شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (۱۲ مرداد ۱۴۰۳) گۆں اێشی بیان ءَ که «راجی تپاک ءِ سرکار» گۆں قوم، مذهب ءُ جنێنانی لائکێں مردمانی کارمرز کنگ ءَ ماں ملک ءِ ءُ دمگانی مزنێں پستاں جۆڑ بیت، «بدلی»، «لۆٹ ءُ واهگانی پێلو کنگ» ءُ «استمان ءِ مشکلانی گێشءُگیوار کنگ ءَ» را شه مردمانی بهرزوری ءِ مسترێں مولءُمراداں ماں جمهوری کماشی ءِ چاردمی گچێنکاری ءَ زانت.
🔹 مردماں په بدلی ءُ مشکلانی گێشءُگیوار ءَ به ڈاکٹر پزشکیان ءَ رأی دات
په سنیآنلاین ءِ سرهال ءَ مولانا عبدالحمید گۆں اشاره به جمهوری کماش ءِ سۆگند زوری ءِ دیوان ءَ گوشت: ڈاکٹر پزشکیان ءَ ایران ءِ مردمانی ھمراہ داری ءِ اُمیت بوتگ ءُ بدلی ءِ وعدہء داتگ ءُ آیی ءِ بازێں وعدهاں لس مردمانی واھگ ءُ امێتانی ھمدپ بوتگ انت ءُ ھمے وعدهاں سوب بوت انت که مردماں ماں گچێنکاری ءَ بهر زور انت.
🔹 ایران بس یک پاٹی ءِ ملک نه انت؛ بلکه آ پهکێں قوم، مذهب ءُ وڑ وڑێں پاٹیانی ملک انت
زاهدان ءِ آدێنگ ءِ امام ءَ درشان کرت: ایران ءِ درستێں مردم شه راج ءُ مذهب ءُ جنێن ءُ ورنا ءُ سجهێں پاٹیاں ایرانی اَنت ءُ ایران ھمے مردمانی ھند ءُ دمگ انت ءُ دگه کس ءِ نه انت. لھتے گونڈ پکرێں مردمانی گمان انت که ایران یک هاسێں گل یا مذھبے ءِ اِنت، وھدے که ایران یک گلے ءِ نه انت بلکه آ ایران ءِ مردمانی انت.
واجه ءَ گێش کرت: ھر ملک ءُ سرکار گۆں ھرچۆنێں نظام ءَ که به بیت، آ بائد انت که وتی چتر ءَ سرجمێں راج ءِ سر ءَ پچ به کنت ءُ ھرکس ءَ یک رنگ به گند ایت ءُ آوانی میان ءَ برابری زانت ءُ لھتے ءَ شه دومی ءَ گهتر مه کنت، بلکه آمید ءَ اێر دار ایت ءُ شه مچێں استمان ءِ لائکاں کار گیت.
🔹 ماں یک اسلامی حکومتے نه بائد نابرابری ءِ ترس به بیت
🔹 «نابرابری ءِ دور کنگ» ءُ «کاران ءَ کارزانتان ءَ دیگ» شه ایران ءِ استمان ءِ مسترێں لۆٹان بوتگ
مولانا عبدالحمید گوشت: ایران ءِ مردمانی امێت انت که نابرابری دور کنگ بنت ءُ آمید اێر دارگ بیت. یک ملکے ءَ ھاس ھما ملک ءَ که آئی ءِ ته ءَ اسلامی رھبند ھست انت، نه بائد نابرابری ءِ ھچ وڑیں ترس ءُ مارشت بیت، پرچا که ماں اسلام ءَ بےانصافی ءُ نابرابری یک نابکشۆک ءُ سک مزنێں گناهے.
مولانا عبدالحمید گێش کرت: ایرانی راج ءِ یک ھاسیں ءُ ٹوهێں لوٹ ھمێش انت که کار کاربلد ءُ بودیگێں مردمانی دست ءَ دیگ به بیت ءُ ھمک ٹک ءُ مذھب ءُ جنێن ءُ مردێنانی نیام ءَ انصاف ءِ دارگ به بیت. کارمستراں انچۆ هژار به بنت ءُ انچێں وڑے ءَ کار به کن انت که چاگرد ءِ تها نابرابری ءِ مارشت هم مه بیت. نابرابری ءِ اثر سک خطرناک ءُ دێرپا انت.
🔹 رۆزیگی مشکلاں پراستی مردمان ءَ کزه کرتگ
🔹 مالزانتی مشکلانی گێشءُگیوار ءِ ھاتر ءَ عزم، راستێں رهبند ءُ ملکی ءُ درملکی سیاستانی ته ءَ بدلی پکار انت
شیخالاسلام مولانا عبدالحمید ءَ وتی هبرانی دێمتر ءَ گۆں اشاره به ملک ءِ مالزانتی ءُ رۆزیگی مشکلاں گوشت: رۆزیگی مشکلاں پراستی مردمان ءَ کزه کرتگ. ملکی زر بےارزشت بوتگ. یک رۆچے بوتگ که گۆں یک ملیون ءَ یک بهرے شه مردم ءِ وازمندیاں پێلو بوتگ، بلے مرۆچی ما انچێں جاورے ءَ سر بوتگ اێں که اگاں یک ایرانیے ءِ کیسگ ءَ دہ ملیون تومن به بیت ءُ بازار ءَ به رۆت گڑا آ نه زانت که آوان ءَ کجا ھرچ کنت، پچے که نه توانت کسانێں بھرے ھم شه وتی وازمندیان ءَ پێلو به کنت.
🔹 اهلسنتاں بائد ملک ءِ ته ءَ منّگ به انت
زاهدان ءِ آدێنگ ءِ امام ءَ گوشت: یک دگرے شه مسترێں لوٹاں همێش انت که اهلسنتاں ملک ءِ ته ءَ منّگ به بنت. ھمے رنگ ءَ آ آزاتیں رنگے ءَ الله ءِ بندگی ءَ به کن انت ءُ پولیس ءُ پهازۆکی واکاں په نماز، نمازخانه ءُ عبادت ءَ آوانی پد ءَ مه کپ انت. پولیس ءُ پهازۆکی واکانی اگده آزاتی ءِ جۆڑ کنگ انت. اهلسنتاں بائد ماں هێلکاری ءُ وانێنگ ءَ هم آزاتی داشته به انت. کانود ءَ اے آزاتی ءَ داتگ، بلے بژن انت که همے بنیادی کانود ءِ ردءَ هم کرد نه بیت که آیی ءِ بازێں بنداں کار نه کرتگ ءُ بدل کنگ لوٹ انت.
مولانا عبدالحمید ءَ تچکاتچک گوشت: ما را امێت هست که چاردمی سرکار اهلسنتانی اے لۆٹاں پێلو به کنت ءُ یک اهلسنتے که ملک ءِ هر کنڈ ءَ نماز کنت یا قرآن مجید ءُ اعتقادی مسائلانی دربرگ ءَ به کنت، آیرا هچ ترس ءُ بیمے مه بیت.
🔹 پاکستان ءِ سرکار گوادر ءِ راجی مچی ءِ گپاں گوش به کنت ءُ آوانی لوٹاں گێشءُگیوار به کنت
شیخالاسلام مولانا عبدالحمید ماں دگه بهرے شه وتی هبراں رۆدراتکی بلوچستان ءِ وئیلاں اشاره کرت ءُ گوشتء: پاکستان شه ھمساھگ ءُ دوستێں ملکاں انت ءُ اے دوئیں ملکانی استمانانی میانجین ءَ دێرێں سۆب ءُ سوت ءُ جوانێں سیادی ءُ رهوت هست انت. گوستگێں رۆچاں بلوچستان ءِ شھر گوادر ءَ شێر زالبۆلانی لۆٹ ءِ رد ءَ یک مزنێں زھرشانی یے برجم دارگ بوت.
واجه ءَ درائێنت: زھرشانی کنۆکاں لوٹ ھست انت که آوانی کهولانی مزنێں کساسے بێگواہ بوتگ ءُ آوانی جنێن ءُ چُک حیران ءُ پرێشان انت. بێگواھێں مردمانی کھولانی لۆٹ همێش انت که شه بێگواھێں مردمانی آکبت ءَ سهی به انت ءُ آ لۆٹ اَنت که سرکار آواں شه اے بلاتکلیفی ءُ بهمانگی ءَ آجو به کنت. البت که آوان ءَ دگه لوٹ هم هست انت.
زاهدان ءِ آدێنگ ءِ امام ءَ گوشت: سرجمێں ملک ءُ سرکارانی اگده انت که پرایمنێں مچی ءُ زهرشانیانی دێم ءَ مه دار انت، بلکه گۆں زهرشانی کنۆکاں نند انت ءُ آوانی هبران ءَ گۆش دار انت ءُ اگاں آوان ءَ راستێں ءُ حقێں لۆٹ هست، آوان ءَ پێلو کن انت.
واجه ءَ گێش کرت: هر نظام ءُ حکومت ءِ زمه واری انت که آ وتی مردمانی ھیالداری ءَ به کنت؛ امنیت ءَ اێر دار ایت، بنیاتی ڈیلءُڈۆلاں جوڑ کنت ءُ په مردماں زانت ءُ زانگ ءِ پڑا ءُ کار ءُ دندا ءَ تیار کنت.
مولانا عبدالحمید ٹکاٹک درائێنت: رۆدراتکی بلوچستان ءِ وئیل ءِ بابت ءَ ما دوئێں نێمگاں سۆگه کن ایں که آ یکجاہ به نند انت ءُ وتی جیڑهاں گوں گپ ءُ تران ءَ گێشءُگیوار به کن انت. ما شه پاکستان ءِ سرکار ءِ اگدہ داراں ھم لوٹ کن اێں که آ بلوچستان ءِ مردماں ءُ آواں که ماں گوادر ءَ مُچ بوتگ انت، گپان اش گوش به دار انت ءُ آوانی لوٹان ءَ دلگۆش کن انت ءُ مه هل انت تاں شه پرامنێں مچی ءُ زھرشانیاں دێمداری بیت.
واجه ءَ وتی هبرانی گڈسر ءَ اسماعیل هنیه ءِ ترور ءَ سک اێر جت ءُ شه میاناستمانی هۆربنداں لۆٹ ات که اسرائیل ءَ ملامت کن انت. واجه ءَ همےرنگ شه آمیدگس ءَ لۆٹ ات تاں خواش ءِ هلک، قادرآباد ءِ وئیل ءَ رندگیری کن انت که لهتے پهازۆکی واکاں اۆد ءَ تیرگواری کرتگ ءُ جنێں مردمے بێران ءُ دو ورنا ٹپی بوتگ انت. واجه ءَ اے وئیل ءِ بابت ءَ وتی بژن ءَ درشان کرت که پهازۆکی واکاں اێشی بدل ءَ که په مردمانی امنیت ءَ جهد کن انت، وت مردمان ءَ کش انت.
چمشانک