شیخالاسلام مولانا عبدالحمید مان زاهدان جمعه نمازے دیوانا (14 شهریور 1399/ 4 سپتامبر 2020) «اللهئے معنویئین نعمتان ناقدری» ؤ «دوری شه شریعتے حکمانَ» اُلُسانِ بےسؤبیئے سوَب زانت ؤ په «گامگیج شه پیغمبرے سیرتا» ؤ «پرمان به نیکی ؤ مکن شه بدیا» سؤگه ؤ تأکید کرت.
په زاهدانِ اهلسنتے جمعهوے پیشنمازے کارگسے هالرسانیئے بنجاهے سرهالا، شیخالاسلام مولانا عبدالحمید درشان کرت: یکے شه ٹوهین مشکلان که مان جهان اسلام ؤ مئے نیاما هست اےشنت که بازینے شه انسانان اللهئے نعمتانِ قدرا نزاننت، الله تعالی پرمایش کرته: «وَمَا قَدَرُوا اللَّهَ حَقَّ قَدْرِهِ إِذْ قَالُوا مَا أَنْزَلَ اللَّهُ عَلَى بَشَرٍ مِنْ شَيْءٍ»(انعام: 91)«و قدر ؤ احتراماش نهکرت اللهئا هما پیما که حق احترامنت وختے که گوشتش اللهئا ایر نیاؤرته هچ بندگےءِ سرا هچ چیزے».
واجها دیمترا گیش کرت: پچے ما الله تعالی ؤ آ نعمتانے که ما را داتهءِ نگندن؟ پچے قرآن ؤ دین ؤ آ نعمتانِ قدرا که مان زندگیا ٹگلَ کارنت، نزانن؟ پچے اللهءِ کلامے ارزشتا که گو انسانا راست ؤ سیده هبرَ دنت، نزانن؟ پچے رسولالله صلّیاللهعلیهوسلّم قدرا نزانن؟ گجام واجهکار ؤ رهشؤن ؤ پیشونک شه مهتر رسولالله صلّیاللهعلیهوسلّم ٹوهترنت؟ رسولالله پاک زند گوازینت ؤ پاک شُت. پچے مسلمانان پیغمبر ؤ قرآن ؤ دینے قدرا که اللهئے برزترین نعمتانت، نزاننت؟ پچے انسانان ؤ هاس مسلمانان شه اےشان گامگیجَ نکننت ؤ به گناهانِ نیمگا رونت که بیرانکنوک ؤ بےسؤب کنوکنت؟
زاهدان جمعهوی پیشنمازا وتی هبرانَ را دیما برت: یهود ؤ نصاراوان وهدے که تورات ؤ انجیلے قدرا ؤ مهتر موسی ؤ عیسی علیهماالسّلامے قدرا را نزانت گو بیرانی ؤ اَبُنا دیمپهدیم بوتنت. الله تعالی پرمایش کرته: «وَلَمَّا جَاءَهُمْ كِتَابٌ مِنْ عِنْدِ اللَّهِ مُصَدِّقٌ لِمَا مَعَهُمْ وَكَانُوا مِنْ قَبْلُ يَسْتَفْتِحُونَ عَلَى الَّذِينَ كَفَرُوا فَلَمَّا جَاءَهُمْ مَا عَرَفُوا كَفَرُوا بِهِ فَلَعْنَةُ اللَّهِ عَلَى الْكَافِرِينَ» [بقره: 89]، اللهئا مان بقرهءِ سورهئا پرمایش کرته: «وَلَمَّا جَاءَهُمْ رَسُولٌ مِنْ عِنْدِ اللَّهِ مُصَدِّقٌ لِمَا مَعَهُمْ نَبَذَ فَرِيقٌ مِنَ الَّذِينَ أُوتُوا الْكِتَابَ كِتَابَ اللَّهِ وَرَاءَ ظُهُورِهِمْ كَأَنَّهُمْ لَا يَعْلَمُونَ» [بقره: 102]. قرآنے ایر آرگ گو ایشی که آیی بابتا مان تورات ؤ انجیلا پیشگْوشی بوتت، هِنکه په اهل کتابان سکّ بوت که آوانِ خشمی کرت ؤ نه تهنا قرآنا را نه گِپتش که عمل به تورات ؤ انجیلا را هم ویلش کرت ؤ وتی نپسے لوٹ ؤ جادو ؤ گناهے پدا شُتنت.
واجها دیمترا گوشت: آوان که گناه ؤ قتل و هُول ؤ وڑ وڑین جنایت ؤ ظلم ؤ فسادے پدا روَنت، حقیقتا اللهئے کتابا را گْوَر ؤ گؤشِاش نکرته. اللهئے کتابے نهگپتن ؤ اجل ٹکّان نیمگا شتن هما آسمانیئین کتابانِ گْوَر ؤ گؤش نکنَگِنت که اپسوزنت مروچی اسلامی چاگردا را همِ گپته.
دارالعلوم زاهدان سرمسترا گوشت: ما شَن که صحابه ؤ اهلبیتانَ دؤست دارن، ابوبکر، عمر، عثمان، علی، حسین ؤ اهلبیتانِ ناما گرن، بلین شه آوان تقوا ؤ پلگار ؤ نماز ؤ عبادتان سهی نهوَن ؤ شه آوانِ سیرتا مئے زندگیئے تها هچی نیست. مروچی قرآنے تعلیم ؤ رسولالله صلیاللهعلیهوسلمے سیرت مسلمانان زندگیئے تها باز کمرنگ بوته. مسلمانانِ بےسؤبی ؤ پرؤشے سوَب ؤ آپت ؤ سکّیانِ ایر آیگ هم همےشنت که مسلمانان شه اسلاما دور بوتگنت ؤ اسلامے ناما را بسِّاش زانته.
واجها درشان کرت: ما بائد وتی ؤ اے امتے جاها دُرست کنن، اللهئے پرمانانَ ساتن، به امر به معروف و نهی شه منکر ؤ دعوت الی الله فریضهئا عمل کنن، قرآن بوانن، بائد گو چنگ ؤ دنتانان به شریعت ؤ رسولالله سنتان لچن، پیغمبر ؤ صحابهئانِ سیرتانَ سکّ ساتن ؤ آوانِ ذکر ؤ نماز ؤ پکر ؤ عبادتانَ وتی زندگیئے تها بیارن.
مولانا عبدالحمید دیمترا گوشت: آ واجهئا صلیاللهعلیهوسلم دراجین شپانَ نشته ؤ نمازِ وانته ؤ په امتے نجاتا پکر کرته. آ واجه صلیاللهعلیهوسلم مان حراءِ کالا ؤ ثور کالے تها لولکانِ نیاما وپته مان وهدےکه اے خطر هم بوته که مار ؤ زومِ جننت، وتی زندگیئے دراجیا بازین زحمت ؤ رنجے را په امتے نجاتا پُجِّ کرت. پچے امت آ واجه صلیاللهعلیهوسلم قدرا نزانت؟ پچے مسلمانان آ واجهئا را بےهیال کرته؟ پچے قرآنا را بےهوشن کرته؟ دنیا بےارزشت ؤ ناامپادنت، هر رؤچ پاٹیئے په آخرتا رونت، پچے کبرستان ؤ آخرتا نگندن؟
واجها په دعوت الی اللهئے سکّ گرگا تأکید کرت و گوشته: بائد ما گرد به اللهئے نیمگا دعوت کنن، به نیکین کاران پرمان دَیَن ؤ شه بدین کاران مکن کنن. الله تعالی گو شمے همت ؤ جد ؤ جهدان منکر ؤ خرابی ؤ حقکشی و جرم و جنایتانَ که مان چاگردے تهاونت، دورَ کنت.
گسواهندان مستاجرانِ حالا دلگوش کننت
زاهدان اهلسنتے جمعهوے پیشنمازا مان دگه بهرے شه وتی هبران به مردمان سکّیان مان گسے کرےئان اشاره کرت ؤ گوشته: اپسوز که گسان کرےئان باز بُرز شتگنت. آوان که کرےئانَ برز برته ایشرا شنت که زرے ارزشت جهل آته.
واجها گوشت: اے هبر راستنت که زر بےارزشت بوته، بلین ایشرا هم دلگوش کنن که کٹؤکار ؤ دندائان هم نقصان دیسته، پمیشا گسواهندان هم بائد کرےنشینیئے سکّی ؤ کرےنشینانِ مشکل ؤ آوانِ وسانَ دلگوش کننت.
مولانا عبدالحمید وتی هبرانِ گڈسرا گو اشاره به «کروناوے بےتواریا مان چاگردا» گوشته که «بائد گو کرونائا سازن» ؤ په مسیت ؤ وانگگس ؤ کارجاه ؤبازارانِ جهدان گو «بهداشتی مسائلانِ رعایت کنگ ؤ په سار بیگا» تأکید کرت.
چمشانک