مولوی ابراهیم براهویی، گالیکشءِ دارالعلوم فاروقیه استاد زی (یکشنبه 25 مهر) سباها سبزوارءِ جاده‌یا چه ماشینءِ چپ بیگءِ سببا وفات بوت.
په سنی‌آنلاینءِ هالکاریا نقل چه ملکی رسانکدراں، مولوی ابراهیم براهویی (آزردار) ایرانءِ گلستانءِ گالیکشّءِ استاد یکشنبه همدپ گوں 16 اکتبر2016 ئا گوں وتی ماشینا چه زاهدان دیم په گلستانا رهادگ بوتگ، سبزوارءِ شهر(چه خراسانءِ استان) ءِ نزّیکیا ماشینی چپ بوتگ و کوڑهیں دنیایی یل داتگ.
مولوی ابراهیم براهویی سال 1358 شمسیا گلستانءِ “رضاآبادا” ودی بوتگ. رند چه مدیری وانگاں، دارالعلوم فاروقیه گالیکشّا شتگ و تی دینی وانگی بنگیج کرتگنت. دنک شش سالا همودا درسی وانتگ، رندا بلوچستانا یهتگ و«تعلیم‌القرآن» شورشادیا واجه مولانا دین محمد درّکانی گورا وتی وانگی دیما برتگ.
خدامُرزی مولوی ابراهیم رند چه اِشیا پاکستانا شتگ و مَں «بدرالعلوم حمادیه» رحیم‌یارخان پنجاپا درسی ونتگ رندا پدا ایرانا پترّتگ و دارالعلوم زاهدانا وتی وانگی در برتگ و چه اِے مدرسه‌ءِ مزنیں واجهاں چوشکه شیخ‌الاسلام مولانا عبدالحمید، مولانا مفتی محمدقاسم قاسمی، مولانا عبدالرحمن محبی، مولانا احمد نارویی رحمه‌الله، مولانا نعمت‌الله رحمه‌الله، و دگه واجهاں بهر زرتگ.
مولوی ابراهیم براهویی (رحمه‌الله) بید چه تدریس و وانینگ، گپ و وعظا، مزنیں نبیسنده/نَدکارے هں بوتگ و سَے کتاب«فضایل استغفار»، «فواید تقوا» و «گنجینه مبلغین» چه واجهءِ پشکپتگیں پدان اَنت.
مولوی ابراهیم براهوییءِ جنازه نماز باندا سَے شنبه گلستانا مَں رضاآبادءِ مسیتّا وانگ بیت.
ایرانءِ اهل‌سنتءِ هال‌رسانی سایت «سنی‌آنلاین» اِے ورنائیں عالِم و زانتکارءِ وفاتا، خدامُرزیءِ لوگءِ مردماں، شیخ‌التفسیر مولانا گرگیج، و گالیکشّءِ دارالعلوم فاروقیهءِ طالب و استاداں تسلیت گوشیت و چه پاکیں الله‌ئا په مرحوما درجه‌یانی برزی و په پشپداں صبر و اوپارا لوٹوک اِنت.
مروچی :جمعه, ۳۱ شهریور , ۱۴۰۲
چمشانک