرے سر ءَ شت، یکے آیی پچانی پینگانَ حساب کرت، سیزده پینگ ات انت. آوان شه بیت المال ءَ کارمرز نه کرت ءُ وتی سیادانَ هم مکن اش کرت. بس اے کساس که نانے بۆر انت شه بیت المال ءَ کارمرز اش کرتگ.
🔹قرآن مجید ءِ بےشرپی انسانی حقانی پادمالی انت
🔹پهکێن آسمانی دینانی کتابانی پےشرپی ءَ سک اێر جن اێں
مولانا عبدالحمید وتی هبرانی گڈی سر ءَ گوشت: بژن انت که باز رڈێن دابے بنگێج بوتگ. ما نه زانێن که الله ءِ اراده په ڈگار ءِ نندۆکاں چے انت، بلێن هرزمانے که بلا ءُ مصیبتے اێر بئێت گڑا مقدسێن چیزان بےشرپی بیت.
واجه ءَ گوشت: پاکێن کلام ءِ سۆچگ باز درآور ءُ سکێن مصیبتے که دۆمی گشت انت ماں سوئدن ءَ بیت. چشێن مردماں انسانی حقانَ پادمال کن انت. هچ حقے برزتر شه مقدساتانی حرمت ءَ نه انت. وهدے یک استمان ءِ مقدساتانی حرمت پرۆشگ بیت دگه آیی چه حقے کمار بوتگ؟!
زاهدان ءِ آدێنگ ءِ امام ءَ گێش کرت: پێسر ءَ سوئدن ءِ ملک جوانێن ملکے ات، آزاتی هست ات. بازێن مسلمانے لڈ ات انت ءُ همۆدا شت انت، اۆدا مسیت دار انت ءُ زند گوازێن انت. بلێن بےشرپی ءِ که اۆد ءَ پاکێن کلامے سر ءَ بوت ءُ سوئدن ءِ سرکار ءَ مۆکل دات، ٹوهێن نازانتی ءُ بےسدی ئے که ماں دنیا ءَ ترندی ءِ سبب بیت. آسمانی کتابانی سۆچگ بدترین داب انت.
واجه ءَ ٹکاٹک گوشت: ما پاکێن قرآن ءُ تورات ءُ انجیل ءُ مقدساتانی بےشرپی کنگ ءَ سک اێر جن اێں ءُ شه سوئدن ءِ سرکار ءَ لۆٹ اێں که اے بدێن داب ءَ بدل کنت. اے دێمپانی شه آزاتی ءَ نه انت، بلکه آزاتی ءِ سۆچگ انت. وهدےکه شما حرمتان پرۆش ات ءُ آسمانی کتابانی بےشرپی ءِ مۆکل ءَ دےات، چوناهی ءَ لۆٹ ات دنیا ءِ تاهیر ءُ امنیت ءَ خراب کن ات ءُ پکا چشێن رهبندے پرۆش وارت.
مولانا عبدالحمید گوشت: ما شه اسلامی ملکانی سرۆکان لۆٹ اێں که اے باروا بےپروا مه بےانت ءُ اے بن‌گپ ءَ رندگیری کن انت تاں هچبر ماں دنیا ءَ قرآن ءُ واجه رسول الله صلّی‌الله‌علیه‌وسلم ءُ مقدساتانی بےشرپی مه بیت.
چمشانک