شیخالاسلام مولانا عبدالحمید، ماں زاهدان ءِ نماز جمعه ءِ دیوان ءَ (۲۲ تیر ۱۴۰۳) مسعود پزشکیان؛ گچێن کرتگێں جمهوری کماش ءَ سۆگه کرت که «عدالت»، «آزاتی» ءُ «مالزانشت» ءَ وتی رهبندانی بُندار کنت ءُ شه «بودیگاں» کار گیت.
🔹 پزشکیان، مردمان ءَ امێت دات تاں ماں گچێنکاری ءَ بهر زور انت
په سنیآنلاین ءِ سرهال ءَ شیخالاسلام مولانا عبدالحمید جمهوری کماش ءِ گچێن کنگ ءِ باروا گوشت: دو جمعه پێسر ءَ جمهوری کماشی ءِ گچێنکاری ات. پهکاں سرپد انت ءُ اے چێرێں چیزے نه انت که تیوگێں ملک ناامێتی ءِ آماچ ات. وڑوڑێں سکیاں مردمانی زندمانی ءِ تها آوان ءَ دلگران کرت ات ءُ مردماں ناامێت ات انت؛ پمێشا ماں گچێنکاری ءِ اۆلی هپتگ ءَ بهر زورۆکاں باز کم ات انت، بلێں ماں دۆمی هپتگ ءَ که چکاس دو جمهوری کماشی ءِ امێدوارانی نیام ءَ بوت، پزشکیان ءِ گپاں ماں گچێنکاری ءِ گپءُگالاں مردمان ءَ امێتوار کرت ءُ ناامێتێں مردمان ءَ گچێنکاری ءِ نێمگ ءَ کش ات؛ پچےکه ڈاکٹر پزشکیان ءَ بازێنے شه لس مردمانی دردان ءَ شه جنێناں دان راج ءُ مذهباں ءُ وڑوڑێں پاٹیان، بیان کرت.
🔹 50 درصد شه مردماں وعدهان ءَ باور نه کرت
زاهدان ءِ آدێنگ ءِ امام ءَ گێش کرت: مردم امێتوار بوت انت که بلکێں پزشکیان توانت اے دردان ءَ درمان کنت، پمێشا دۆمی هپتگ ءَ ماں گچێنکاری ءَ بهر اش زۆرت، چۆناهی ءَ رأی ئے که واجه ڈاکٹر ءَ دات اش هاسێں پاٹی ءِ رأی نه ات، بلکه لس مردمانی رأی ات. انگت هم 50 درصد شه مردماں اے گپان ءَ باور نه کرت ءُ گوشت اش که جمهوری کماش اے گپان ءَ جنت، بلێں بیتکنت که مه هل انت آ وتی وعدهان ءَ پێلو کنت.
واجه ءَ گێش کرت: ما درست زان اێں که انوگێں وھد ءَ لھتێں مزنیں مشکل بوتگ اَنت؛ اۆلی بُندار عدالت اِنت، دۆمی بندار آزاتی اِنت ءُ سێمی بندار مالزانشت ءُ معیشت اِنت.
🔹 گچێں کرتگێں کارمستراں سست ءُ شه یک هاسێں پاٹی ئے انت
شیخالاسلام مولانا عبدالحمید ٹکاٹک گوشت: مردم مارشت کن انت که لائک ءُ وسی ئێں مردم کار گرگ نه بنت ءُ آ کارمستراں که شه سکێں گێچناں گوازێنگ به انت نزورێں کارمستر انت ءُ شه یک هاسێں پاٹی ئے انت. راج ءُ مذهباں هم اے گپ ءِ سر ءَ شکایت کرتگ که گوستگێں 45 سالانی تها شه آوانی لائکێں مردماں کار گرگ نه بوتگ.
🔹 بلکێں پزشکیان توانت راج ءُ مذهبانی ھیالداری ءَ به کنت
ھر دور ءَ اهلسنتاں جھد کرتگ ءُ اصلاحطلب ءُ اصولگرائاں رائے داتگ بلے آسر ءَ نه رستگ انت. واجه پزشکیان ءِ اے گپاں لس مردمان ءَ امێت دات که بیتکنت آ توانت راج ءُ مذهبانی ھیالداری ءَ به کنت ءُ آوانی لائکێں مردمان ءَ کار گیت.
🔹 لائکێں جنێناں وتی جاہ ءَ اێر کنگ نه بوتگ انت
زاهدان ءِ آدێنگ ءِ امام ءَ جنێنانی جاور ھال ءِ بابت ءَ گْوشت: بژن انت که ما نه توانت جنێنان ءَ آوانی جاگه ءَ اێر کن اێں ءُ امێتدار ات اێں که ما هرچه گوش اێں آوان منّ انت. مرۆچی ئێں جنێن زی ئێں جنێن نه انت، بلکه وس ءُ تۆکء کٹتگ ءُ مزنشهدربرجاه ءَ شتگ ءُ ماں زانتی پڑاں جهد ءُ کۆشست ء کرتگ. بازێنے شه جنێناں لێکه ءِ واهند انت ءُ ماں بازێں مسائلاں گهترێں تۆجیلان ءَ پێش دار انت. شه جنێنانی لائک ءُ وسیاں ماں ملک ءِ وزارت ءُ مزنێں کارمستریاں کمتر کار گرگ بوتگ.
واجه ءَ گوشت: جێڑهانے که زوتاں ملک ءِ تها جۆڑ بوتگ انت همے سوب ءَ انت که جنێنان گوش انت چۆں ما را په حجاب ءَ گند انت، بلێں مئے بودشتان ءَ نه گند انت. جنێناں هم همێشرا لۆٹ انت که وتی جاگه ءَ اێر کنگ به انت. تیوگێں بودێں ایرانیاں ماں دنیا ءِ کنڈ کنڈاں نامءُتوار کرتگ. پچے آوان وتی ملک ءَ جۆڑ مه کن انت؟ تیوگێں راج ءُ مذهبانی بودێناں ماں ایران ءَ سک نابرابری ءِ آماچ بوتگ انت. تبعیض و نابرابری هچ اسلامی نه انت.
🔹پزشکیان په راج ءُ سرکار ءَ شرتریں موہ اِنت
شیخالاسلام مولانا عبدالحمید درشان کرت: واجه پزشکیان ءِ آیگ په سرکار ءُ راج دوئێناں شرتریں موہ اِنت که حاکمیت واجه پزشکیان ءِ دستاں آزات به کنت دانکه آ ملکی سیاستان ءَ جۆڑ به کنت ءُ مئے میان استمانی لیکه ءَ بدل به کنت. ما بائد گۆں دێمروی کرتگێں ملکاں جوانێں رهوتے به دارێں ءُ وتی حق ءُ عزت ءِ دێمپانی ءَ به کن اێں دانکه به توان اێں گۆں سرجمێں دنیا ءَ جوانێں رهوتے به کن اێں ءُ مئے زرانی ارزشت پد ءَ واتر به بیت.
🔹 بےارزشتێں یارانه استمان ءِ بدبختی ءِ سوب بوتگ
واجه ءَ تچکاتچک گوشت: ھما مردماں کہ گْوشتگ پابندیاں داد انت ءُ ما شه پابندیاں رکّ اێں، اے گپ پدر بوت که آوانی گْوشگ ءِ وڑ ءَ نه بوت ءُ پابندیاں وتی نشان ءَ هِشت. بازێں بااثرێں مردم ءُ گلاں شه راجی سۆباں پائدگ زۆرتگ ءُ راج بزگی ءُ گریبی ءِ آماچ انت. ما هچ دۆرے نه دیستگ که ایران ءِ راج چوشێں گرانێں جاور ءِ آماچ بیت. اے چیزے هم که په نام یارانه دیگ بیت بےارزشت ترێں چیز اِنت. یارانه که دیگ بوت راج بدبخت بوت. زر بائد ارزشت ودی کنت ءُ کارءُ دند ءَ جۆڑ بیت.
🔹 گچێن بوتگێں جمهوری کماش ءِ مسترێں کار «جنگ ءُ مێڑ گۆں فساد ءَ» انت
زاهدان ءِ آدێنگ ءِ امام ءَ گوشت: ما را اُمیت اِنت که مالزانشت گهتر بیت. «مالزانشت» ءُ «ملکاری» انچۆش گۆں یکے دومی ءَ بندوک اَنت که داں ملکی ءُ درملکی سیاستان جۆڑ مه به انت، مالزانشت شر نه بیت. مسترێں کارے که واجه ڈاکٹر پزشکیان ءِ دیم ءَ اِنت ءُ آ سک باز هژدری ءُ مهم انت، جنگ گۆں فساد ءَ اِنت. ایشی ءِ واستا مزنێں جهد ءُ کوشست ءِ پکار اِنت ءُ ٹوهێں جنزے لۆٹ ایت که تیوگێں ادارهاں په نابرابری ءِ دور کنگ ءُ آمید ءِ اێر دارگ ءَ ھمگرنچ به بنت.
🔹 حکومت ءِ قدرت گۆں سلاہ ءُ سلاہ ءِ جۆڑ کنگ ءَ نه انت
شیخالاسلام مولانا عبدالحمید ٹکاٹک گوشت: برے برے لھتے مردم حکومت ءِ قدرت ءِ گپ ءَ جنت ءُ اے شریں گپے، بلے منی هیال اێش انت که حکومت ءِ قدرت گۆں سلاہ ءِ جۆڑ کنگ ءُ سلاہ بندێں واکاں نه انت بلکه هر حکومت ءِ مسترێں قدرت آمید ءِ اێر دارگ ءُ مردمداری انت. مردم هر حکومت ءِ پلهمرزی ءَ کن انت، آ حکومت قدرت دار ایت. مردمانی لوٹانی پێلو کنگ ءُ زالبول ءُ راج ءُ مذھب ءُ سرجمێں ایرانی مردمانی کوکارانی اشکنگ، مسترێں چیز انت.
واجه ءَ اشارہ کرت: اگاں مردمانی دلاں وتی نێمگ ءَ کش ات، گڑا اے ٹوهترێں ازم انت. اگاں مردم نااُمێت بوت انت گڑا دوارگ اُمیتوار نه بنت ءُ اے موہ اگه گار به بیت پد ءَ نه یێت.
🔹 پزشکیان ماں وتی کابینه ءَ شه راج، مذاهب ءُ جنێنانی لائکێناں کار گیت
زاهدان ءِ آدێنگ ءِ امام ءَ وتی هبرانی گڈسر ءَ گوشت: منی سۆگه په واجه ڈاکٹر پزشکیان ءَ اێش انت که ماں وتی کابینه ءَ شه راج، مذاهب ءُ جنێنانی لائکێناں کار گیت ءُ جهد کنت که لائکێں مردمان ءَ ماں پهکێں وزارتخانه ئاں کارمرز کنت. ما را امێت انت که وتی گچێنکاری ءِ درگت ءِ وعدهان ءَ پێلو کنت.
چمشانک