مروچی : 19 اردیبهشت , 1400
مولانا عبدالحمید ماں زاهدان جمعه نمازے دیوانا:

شه رمضان ءِ آخری ده رۆچے معنوی اێں پرزۆنگ ءَ که تنَکّ بوتگ سۆب بَراێں

شه رمضان ءِ آخری ده رۆچے معنوی اێں پرزۆنگ ءَ که تنَکّ بوتگ سۆب بَراێں

 شیخ‌الاسلام مولانا عبدالحمید ماں زاهدان جمعه نمازے دیوانا (17 اردیبهشت 1400/ 7 مے 2021) رمضان ۆ آیی آخری ده رۆچا را «ٹوهێں معنوی اێں پرزۆنگ ءِ په بندگانِ روحی تغذیه ءَ» زانت ۆ په «اے منتگێں رۆچان ارزشت ءِ زانگ ءَ» سکّ سۆگه ء کرت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید پد شه اے آیتے وانگا «يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ» [بقره: 183] درشان کرت: الله پاک ءَ په بندگانِ روحی ۆ معنوی اێں تغذیه ءَ ماں رمضان ءِ مبارکێں ماها ۆ هاس اے ماهے آخری ده رۆچا ٹوهێں معنوی اێں پرزۆنگ ءِ تنکّ کرتگ ۆ شه بندگانِ لۆٹتگ که شه اے الله ئے فضل ۆ داد ءَ سۆب بر اَنت. ما گوں هچ زبان ۆ گالے نه توانێں اے بےجۆڑه اێں دادے شکر ءَ ادا کن اێں.

واجه ءَ گوشت: الله تعالی بندگان سرا باز فضل ۆ لطف کرتگ ۆ بےکساس بندگانِ خیرا را لۆٹتگِ؛ په بندگان هدایت ۆ رکّێنگ ءَ پیغمبر ۆ داعی ۆ آسمانی اێں کتاب ۆ گهترێں رهبندانَ دێمِ داتگ، بلێں اپسۆز انت که ما بندگان قدرنزانت اێں که الله ۆ رسول الله ۆ قرآن ۆ رمضان ۆ شپ قدرے قدر ءَ نزانێں.

زاهدان جمعه ئے اماما درشان کرت: الله بےکساس مهربان اِنت. اگه بندگ یک گام ءِ الله ئے نێمگ ءَ برئوت ۆ په جنّت ءِ رسگ ءَ اراده کنت ۆ په رکّگ شه جهندما جهد کنت، الله ئے رحمتانِ در په آیی پاچ ءَ بَےانت ۆ یک شپے تها هشتاد و سه سال عبادتے ثواب آیرا دیگَ بیت، اے ابید شه الله ئے فضل ۆ کرم ءَ دگه چی ئے توانت بیت؟

واجه ءَ گێش کرت: اگه په جنتے رسگ ءَ خدا لۆٹی ۆ اراده بیت، الله اے جهد ءَ باز پسند ءَ کنت. الله تعالی ءَ پرمائێنتگ: «وَمَنْ أَرَادَ الْآخِرَةَ وَسَعَىٰ لَهَا سَعْيَهَا وَهُوَ مُؤْمِنٌ فَأُولَٰئِكَ كَانَ سَعْيُهُمْ مَشْكُورًا» [اسراء: 19] مهربان اێں الله شه وتی بندگان ءَ لۆٹیت که آیی نێمگ ءَ برئو اَنت.

دارالعلوم زاهدان سرمستر ءَ گێش کرت: الله تعالی ءَ لۆٹیت که شه اے رمضان ءِ معنوی اێں پرزۆنگ ءَ که وڑ وڑێں معنوی اێں ورگیان آیی سرا اێر اَنت ۆ هر ورگی ئے هاسێں تاثیرے داریت، کارمرز بیت. تلاوت، ذکر، درود، استغفار، توبه، نماز، تضرع و زاری، دعا، صدقه و خیرات، گرد اے پرزۆنگے ورگی اَنت ۆ الله ئے وشنودی همێشی تها اِنت که بندگان شه اے پرزۆنگ ءَ هرچی گێشتر سۆب بر اَنت. اگه بندگان سستی ۆ کلپی کن اَنت الله ناوشنودَ بیت، الله ئے وشنودی اێشی تها اِنت که بندگان شکر کن اَنت ۆ په الله ئے عبادت ءَ جهد کن اَنت ۆ الله ئے ناوشنودی اێشی تها اِنت که بندگان ناشکری کن اَنت ۆ نماز ۆ رۆچگ ۆ زکاتے توفیق ءَ مه داشته بَےاَنت.

واجه ءَ گوشت: راستی اێش اِنت که ما چیزے نداشتگ ۆ دست هۆرک ءَ اے دنیائے تها آتگ اێں، الله تعالی ءَ ما را زرّ ۆ مال دات. نون که زکاتے وارَ رسیت په امّا سکّ اِنت که اے الله‌داتگێں مالانِ زکات ءَ دَےاێں، شه چل میلیارد زرّ ۆ مال ءَ یک میلیارد زکات دَےاێں. اے انسان چنکه بےانصاف ۆ نمک نشناس اِنت که الله‌داتگێں مالانِ زکات ءَ نه دَنت.

مولانا عبدالحمید درشان کرت: نباید مئے زرّ ۆ مال ۆ آسودگی شه الله ءَ په امّا دۆست تر بَےاَنت. الله ءَ گوں هچ چیزی بدل مه کن اِت ۆ ناراضِ مه کن اِت، هرکس شه دست برئوت بلێں الله شه دست مه رئوت. به قرآن ءَ عمل کن اِت که الله ئے کتاب اِنت ۆ قرآن ۆ اسلامے فرمان ۆ مکنانَ کمار کن اِت.

واجه ءَ سکّ سۆگه کرت: رمضان هلاس بیان اِنت ۆ اے اصلاح ۆ تزکیه ئے کلاسے آخری رۆچان رستگ اێں. وتی تیوگێں عبادی اێں سستیانَ اے ماهے تها پوره کن اِت، شمے زوان مدام ذکر کنت ۆ شمے دلان تها خیر بیت ۆ شمے دستان شه خیر ۆ رسیدگی به مردمان هورک مه بَےاَنت. بےوس ۆ نادارانَ کمک کن اِت ۆ زکات ۆ سرسیاهگ ۆ مردمان وامان دَےاِت. شه مردمان بکشش لۆٹ اِت ۆ وتی آخرتے بارا سُبَکّ کن اِت.

🔹گونڈێں ائید ءَ کم‌ته‌کم صدهزار تومن به دارالعلوم زاهدان ءَ کمک کن اِت

دارالعلوم زاهدان سرمستر ءَ ماں دگه بهرے شه وتی هبران گوں اشاره به دارالعلوم زاهدانِ مالی اێں سکّیان شه لس مهلوکان لۆٹ ات که اے اهل‌سنتے مزنێں علمی اێں بنجاها کمک کن اِت ۆ گوشتِ: الحمد الله که دارالعلوم زاهدان ملک ءِ تها یک مزنێں بنجاهے که الحمدلله نون به یک مزن شهدربرجاه ۆ جهانی اێں وانگجاهے بدل بوتگ که به چاگرد ءَ خیرَ رسێنیت.

واجه ءَ گێش کرت: دارالعلوم زاهدان حضرت مولانا عبدالعزیز ۆ شما درّێں مردمان عمل باقی انت، به اے وانگجاه ۆ تیوگێں وانگجاهان کمک کن ات، بلێں دارالعلوم زاهدان ءَ گێشتر کمک و دلگوش کن اِت.

مولانا عبدالحمید سکّ سۆگه کرت: گونڈێں ائیدے رۆچا هر نپرے صدهزار تومن په کمک به دارالعلوم زاهدان ءَ گوں وت بیاریت؛ اے کساس پوریاگر ۆ بےوسان بهر اِنت، وسیان گێشتر کمک کن اَنت. بانۆکێں گهاران هم ماں اے خیر ءَ هور بَےانت وتی طلائانِ زکاتانَ دارالعلوم زاهدان ءَ دَےاَنت.

🔸شیخ‌الاسلام مولانا عبدالحمید گڈی سرا وتی بژن ءَ په مولانا عبدالواحد احراری رحمه‌الله وفات ءَ درشان کرت ۆ آیرا «دیندار ۆ ذاکرێں مردم» ۆ «شه مولانا عبدالعزیز رحمه‌الله سنگتان» زانت ؤ په آ خدابیامرزا شه الله بارگاها بکشش ؤ برزین درجه لۆٹوک بوت. مولانا عبدالحمید همےپێم په شریف خان سالارزهی شه اۆگانستانے ولایت نیمروزے کماش ۆ اسپیت ریشان ۆ نعمت الله شه بخش، یکے شه مسیت مکی ئے قدیمی اێں انتظاماتان که چنکه رۆچ دێما وفات اش کرتگ، دعای خیرِ کرت ۆ شه الله ءَ په آوان برزێں درجه ء لۆٹ اِت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *