شیخ‌الاسلام مولانا عبدالحمید، ماں زاهدان ءِ نماز جمعه ءِ دیوان ءَ (19 بهمن 1403/7 فبروری 2025) گۆں اشاره به ایران ءِ انقلاب ءِ سۆبمندی ءِ چلءُششمی سالرۆچ ءَ «عدالت»، «آزاتی» ءُ «ایران ءِ مڈیانی هرچ کن ءَ ملک ءِ ته ءَ» شه مردمانی مهمترێں مۆلءُمراداں زانت که گۆں انقلاب ءَ هوار بوت انت. واجه ءَ گوشت: بلێں گۆں چلءُشش سال ءِ گوزگ ءَ پد انگت ایران ءِ مردماں مشکلانی آماچ انت.
🔹ایران ءِ پێسر ءِ حکومت زۆرغنڈیگی ات ءُ حاکم ءَ مردمانی گپاں گۆش نه کرت
په سنی‌آنلاین ءِ سرهال ءَ مولانا عبدالحمید گوشت: ایران ءِ استمان ءَ 1979 ءَ اسلامی انقلاب ءِ سۆبمندی ءَ پد سک وش بوت انت، پچے که آوانَ اے مارشت بوتگ که پێسریگێں حکومت زۆرغنڈیگی ات ءُ حاکم ءَ مردمانی گپ گوش نه داشتگ ءُ حاکم ءِ کشءُگور ءَ انچێں مردم بوتگ انت که آهاں نه هشتگ مردمانی گپ حاکم ءَ سر بیت. راجدپتر ءِ دراجی ءَ یکے شه مزنێں اڑانداں هما بوتگ که آوانی کشءُگور ءِ مردماں راج ءِ گپ حاکم ءَ سر نه کرتگ انت.
واجه ءَ گێش کرت: پێسر شه انقلاب ءَ ماں ایران ءَ انچێں مزن‌بیمێں چێرێن اداره ئے ات په نام «ساواک» که په دُزّی گۆش ئے داشت ءُ په هالزانتی ءِ نزآرگ ءَ مردمانی لٹءُشاپَ کرت. آ درگت ءَ سلاهبنداں هم آزاتی لۆٹێں مردمانی سر ءَ زۆراکیَ کرت.
🔹ایران ءِ استمان گۆں «عدالت» ءُ «آزاتی» ءِ اۆگام ءَ چست بوت
زاهدان ءِ آدێنگ ءِ امام ءَ گوشت: پرێشا که آ زمانگ ءَ عدالت ءُ آزاتی نه ات، ایران ءِ استماں گۆں عدالت ءُ آزاتی ءِ اۆگام ءَ چست بوت. استمان په عدالت، آزاتی ءُ جوانێں ءُ پرزۆرێں مالزانشت ءَ تُنّگ ات. آ زمان ءَ انقلاب ءِ سرۆکانَ گوشت که دنیا ءِ آدگه زۆرآورێں حکومتاں ملک ءِ نپت ءُ تێل ءَ بر انت ءُ کارمستراں بیتءُالمال ءَ هول کن انت. مردماں انچێں حکومت ءِ لۆٹۆک ات انت که توانت عدالت ءَ ایران ءِ تیوگێں راج ءِ میانجین ءَ شه مردێں ءُ جنێں ءُ وڑوڑێں پاٹیاں اێر دار ایت.
🔹اگه مال ءُ مڈیاں ملک ءِ ته ءَ هرچ بوتێن انت مرۆچی ایران یکے شه «دنیا ءِ مالزانشتی بنجاهانَ» بوت
مولانا عبدالحمید درشان کرت: چلءُشش سال شه انقلاب ءِ اُمر ءَ گوز ایت ءُ ایران ءِ مردماں مرۆچی شه مشکلانَ نال انت، رۆچے نه انت که ملک ءِ شهر ءُ استانانی ته ءَ یک پاٹی ءِ شه پوریاگر ءُ کارمنداں شه مالزانشتی جاور ءِ ناگێگی ءَ زهرشانی مه کن انت.
واجه ءَ گێش کرت: ایران ءِ مردمانی اێراد اێش انت که اگاں اے مڈیاں ملک ءِ ته ءَ هرچ بوتێن انت مرۆچی ایران یکے شه دنیا ءِ مالزانشتی بنجاهاں ات ءُ مردماں سێر ات انت ءُ دگراں شه ایران ءَ سۆبَ برت.
🔹پچے ایران ءِ زر شه دنیا ءِ بےارزشت‌ترێں زراں بیت؟!
زاهدان ءِ آدێنگ ءِ امام ءَ گوشت: پێسر شه انقلاب ءَ هرچۆن که ماں ایران ءَ زر کم ات، بلێں ملک ءِ زر ءَ ارزشتَ داشت. آ زمانگ ءَ هرکس ءَ گۆں کمێں زر ءَ توانتگ که ٹوهێں کار کنت، بلێں مرۆچی اگه یک گوالگے زر هم داشته بیت ءُ بازار ءَ بروت هچ ارزشتے نه دار انت.
واجه ءَ گوشت: ایران ءِ گێشتری مردمانَ کٹءُکار نێست ءُ آوان هم که کٹءُکار ءِ واهند انت مشکلانی آماچ انت، پچےکه زر ارزشت نه دار ایت. پچے ایران ءِ زر شه دنیا ءِ بےارزشت‌ترێں زراں بیت؟!
🔹«استمان» شه «حکومت» ءَ هم مهمتر انت/ حکومت په استمان ءَ انت، نه استمان په حکومت ءَ
مولانا عبدالحمید گێش کرت: من هچ چیزے را «استمان» ءِ کساس ءَ مهم نه زان آں. منی دیدانک ءِ رد ءَ استمان شه «حکومت» ءَ هم مهمتر انت. مئے گپ اێش انت که استمان سکی ءُ گشنگی ءَ مه سگ ایت، استمان ءِ وشنودی مهم انت.
واجه ءَ ٹکاٹک گوشت: حکومت په استمان ءَ انت، نه استمان په حکومت ءَ. ماں دنیا ءَ هر حکومت ءِ اگده انت که په وتی استمان ءَ آسانی بیار ایت ءُ آیی وشنودی ءَ کٹ ایت.
🔹«عدالت» ءِ زۆر په امنیت ءِ آرگ ءَ شه «نۆکێں جوهری سلاهانی» زۆر ءَ گێشتر انت
🔹اگاں مرۆچی استمان وشنود بوتێں ملک باز زۆرآورَ بوت
زاهدان ءِ آدێنگ ءِ امام ءَ گێش کرت: سلاه ءُ جنگی آسراتیاں په دێمپان ءَ زبر انت ءُ ما آیی چپ نه اێں، بلے هچ چیزے گۆں استمان ءِ وشنودی ءَ برابر نه انت. عدالت ءِ زۆر په امنیت ءُ تاهیر ءِ جۆڑ کنگ ءَ شه تیوگێں نۆکێں دێماشتگێں سلاهانی زۆر ءَ گێشتر انت. استمان ءِ ساتگ باز هژدری انت. اگاں جنێں ءُ مردێں ءُ راج ءُ مذهبانی میانجین ءَ عدالت اێردارگ بوتێں مرۆچی مردمان وشنود ات انت.
واجه ءَ گێش کرت: اگاں مرۆچی مردماں وشنود بوتێن انت ملک باز زۆرآورَ بوت ءُ مشکلانی آماچ نه بوت. الله ءِ وشنودی گۆں مردمانی وشنودی ءَ همگرنچ انت.
🔹«بندشاں» توجیل نه انت؛ مشکلانی توجیل «ترانکاری» انت
🔹پێسر ءِ بندشانی گێشتری زۆر مردمانی سر ءَ بوتگ
مولانا عبدالحمید گۆں اشاره به ترامپ ءِ نۆکێں بندشاں ایران ءِ سر ءَ گوشت: «بندش» رد انت ءُ مردمانی مشکلانَ گێش کنت. پێسر ءِ بندشانی گێشتری زۆر مردمانی سر ءَ بوتگ ءُ نۆکێں بندش هم نۆکێں زۆر ءُ سکی انت په ایران ءِ مردماں.
واجه ءَ گوشت: آوان که پرے بندشاں لانچتگ، ایران ءِ مردمانی پکر ءَ نه انت؟! اے مردم نۆکێں بندشاں سگ ات نه کن انت. «بندشاں» توجیل نه انت؛ مشکلانی توجیل «ترانکاری» انت.
🔹ترمپ ءِ نۆکێں فیصله په غزه ءَ «پدرێں ظلمے» انت/ اسرائیل شه هما اول ءَ په همے رهبند ءِ اێر دارگ ءَ غزه ءَ را بێران کرت
زاهدان ءِ آدێنگ ءِ امام ءَ ماں دگه بهرے شه وتی هبراں ترمپ ءِ نۆکێں فیصله ءَ را په غزه ءَ «باز خطرناک» زانت ءُ گوشتء: گندگێں اراده ئے که ترمپ ءَ کرتگ اێش انت که غزه ءِ مردمانَ گلێن ایت ءُ غزه ءَ تفریحی جاگه ئے جۆڑ کنت.
واجه ءَ گوشت: ارادهے که نون ترمپ ءَ کرتگ، شه هما اول ءَ اسرائیل ءِ تانسرپسندانی مولءُمراد بوتگ. اسرائیل شه هما اول ءَ پمێشا غزه ءَ را بێران کرت که مردم مه توان انت اۆد ءَ زندگی کن انت ءُ ترمپ ءُ اسرائیل وتی مولءُمراد ءَ رس انت.
واجه ءَ گوشت: غزه بائد انت په آیی جندے مردماں آباد ءُ جۆڑ کنگ بیت، نه که په یهودیاں اۆد ءَ هلک ءُ مێتگ جۆڑ کن انت.
شیخ‌الاسلام ءَ همےپێم نتانیاهو ءُ ترمپ ءَ را شه الله ءِ عذاب ءَ ترسێنت ءُ گوشت که الله ءِ زۆر شه تیوگێں دنیا ءِ زۆرآوراں گێشتر انت ءُ ما را بێسه هست که الله پاک آوانَ انگڑێن ایت.
واجه ءَ همےرنگ گوشت که میان‌رۆدرآت ءِ امنیت گۆں «آمید ءِ اێر دارگ» ءُ «فلسطین ءُ اسرائیلی ءِ میانجین ءِ عادلانه ئێں سُهل ءَ» همگرنچ انت ءُ گۆں زۆر ءُ وت‌منی ءَ نه بیت که ماں میان‌رۆدرآت ءُ دنیا ءَ امنیت ءُ تاهیر بیار ات.
🔹مردمانی گسانی ڈالێنگ جوانێں کارے نه انت
🔹«ملکی ڈگاراں» مردمانی انت؛ اے ڈگارانَ مردمانَ دےات تاں گس بند انت/ گسانی کرێهاں شه مردمانی وس ءَ در انت
مولانا عبدالحمید ماں دگه بهرے شه وتی هبراں گۆں اشاره به مردمانی گسانی ڈالێنگ ءَ چهبار ءُ زاهدان ءِ شهرانی کر ءَ، گوشت: ملک ءِ ءُ هلاکه ءِ کارمستراں زان انت که زندگی پراستی په مردماں سک بوتگ. ماں تهران ءَ آوان که پێسر ءَ شهر ءِ جوانێں دمگاں زند گوازێنتگ، نون پرێشا که کرێهانی وس ءَ نه دار انت، بےوسی ئێں دمگاں یا په هلکانَ لڈ انت. وهدے که تهران ءِ مردمانی حال اێش انت، آدگه شهرانی مردمانی حال بدتر انت. زاهدان ءُ آدگه شهرانی مردماں هم گسانی گرانێں کرێهانی وس ءَ نه دار انت.
واجه ءَ گێش کرت: «ملکی ڈگاراں» مردمانی انت. شما اے ڈگارانَ مردمانَ بدےات تاں په وت گس بند انت. لهتے ادارهانَ چنکه هکتار ڈگارَ دےات، شه اے ڈگاراں هما مردمانَ که کرێه‌نشین انت هم بدےات.
زاهدان ءِ آدێنگ ءِ امام ءَ درشان کرت: اداره ءُ کارمندانَ آوانی وازمندی ءِ کساس ءَ ڈگار بدےات، اێنکس مه دےات که آواں گۆں آ ڈگاراں کاسبی کن انت یا هۆرکێں ڈگارانَ واهندی کن انت. اے ظلم انت. سیستانءُبلوچستان که یک ملک ءِ کساس ءَ انت، شاهگانێں ڈگار دار ایت که بازێنے شه اے ڈگاراں کشاری هم نه انت؛ همے ڈگارانَ مردمانَ بدےات.
واجه ءَ ٹکاٹک گوشت: مردمانی گسانی ڈالێنگ جوانێں کارے نه انت. ما را امێت است که کارمستراں دلسۆچی کن انت ءُ مۆکل مه دےانت که لهتے گۆں وتی مارشتاں بنامی جۆڑ کن انت. ما پهکاں سرپد اێں که مرۆچی ئێں جاور وشێں جاورے نه انت، پمێشا بائد انت شه شۆرێنۆکێں کاراں پهرێز بیت.
🔹زاهدان ءِ شهرداری ءِ کارمستراں په شهر ءِ تمیزی ءَ جهد کن انت
مولانا عبدالحمید وتی هبرانی گڈسر ءَ گۆں اشاره به مردم ءُ مسافرانی گلگاں شه زاهدان ءِ کچٹی ءَ، شه شهرداری ءُ شهر ءِ شورجاه ءِ کارمستراں لۆٹ ات که په شهر ءِ تمیزی ءَ کوشست کن انت.
چمشانک