مروچی : ۶ اردیبهشت , ۱۴۰۱
مولانا عبدالحمید ماں زاهدان ءِ جمعه نماز ءِ دیوان ءَ:

رمضان ءِ ماه یک درورے شه الله ءِ «معنوی ئێں رهبنداں» په مردمانی اصلاح ءَ

رمضان ءِ ماه یک درورے شه الله ءِ «معنوی ئێں رهبنداں» په مردمانی اصلاح ءَ

سنی‌آنلاین| شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (2 اردیبهشت 1401/ 22 آپریل 2022) گۆں اشاره به الله ءِ رهبنداں په مردمانی زندگی ءِ «مادی» ءُ «معنوی» بهر ءَ، رمضان ءِ مبارکێں ماه ءَ را یک درورے شه الله ءِ «معنوی ئێں رهبنداں»  په مردمانی اصلاح ءُ تزکیه ءَ زانت ءُ تیوگانَ په استفاده شه اے ماه ءَ ءُ هاس گڈی ده رۆچ ءِ طلایی ئێں وار ءَ سکّ سۆگه ئِے کرت.

په سنی‌آنلاین ءِ سرهال ءَ شیخ‌الاسلام مولانا عبدالحمید پد شه مبارکێں سوره «قدر» ءِ تلاوت ءَ، درشان ئِے کرت: الله پاک ءَ په مردمانی زندگی ءَ دو رهبند جۆڑ کرتگ؛ یکے «مادی رهبند» ءُ دۆمی «معنوی رهبند».

واجه ءَ گوشت: الله ءِ رهبنداں په مردمانی زندگی ءِ مادی بهر ءَ هم چۆ آوانی زندگی ءِ معنوی بهر ءِ رهبنداں ٹک ءُ المی انت که مردمانی زندگی ءِ پهکێں احتیاجی ءُ زلورتانَ ماں اے رهبنداں لحاظ بوتگ انت. رۆچ ءِ رۆشنایی ءُ ماه ءُ استاراں ءُ سجهێں امکاناتاں که الله ءَ ماں اے گلزمین ءَ جۆڑ کرتگ په مردمانی نفع ءُ آوانی احتیاجیانی دور کنگ ءَ جۆڑ بوتگ انت.

واجه ءَ گێش کرت: الله پاک ءَ یک دگه رهبندے هم په مردمانی زندگی ءَ جۆڑ کرتگ که آن «معنوی ئێں رهبندے». الله پاک ءَ معنوی رهبندانَ په مردمانی تزکیه ءُ اصلاح ءَ جۆڑ کرتگ. پیغمبران ءُ آسمانی کتابانی دێم دیگ شه اول ءَ تاں واجه رسول الله صلّی‌الله‌علیه‌وسلم آیگ ءَ ءُ قرآن ءِ اێر آیگ سرجم په همے هاتر ءَ بوتگ انت که «دین» ءِ درۆشم ءَ مردمانی دست ءَ هلگ بوتگ.

زاهدان ءِ جمعه ءِ خطیب ءَ گێش کرت: مردمانی زندگی ءِ مادی ءُ معنوی احتیاجیانی دلگۆش کنگ شه الله ءِ نێمگ ءَ الله ءِ بےجۆڑه ئێں مدیریت ءَ نشانَ دنت. ماں دنیا ءَ هچ حکومت ءُ استمانے نه انت که آوانی مادی ءُ رسم‌ءُرواجی رهنبد چۆ الله ءِ رهبنداں بےانت.

واجه ءَ رمضان ءِ ماه ءَ را یک درورے شه الله ءِ «معنوی رهبنداں» زانت ءُ گوشت ئِے: رمضان ءِ ماه یکے شه الله ءِ ٹکێں رهبندان انت. الله پاک ءَ اے ماه ءَ را آۆرتگ تاں مردمانَ یک معنوی ئێں جاورے ءِ تها به هل ایت، هماوڑ که آدگه یازده ماه ءِ تها ما چشێں جاورے ماں چاگرد ءَ نه گند اێں. اسلامی چاگرد ءَ جاورے لۆٹ ایت که معنویت اۆد ءَ زۆراک بیت تاں مردماں توان انت وتی معنوی کمیانَ پێلو کن انت.

دارالعلوم زاهدان ءِ سرمستر ءَ گوشت: الله پاک ءَ رمضان ءِ ماه ءُ شپ قدر ءَ را آۆرت تاں آوان که ماں یازده ماه ءَ تهنا وتی مادی مسائلانی فکر ءَ بوتگ انت، ماں اے ماه ءَ وتی معنویت ءُ آخرتے فکر ءَ بےانت ءُ به الله ءَ نزیک بےانت.

🔹شه رمضان ءِ گڈی ده رۆچے طلایی وار ءَ په الله ءِ قُرب ءِ رستن ءَ استفاده کن ات

مولانا عبدالحمید وتی هبرانی دێمتر ءَ گۆں اشاره به قرآن ءِ اێر آیگ ءَ ماں رمضان ءِ ماه ءَ ءُ ماں شپ قدر ءَ، اے مبارکێں شپے بارو ءَ گپ ئِے کرت ءُ گوشت ئِے: شپ قدر انچێں جاگه ءُ منزلتے دار ایت که الله پاک ءَ آیرا په قرآن ءِ اێر آۆرتن ءَ گچێں کرت. الله پاک ءَ شپ قدر ءَ را معلوم نه کرتگ که کجام  شپ انت. لهتێن ءَ گوشتگ که شپ قدر یک هاسێں شپے ماں رمضان ءِ ماه ءَ، بلێں لهتے دگه شه شوهازکاراں گوشتگ که «لیلةالقدر» ماں یک شپے نه انت، بلکه ماں رمضان ءِ گڈی ده رۆچے طاقێں شپان انت ءُ بیت کنت که هر سالے ماں یکے شه همے شپاں بیت ءُ روایات هم گێشتر همے دیدانک ءَ تایید کن انت.

واجه ءَ گێش کرت: رمضان ءِ گڈی ده رۆچ هاسێں نورانی رۆچ انت. ماں روایتاں آتگ که واجه رسول الله صلّی‌الله‌علیه‌وسلم ءَ ماں رمضان ءِ گڈی ده رۆچ ءَ شه لۆگماں ءُ زهگ ءُ آدگه دنیایی کاراں جتا بوت ءُ ماں مسیت ءَ اعتکافَ نشت ءُ ذکر ءُ دعا ءُ عبادتے کرت. ماں حدیث ءَ آتگ که رسول الله صلّی‌الله‌علیه‌وسلم هرسال ءَ رمضان ءِ گڈی ده رۆچ ءَ اعتکافَ نشت، یک رمضانے په شرعی عذرے سبب ءَ نه توانتِ که اعتکاف نند ایت، پمێشا نۆکێں سال ءَ بیست رۆچ اعتکاف نشت. اعتکاف یکے شه ٹوهێں عبادتان ءُ شه بااپالێں مردمانی کاران انت.

زاهدان ءِ جمعه ءِ خطیب ءَ سکّ سۆکه کرت: تیوگێں رمضان وارے، بلێں رمضان ءِ گڈی ده رۆچ طلایی ئێں وارے. منی سۆگه په گردان همێش انت که شه اے طلایی ئێں وار ءَ گێشتری استفاده ءَ کن ات تاں به الله ءَ رس ات. ماں اے رۆچاں باز قرآن تلاوت کن ات، الله ءَ ذکر کن ات ءُ به نادار ءُ بےوسان ءُ بندیگانی لۆگمان ءُ دینی وانگجاه ءُ مسیتانی اماماں کمک کن ات.

واجه ءَ په پاک‌ونڈے دیگ ءَ ماں رمضان ءِ ماه ءَ هم سۆگه کرت ءُ گوشت ئِے: وتی مالانی پاک‌ونڈ ءَ به الله ءِ راه ءَ دےات. شمے گواچنی ئێں مال هما انت که ماں الله ءِ راه ءَ ءُ په وتی آخرت ءَ هرچے کن ات. عجیب انت که مردماں دنیا ءِ زر ءُ مالانَ شه وتی جان ءَ هم گێشتر دۆست دار انت ءُ نه لۆٹ انت یک کۆتے را ماں الله ءِ راه ءَ هرچ کن انت ءُ وت را شه جهندمے عذاب ءَ رکّێن انت.

🔹ما وتی چاگردے دیانت ءُ معنویتے بارو ءَ گڑتی دار اێں

مولانا عبدالحمید وتی هبرانی دێمتر ءَ وتی بازێں گڑتی ءَ په چاگردے سستێں رهوت ءَ گۆں دین ءُ الله ءَ درشان کرت ءُ گوشت ئِے: مئے چاگرد مشکل دار ایت ءُ ما په وتی چاگردے دیانت ءُ معنویت ءَ سکّ گڑتی دار اێں. ارمان که چاگردَے مردماں شه دین ءُ مسیتاں دور بوتگ انت. کسے که وتی زرانی پاک‌ونڈ ءَ نه دنت، نمازَ نه وانت یا سستیَ کنت ءُ ماں رمضان ءِ ماه ءَ رۆچگَ نه بیت ءُ نه لۆٹ ایت په مسیت ءَ بَێت، چوناهی ءَ شه دین ءَ جی ایت. جیَگ شه دین ءَ بزاں جیگ شه الله ءَ انت. کسے که گۆں کسے محبت کنت دۆست دار ایت مدام آیی گس ءَ بێت، مسیتاں الله ءِ گس انت ءُ اگاں گۆں الله ءَ محبت دار اێں باید گۆں مسیتاں رهوت داشته به اێں.

واجه ءَ دێمتر ءَ لس مهلوک ءُ هاس ورنائانَ په رهوت گۆں مسیتاں سۆگه کرت ءُ گوشت ئِے: منی سۆگه به تیوگێں مسلماناں اێش انت که به دین ءُ مسیتاں بر گرد ات ءُ گۆں رکوع‌کنۆک ءُ سجده‏کنۆکانی سرَپاں هور به ات، پچےکه اے سرپاں گهتریں سرپ ءُ الله ئی ئێں سرپ انت؛ الله پاک ءَ فرمان داتگ که: «وَارْكَعُوا مَعَ الرَّاكِعِينَ». رسول اکرم صلی‌الله‌علیه‌وسلم ءَ هم سکّ سۆگه کرتگ که شما وتی نمازانَ ماں مسیتاں گۆں جماعت ءَ بوان ات.

مولانا عبدالحمید سکّ سۆگه کرت: آوان که انگت رۆچگ اش نه گپتگ، اے رمضان ءِ گڈی ده رۆچ ءَ رۆچگ گر انت، به مسیتاں بیا انت ءُ وتی رهوت ءَ گۆں الله ءَ جۆڑ کن انت. اَے ورنا که گۆں نشه ئی مواداں آماچے، اے ورنا که به رمضان ءِ ماه ءَ بےحرمتیَ کنے ءُ رۆچاں به چایخانه ئانَ روے ءُ رۆچگَ نه گرے، اے رونا که ماں نمازاں سستیَ کنے ءُ اے مسلمانێں گُهار ءُ براساں! اے رمضان ءِ ماه ءَ که الله ءِ رحمتانی در پاچ انت، الله ءِ نێمگ ءَ بیا ات ءُ شیطان ءُ نفس ءِ لۆٹانَ پادے چێر ءَ کن انت ءُ توبه کن ات.

واجه ءَ گوشت: زبهرترێں مردم هما انت که ماں رمضان ءِ ماه ءَ شه الله ءِ رحمتاں زبهر بیت ءُ زبهرتر ءُ بدبخت تر شه اِے مردم ءَ هما انت که ماں شپ قدر ءَ شه الله ءِ رحمتاں بےبهر بیت.


چمشانک

دیدگاهتان را بنویسید

نشانی ایمیل شما منتشر نخواهد شد.