شیخالاسلام مولانا عبدالحمید، ماں چهبار ءِ نمازجمعه ءِ دیوان ءَ (23 آبان 1404/ 14 نومبر 2025) گۆں اشاره به چهبار ءُ بلوچستان ءِ زربار ءِ مردمانی مشکلاں ماں وڑوڑێں پڑاں چۆ زۆزیگ، کارءُبار، جانسلامتی ءُ درمان ءَ گوشت که اے همے ڈیه ءِ مردمانی حق انت که ماں بهرزوری شه سوت ءُ طرحاں دێمتر به انت.
🔹چهبار ءِ مردماں باز رنج دیستگ ءُ بائد هاسێں دلگۆشے به انت
په سنیآنلاین ءِ سرهال ءَ مولانا عبدالحمید درشان کرت: چهبار ءُ استان ءِ مردماں بازێں زنج ءُ زحمتانی آماچ بوتگ انت ءُ بائد هاسێں دلگۆشے به انت. اے رنگ مه بیت که ڈیه ءِ مردم کارگس ءُ مزنێں مالزانشتی رهبند ءُ آزاتێں ڈیه ءِ کِنِکّ ءَ شه دێمرئی ءَ پشت کپ انت.
واجه ءَ گێش کرت: سیستانءُبلوچستان ءُ هاسکار چهبار ءِ مردماں نه بائد ماں اے طرحاں بےهیال به انت. اے چهبار ءُ استان ءِ مردمانی حق انت که ماں بهرزوری شه سۆب ءُ مزنێں طرحاں شه پهکان دێمتر به انت.
🔹هچ دێمرئی ءِ ماں چهبار ءِ شهر ءَ گندگ نه بیت؛ دمگی کارمستری پرے شهر ءِ آبادی ءَ گامے زور ایت
زاهدان ءِ آدێنگ ءِ امام ءَ گێش کرت: بژن انت که هچ دێمرئی ءِ ماں چهبار ءِ شهر ءَ گندگ نه بیت. چهبار یک تیابدپی شهرے. ماں دگه ملکاں تیابدپی شهراں که مساپر ءُ کُنڈگردانی جاه انت، هاسێں دلگۆش به انت ءُ آباد اشَ کن انت. چهبار هم شه هما شهراں انت که ماں نوروز ءَ ءُ دگه موکلی رۆچاں بازێں مساپرے ادا کێت. پمێشا بائد انت که سرکار اے شهر ءَ دلگۆش کنت ءُ آیرا ساچ ایت. استان ءِ دمگی کارمستری بائد انت اے شهر ءِ جند ءَ، ورگی ئێں آپ ءُ ساخت ءُ سازاں هاسێں دلگۆشے کنت.
🔹چهبار ءِ مردماں بائد سێر به انت ءُ اے شهر ءِ کٹءُکار ءُ باپاری دێمرئی کنت
مولانا عبدالحمید درائێنت: وهدے که ادا آزاتێں ڈیه جۆڑ بوت مردماں گت کرت که چهبار گلستان بیت ءُ چهبار ءِ مردماں سێر ءُ ٹگار اش گرانبها به انت، بلے ارمان که چپکایی بوت، چهبار ءَ هچ رنگے دێمرئی ئے نه کرتگ.
واجه ءَ گێش کرت: وهدے که بازێں اسباب ءُ کالائے چهبار ءَ کاینت ءُ شه اۆد ءَ ملک ءِ ته ءَ شنگ به انت، بائد انت که اے شهر ءِ باپاری ءُ کٹءُکار دێمرئی کنت.
زاهدان ءِ آدێنگ ءِ امام ءَ گوشت: دکتر اربابی، چهبار ءِ آزاتێں ڈیه ءِ سرمستر، دلاسۆزێں سرمسترے ءُ مردماں شه آیی وشنود انت. مئے لۆٹ شه آیی ءُ همےرنگ شه استاندار ءُ شه سرکار ءَ همێش انت که چهبار ءَ هاسێں دلگۆشے کن انت.
🔹کارگساں دمگی مردماں هێل دےانت ءُ گڑا آوان ماں کاراں کارمرز کن انت
واجه شیخالاسلام ءَ درائێنت: ٹوهێں کارگساں چۆ پتروشیمی ءُ فولاد ءُ… که ماں اے ڈیه ءَ جۆڑ بوتگ انت، بائد اول همے ڈیه ءِ مردماں هێل دےانت ءُ گڑا آوان ماں کارگساں کارمرز کن انت. بائد انت ماں اے ڈیه ءَ زانشتجاه جۆڑ بیت که مردماں کار ءَ هێل دنت که ماں کارگساں ءُ ٹوهێں طرحاں کار کن انت.
🔹چهبار ءِ مردماں دریاب ءِ کر ءَ زندگی کن انت، بلێں تنّگ انت/ پنجاه سال شه انقلاب ءَ گوستگ ءُ انگت چهبار ءِ ورگی ئێں آپ ءِ مشکل جۆڑ نه بوتگ
مولانا عبدالحمید گۆں اشاره به چهبار ءِ مردمانی ورگی ئێں آپ ءِ مشکلاں گوشت: چهبار ءِ مردماں دریاب ءِ کر ءَ زندگی کن انت ءُ انگت تنّگ انت که اے سستی ءُ مزنێں ظلمے. عجیب نه انت که پنجاه سال شه انقلاب ءِ اُمر ءَ گوستگ ءُ انگت نه توانتگ ات اے مشکل ءَ جۆڑ کن ات.
واجه ءَ گێش کرت: وهدے که دریاب ءِ آپ ءَ وش کن انت ءُ په دورێں شهراں بر انت، اول ءَ همے شهر ءِ مردماں بائد شه اے وشێں آپ ءَ بهر زور انت ءُ چهبار بائد شه دگه شهراں دێمتر ءَ بیت.
🔹راه ءُ شهرسازی ءِ وزارتجاه چهبار ءِ مردمانی ٹگارانی سند ءِ مشکل ءَ رندگیری کنت
مولانا عبدالحمید درشان کرت: چهبار شه کهنێں شهراں انت، بلێں انگت مردمانی ٹگاراں سند نه دار انت ءُ ٹگارانی بها کنگ ءُ زورگ گۆں پلاک ءَ بیت.
واجه ءَ گێش کرت: بازێنے شه چهبار ءِ ٹگاراں مسکن ءُ شهرسازی ءِ دست ءَ انت. پچے بائد چۆش بیت؟! مسکن ءُ شهرسازی ءِ وزارتجاه ءُ شه آئی برزتر سرکار ءُ استان ءِ دمگی کارمستری بائد اے مشکل ءَ رندگیری کن انت.
🔹چهبار ءِ بیناد مسکن، هلک ءُ کلگانی ٹگاراں سندَ دنت؛ مردماں اے وار ءَ نادلگۆش مه کن انت
مولانا عبدالحمید وتی هبرانی دێمتر ءَ گێش کرت: چهبار ءِ بنیاد مسکن ءَ که پێسر ءَ مردماں آیی باروا اێراد داشتگ، نون دمگی کارمسترانی دست ءَ انت ءُ جوانێن گامگێجے کرتگ تاں مردمانی ٹگاراں سند کنت. چهبار ءِ اێشکءُآشک ءِ هلک ءُ کلگاں اے طرح ءَ دلگۆش کن انت ءُ په وتی ٹگاراں سند گر انت.
🔹جانسلامتی ءُ درمان ءِ جاورهال ماں چهبار ءَ سک نگێگ انت؛ کارمستراں رندگیری کن انت
زاهدان ءِ آدێنگ ءِ امام ءَ وتی هبرانی گڈی سر ءَ ماں چهبار ءَ گوشت: مردماں مدام شه چهبار ءِ جانسلامتی ءُ درمان ءِ جاور ءَ گلگ دار انت. سرکار ءُ کارمستراں ءُ استان ءِ دمگی کارمستری اے جاور ءَ رندگیری کنت. چهبار ءِ 540 تهتی ئێں نادراهجاه زوتر گۆں دێمروی کرتگێں اۆزار و ساماناں بنگێج بیت.
چمشانک