مروچی :سه شنبه, ۲۶ تیر , ۱۴۰۳
مولانا عبدالحمید:

مذهبی ئێں سکی ءُ نمازجاهانی بند کنگ بنیادی کانود ءِ چپ ءَ انت

مذهبی ئێں سکی ءُ نمازجاهانی بند کنگ بنیادی کانود ءِ چپ ءَ انت

شیخ‌الاسلام مولانا عبدالحمید، ماں زاهدان ءِ نماز جمعه ءِ دیوان ءَ (3 آذرماه 1402/ 24 نومبر 2023) گۆں انتقاد شه نمازجاهانی بند کنگ ءَ ماں لهتێں ٹوهێں شهراں، اے کردار ءَ بنیادی کانود ءِ چپ ءَ زانت ءُ آوانی پچ کنگ ءَ را مردمانی بنی لۆٹ زانت.

🔹هچ حکومتے را مۆکل نێست که شه نماز ءَ دێمداری کنت

په سنی‌آنلاین ءِ سرهال ءَ شیخ‌الاسلام مولانا عبدالحمید درشان کرت: نماز یکے شه دین ءِ هژدری ئێں رکنان انت. مئے پهکانی اگده انت که وت هم نماز بوان اێں و دگران ءَ هم سۆگه کن اێں که نماز بوان انت. حکومتء اسلامی ءُ هر دینی حکومتے اگده انت تاں پڑا په نماز ءِ وانگ ءَ تیار کنت.

واجه ءَ گێش کرت: باز دلگرانَ به اێں وهدے اُشکن اێں که ماں جمهوری اسلامی ءَ واکاں ماں لهتێں شهراں شه نماز ءِ وانگ ءَ دێمداری کرتگ. بژن انت که چنکه نمازجاه ءَ را ماں تهران ءُ مشهد ءَ بند اش کرتگ. هچ حکومتے شه الله ءُ رسول الله ءِ نێمگ ءَ چشێن حقے نه دار ایت که شه نماز ءَ دێمداری کنت. انگرێز وهدے اے ملک ءَ آت ءُ یک بهرے شه اے ملک ءَ را گپت ئِے، هچبر شه نماز ءَ مکن ئِے نه کرت. مهشور انت که انگرێزاں گوشتگ گۆں مئے حکومت ءَ شما را کارے مه بیت، هرچنکه لۆٹ ات نماز بوان ات.

زاهدان ءِ آدێنگ ءِ امام ءَ درائێنت: ماں آ نمازجاهاں که بند بوتگ انت هچ مشکلے نه بوتگ ءُ هچ گپے حکومت ءِ چپ ءَ گوشگ نه بوتگ. «نماز» عبادتے ءُ په هچ حکومتے تاوانے نه دار ایت. باز بد انت که حتا اے گالرد کارمرز بیت که «شه نماز ءَ دێمداری بوتگ». هرکسے هرکساس ءَ که لۆٹ ایت نماز بوان ایت؛ دگری ئے نێست که شیعه ئے بیت یا اهل‌سنتے، مسلمانے بیت یا نامسلمان، یهودی ءُ عیسایی هم عبادت دار انت ءُ به هچ کس ءَ تاوانَ نه رسێن ایت. یک دۆرے ٹَکبَنداں (کمونیست) شه مسلمانانی نماز ءَ دێمداری کرتگ، بلێں نون آوان هم همے آسر ءَ رستگ انت که سکی بےپۆک انت ءُ دین ءُ مذهباں بائد آزات بےانت.

واجه ءَ ٹکاٹک گوشت: مذهبی سکیاں شیعه ءُ اهل‌سنت ءُ یهود ءُ عیسائیانی سر ءَ رد انت ءُ بنیادی کانود ءِ چپ ءَ انت. وهدےکه بنیادی کانود ءَ مۆکل داتگ شما پچے مکن ءَ کن انت؟! اے الله ءِ گس انت ءُ هرکس که شه نماز ءِ وانگ ءَ دێمداری کنت، شیعه ئے بیت یا اهل‌سنت، اے دشمنی انت گۆں الله ءَ.

مولانا عبدالحمید گوشت: منی سۆگه به کارمستراں همێش انت که اے ڈامپۆلانی دێم ءَ گر ات. ماں یکے شه مێتگاں وهدے مردماں گوشت ات ما لۆٹ اێں نماز بوان اێں پهازۆکی واکے نه هشت ات ءُ گوشت ات ئِے که شمے بےنمازی ءِ گناه منی بڈ ءَ بیت. اێشی بزانت اێش انت که چشێں مردماں دین ءَ را سرپد نه بوتگ انت. بےنمازی ءِ گناه کسے ءِ بڈ ءَ انت که نماز ءَ را نه وانتگ ئِے، کسے که شه نماز ءَ مکن کنت آیی گناه جتا انت.

واجه ءَ گوشت: لهتے جاهاں هم گوشگ بوتگ که پرێشی که شما گۆں مسیت مکی ءَ رهوت دار ات، شما را نه هل اێں که نماز بوان ات. آوان که ماں مکی ءَ انت یا گۆں مکی ءَ همگرنچ انت مسلمان انت. مکی گۆں مکه ءُ بیت‌الله ءُ نماز ءَ همگرنچ انت. پمێشا آوان ءَ که نماز وان انت مۆکل دےات تاں نماز بوان انت، اگں شمے چپ ءَ گپ اش جت گڑا دێمداری کن ات.

🔹نمازجاهانی پلم ءَ پرۆش ات؛ آزاتی په نماز ءِ وانگ ءَ شه مئے بنی حقان انت

زاهدان ءِ آدێنگ ءِ خطیب ءَ تچکاتچک گوشت: مئے پهکانی المی لۆٹ اێش انت که مردمان ءَ په نماز ءِ وانگ ءَ آزات به هل ات، نمازجاهانَ بند مه کن ات ءُ پلمان اش پرۆش ات ءُ آوانَ که پێش‌نماز انت بێهار مه دےات. اے شه مئے بنی حقان انت ءُ اگاں اے حق شه ما گرگ بیت که مه توان اێں نماز بوان اێں گڑا دگه هیچی په ما ارزشت نه دار ایت. اگه پهکێں چیزان ءَ ما را دےات بلێں مه هل ات که نماز بوان اێں ما هچ چیزے را نه منّ اێں. اے منی گپاں شه دلسۆچی ءَ انت، بائد ما پهکاں جهد کن اێں که مردم نماز بوان انت ءُ کارمستراں پرے چیز ءَ دلبڈی دےانت.

زاهدان ءِ آدێنگ ءِ امام ءَ درائێنت: «آزاتی» باز هژدری انت. اے که ما ءُ ایران ءِ استمان شه آزاتی ءِ نێستی ءَ گلگ دار اێں، مئے مولءُ مراد شه آزاتی ءَ ترندآپ ءُ ربا ءُ مۆک ءُ نشه ئی مواد ءُ گناهانی آزاتی نه انت، بلکه مئے مراد ند ءُ گپ ءُ شرگداری ءِ آزاتی انت. ما گوش اێں نماز ءَ ماں تیوگێں ملک ءَ آزات کن ات، البت اے استان ءَ نماز مشکلے نه دار ایت، بلێں ماں بازێں دگه استاناں که اهل‌سنتاں کم انت، په نماز ءِ وانگ ءَ گۆں سکیاں آماچ انت.

واجه ءَ گێش کرت: یکے شه حکومت ءِ مهمێں اگدهاں همێش انت که شه مسیت ءُ نمازجاهاں حفاظت کنت. پاکێں قرآن ءَ درائێنتگ: «وَلَوْلَا دَفْعُ اللَّهِ النَّاسَ بَعْضَهُمْ بِبَعْضٍ لَهُدِّمَتْ صَوَامِعُ وَبِيَعٌ وَصَلَوَاتٌ وَمَسَاجِدُ يُذْكَرُ فِيهَا اسْمُ اللَّهِ كَثِيرًا» و اگه دور مکتێں الله ءَ مردمانی زۆر لهتے ءِ په دگه لهتے ءِ دست ءَ گڑا پرۆشگ بوت انت دروێشانی چله‌خانه ءُ نصارایانی عبادتخانه ءُ یهودیانی عبادتخانه ءُ مسلمانانی مسیت که ماں آیانی تها الله ءِ نام گرگ بیت باز. مرۆچی یک اێرادے که ما اسرائیل ءِ سر ءَ گر اێں همێش انت که پچے ماں غزه ءَ مسلمانانی مسیت ءُ مسیحیانی کلیسائان ءَ بێرانی کرتگ؟! مسلماناں ماں راج‌دپتر ءِ دراجی ءَ یکے شه یهود ءُ مسیحیانی عبادجاهانَ نه ڈالێنتگ. عبادتجاهاں حرمت دار انت ءُ بائد آوان حرمت ساتگ بیت.

🔹اهل‌سنتاں شه ملکی رسانک ءَ پوره زبهر انت

🔹یک تندجاهے دار اێں؛ لۆٹ انت همایرا هم بند کن انت

مولانا عبدالحمید ماں دگه بهرے شه وتی هبراں په رسانکانی آزاتی ءَ سکان سۆگه کرت ءُ گوشت ئِے: بائد رسانکانی آزاتی ساتگ بیت. ما اهل‌سنتاں شه ملکی رسانک ءَ که هرچء شه بیت‌المال ءَ انت، پوره زبهر اێں، وهدےکه ماں دگه ملکاں مذاهب ءُ پاٹیاں جتائێں رسانک دار انت. مئے واهشت ات که کم‌ته‌کم ما را یک ماهوارهی گندگوشی بوتێں تاں وتی دینی ءُ دنیایی مسائلانَ پێش داشتێں اێں، بلێں هما یک تندجاهے که دار اێں شه هما اول ءَ فیلتر بوتگ ءُ نون لۆٹ انت همایرا هم بند کن انت.

واجه ءَ درشان کرت: بائد دیدانکاں پراه بےانت. وهدےکه حاکمے ءِ دیدانک پراه بیت په استمان ءَ رحمتے بیت، بلێں اگه دیدانکء پراه مه بیت وت ءَ ءُ استمان ءَ گۆں سکیاں آماچَ کنت. مئے سۆگه اێش انت که په بےدرێں چیزاں دزگر مه کن ات، لهتے شه پاگواجه ئاں بندیگ انت که اگه انصاف کن اێں هبرے اش نه داتگ. پاگواجه ئانی بندیگ کنگ جوانێں کارے نه انت. گۆں آوان ترانکاری بیت ءُ آجو بےانت تاں په چاگرد ءَ هزمت کن انت. پهکانی امێتداری همێش انت که ورنا ءُ جنێن ءُ زانت‌لۆٹاں آزات بےانت.

🔹مصلا ءِ اێشکءُ آشکے ءُ زاهدان ءِ امنیتی جاور دور کنگ بیت

مولانا عبدالحمید ماں دگه بهرے شه وتی هبراں گوشت: ما استان ءِ کارمسترانَ گوشتگ که ما جهدَ کن اێں تاں شه پدگرداں دێمداری کن اێں، شما هم شه وتی نێمگ ءَ جهد کن ات تاں مشکلاں کم بےانت. من شه شما درێں مردماں هم دزبندیَ کن آں که جمعه ءِ رۆچ ءِ سۆگه ئانَ دلگۆش کرتگ ات ءُ وتی تاهیر ءَ ساتتگ ات.

واجه ءَ گێش کرت: منی سۆگه په استان ءِ شورای تامین ءِ کارمستراں اێش انت که زاهدان ءِ امنیتی جاور ءَ کم کن انت ءُ مصلا ءِ اێشکءُآشکے امنیتی جاور ءَ هم دور کن انت. چشێں جاورے هم په سرکار ءَ هرچ دار ایت ءُ گران انت ءُ هم مردمانی کٹءُکار ءَ گۆں سکی ءَ آماچ کنت.

🔹زاهدان ءِ زمین‌چنڈ الله ءِ ڈاه ات تاں هم الله ءُ هم مردمانی حقان ءَ کمار کن اێں

مولانا عبدالحمید وتی هبرانی گڈسر ءَ به زاهدان ءِ زمین‌چنڈ ءَ اشاره کرت ءُ گوشت ئِے: زمین‌چنڈ ماں زاهدان ءَ باز کم پێش کێت. اے زمین‌چنڈ شه الله ءِ نێمگ ءَ ڈاه ئے ات تاں جنێں ءُ ورنا ءُ ما پهکان ءَ سرپد کنت که گناه ءُ ظلم ءَ یله ده اێں ءُ الله ءُ مردمانی حقان ءَ کمار کن اێں.

واجه ءَ گێش کرت: زمین‌چنڈ ءِ زۆر نزیک به 5 ریشتر ءَ بوتگ؛ اگاں زۆرء یکءُنێم یا دو بوتێں مئے شهر ءَ را ابێرے کرت ءُ گرانێں تاوانے رسێنت. اے الله ءِ لطف ءُ رحمت بوتگ که ما را لمبتگێں دیوالانی چێر ءَ نه کرت ئِے، ما بائد شه اے بابت ءَ الله ءِ شکر ءَ ادا کن اێں ءُ وتی رهوت ءَ گۆں الله ءَ ڈڈ کن اێں.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *