عن ابی موسی بن قیس الاشعری رضی اللہ عنہ قال سُئل رسول اللہ صلی اللہ علیہ وسلم عن الرجل یقاتل شجاعۃ، و یقاتل حمیّۃ، و یقاتل ریاءَ، ایّ ذالک فی سبیل اللہ؟ قال رسول اللہ صلی اللہ علیہ وسلم من قاتل لتکون کلمۃ اللہ ھی العلیا فھو فی سبیل اللہ۔ (ریاض الصالحین)
حضرت ابوموسی اشعری رضی اللہ عنہ گوشیت کہ یک مردمے چہ رسول کریم صلی اللہ علیہ وسلمءَ جست کُت کہ لہتے مردم انچیں ہست انت کہ پہ وتی دلیریءِ پیشدارگءَ جنگ کننت دگہ لہتے انچیں ہست انت کہ پہ وتی برات و سیادداریءَ جنگ کننت دگہ لہتے انچیں ہست کہ پہ نام و نمودءِ خاطرءَ جنگ کننت، چہ اشاں کئے انت کہ آئی جنگ پہ اللہءِ خاطرءَ انت، واجہﷺءَ پسّو دات ہر کس کہ پہ اے خاطرءَ جنگ بکنت کہ چہ آئی جنگءَ اللہءِ کلمہ (بزاں اسلام) سربلند بہ بیت ہمائی جنگ اللہءِ رضاءِ راہءِ جنگ انت۔
چہ اے حدیثءَ ثابت بوت کہ ہمک جنگ و مِڑے آخرتءَ کار آمد نہ بیت، ہمے پیما اے گپ ثابت بوت کہ جنگانی وجہ و سبب یکے نہ انت پمشا انسان اگہ چہ وتی اے عملءَ آخرتی اجر و ثواب لوٹیت گڑا چہ جنگ و مِڑءَ ساری وتی نیت و ارادہا بچاریت و بچکّاسیت۔
امام نووی رحمہ اللہءِ گوشگءِ مطابق نیت دلءِ کارانت چہ اے بزرگوارءِ تشریحءَ ثابت بوت کہ یک تو مے اول زمینءِ تہا چیر بیت پدا آ در ہچ و دار چہ ہمے چیریں تومءَ درکاینت، پمشا شریں فصلءِ خاطرءَ شریں توم المی انت، پنچیں توم یا نیم توامیں توم شریں فصل دات نہ کنت، ہمے پیما انسانءِ دل زمین انت و نیکین ارادہ آئی توم انت کہ زمینءِ تہا کشیتے۔
چوشکہ سرءِ ندریءِ نیت قربانیانی تہا مستریں توم انت و برزتریں جاہ نام و توارانت گڑا ادا بایدانت انسانءِ ہدف و نیت جہل و کسان مہ بیت، ہنچو کہ اے مزن شانیں کارے ہنچو آئی نیت ہما پیما مزن و بلند بہ بیت و چہ اے کارءَ انسان اللہ رب العزتءِ رضاءِ واہگدار بہ بیت نہ کہ سیاد و براتانی ہمراہداری یا کہ وتی دلیریءِ پیشدارگ و تعریف کنائینگ۔
اللہءَ وتی رسولﷺ پہ ہمے خاطرءَ دیم داتگ کہ آئی آورتگیں دین ہمک انسانےءَ برسیت و انسانانی سازتگیں دو دور بیدگانی تہا اسلام سربلند و سر بِر بہ بیت پہ اے مقصدءَ اللہءَ انسانءِ جان و مال پہ بہا زرتگ اَنت و نیاد جنت داتگ گڑا کسےءَ کہ وتی ساہ دوست انت و آئرا اندر کنگءِ واہگدار انت پہ آئی شرتریں راہ ہمیش انت کہ آ خاص پہ اللہءِ خاطرءَ جنگ و دعوا بکنت، اے چیزءِ تہا دگہ کسءَ ہور و شریک مکنت۔
چمشانک