شیخ‌الاسلام مولانا عبدالحمید، ماں زاهدان ءِ نماز جمعه ءِ دیوان ءَ (31 شهریور 1402/ 22 سپتمبر 2023) گۆں اشاره به لهتے پهازۆکی واکانی جهداں په زاهدان ءِ هۆنێں جمعه ءِ شهیدانی بن‌گپ ءِ حل کنگ ءَ، سک سۆگه ئِے کرت که پرایی حل کنگ ءَ بائد شه «دروازگ» ءِ بیا ات.
🔹واجه رسول الله صلّی‌الله‌علیه‌وسلّم وتی ءُ وتی زهگانی هزگاری ءِ پکر ءَ نه ات؛ بلکه په مردمانی هزگاری ءَ پکرے کرت
په سنی‌آنلاین ءِ سرهال ءَ شیخ‌الاسلام مولانا عبدالحمید گوشت: دێم شه واجه رسول الله ءِ آیگ ءَ شه آمید ءُ حقانی اێر دارگ ءَ سۆجے نه ات. الله پاک ءَ گڈی پێغمبر ءَ را گۆں مزنێں بستارے دێم دات تاں اے پیغمبر توانت استمانے را که شه باور ءُ اخلاقے نێمگ ءَ پد ءَ کپت ات، راهشۆنی کنت. شه یک نێمگ ءَ قرآن مجید ءِ اێر آیگ ءُ شه دگه نێمگے واجه رسول الله صلّی‌الله‌علیه‌وسلّم ءِ حکیمانه ئێں رهبنداں سبب بوت انت تاں ماں کمترێں زمان ءَ ماں مکه ءُ حجاز ءُ جزیرةالعرب ءَ ٹوهترین دگری جۆڑ بیت.
زاهدان ءِ آدێنگ ءِ امام ءَ درائێنت: مهمترێن ٹک ءُ سۆبمندی ءِ رمز ماں چاگرد ءُ امت ءِ آپسله ءَ ابید شه واجه رسول الله صلّی‌الله‌علیه‌وسلّم ءِ هێمات ءَ اێش ات که واجه ءِ جند ءَ پهکێں راهشۆنی ءُ گپتارانی سر ءَ عمل کرت. واجه ءَ وت را شه دگران برزتر نه زانت، اگه صحابه ئاں شه گشن ءَ وتی لاپان یک سنگے بست ات، واجه رسول الله صلّی‌الله‌علیه‌وسلّم ءَ دو سنگ بست ات. اگه صحابه ئاں یک رۆچ یا دو رۆچ په ورگ ءَ نان نه داشتگ، واجه رسول الله ءَ سے رۆچ یا گێشتر نان نه داشتگ. اگه آ واجه ءَ صحابه ئانَ گوشتگ که نماز تهجد بوان ات، وت اِنکس وانتگ ئِے که پادانی آلماس کرتگ.
واجه شیخ‌الاسلام ءَ گێش کرت: واجه رسول الله صلّی‌الله‌علیه‌وسلّم ءَ هچبر نه لۆٹتگ که آیی ءُ آیی زهگانی زندگی شه دگراں گهتر بیت. اگه واجه رسول الله ءُ آیی زهگانی زندگی آباد ءُ آدگه مردم گشنگ بوتێن انت، گڑا آ واجه ءَ هچبر اے سۆبمندی ءَ را نه کٹ ات. واجه رسول الله صلّی‌الله‌علیه‌وسلّم ءُ آیی زهگاں گێشتر شه دگراں گۆں سکیاں آماچ بوتگ انت، بلێن په دگه مردمانی راحتی ءِ پکر ءَ بوتگ انت. همے بوت که دنیا ءِ سے یک واجه رسول الله ءُ آیی خلیفه ئانی زمان ءَ توحید ءِ بیرق ءِ چێر ءَ آت انت ءُ اے یک باز ٹوهێن دێمروی ءِ ات.
🔹پیغمبر ءَ هچ کارے را پلیسی نه کرت
🔹واجه رسول الله ءِ زمانگ ءَ بندیجاه نه ات
مولانا عبدالحمید دێمتر ءَ گوشت: واجه رسول الله صلّی‌الله‌علیه‌وسلّم ءَ هچ کارے را پلیسی نه کرت ءُ کسے را په جرمے دزگر ئِے نه کرت، بلکه پهکێن کارانَ گۆں پنت ءُ راهشۆنی ءَ کرت ئِے. اگه حجاب ءِ باروا سۆگه ءِ داشتێن ئِے کسے ءِ راه ءَ را نه بست ئِے، بلکه مردماں وت عملَ کرت. عقیده ءُ توحید ءُ نماز ءُ دگه حکمانی باروا همےرنگ کردار ئِے کرت. بس شرعی احکامانَ که هاس ءُ باز کم بوتگ انت ءُ کس ءَ وت استه کرتگ، گڑا واجه ءَ آیی حکم ءَ را اێر داشتگ. واجه ءِ زمانگ ءَ بندیجاه نه بوتگ. یک برے اسیرے را آورت اش ءُ به مسیت ءِ ستون ءَ بست اش. وهدےکه واجه ءَ آیرا دیست جست ئِے کرت: چے ئے پکر ءَ کنے؟ آیی گوشت: من خیر ءَ گند آں ءُ به خیر ءَ پکر کن آں (اگه منا کش ات شمے حق انت، پچےکه هۆنے منی بڈ ءَ انت، بلێں اگه منا بکشایت شمے احسان انت) واجه ءَ هم گوشت که آیرا آزات کن ات. همے کردار سبب بوت که آ مسلمان بیت.
🔹اگه جنێنانی حرمت ساتگ بوتێن گڑا په حجاب ءَ سکێن کانودانی تصویب لازم نه ات
زاهدان ءِ آدێنگ ءِ امام ءَ گوشت: پهکان که لۆٹ انت حکومت جۆڑ کن انت واجه رسول الله صلّی‌الله‌علیه‌وسلم ءِ سیرت ءَ پدکیری کن انت. اگه مردم گشنگ انت حکومت ءِ واهندان ءُ آوانی زهگان هم بائد گشنگ بےانت ءُ وت ءَ شه مردماں جهل‌تر زان انت. مردمانی امێتداری شه حاکم ءُ رهشۆناں همێش انت که وت را برزتر مه زان انت.
واجه ءَ درشان کرت: شه 57 ءِ آشۆب ءَ پد مزنێن وارے ات که مردمانَ واجه رسول الله صلّی‌الله‌علیه‌وسلم ءِ سیرت ءِ رد ءَ آپسله کن اێں. اگه ما واجه رسول الله ءِ سیرت ءِ رد ءَ کردار کرتێں ءُ گۆں مردماں همراه بوتێن اێں سکیان سگتێن اێں گڑا لازم نه ات که مرۆچی جنێنانَ گوش اێں که حجاب کن ات یا پارلمان په حجاب ءِ باروا سکێن کانود جۆڑ کنت. اگه جنێنانی حرمت ساتگ بوتێن آوان وت حجاب کرت.
🔹اسلام ءِ شریعت کمی نه دار ایت؛ هر کمی مردمانی کردارانی تها انت
مولانا عبدالحمید دێمتر ءَ گۆں ارمان شه مردمانی دوری ءَ شه دین ءَ گوشت: بژنیگ اێں که ماں چاگرد ءَ دوری شه دین ءَ باز بوتگ ءُ بازێنے ءِ گمان همێش انت که نونێں جاور ءِ سبب دین ءِ سستی انت. بلێں اے ٹوهێن ردی ئے. سستی مردمانی انت، واجه رسول الله صلّی‌الله‌علیه‌وسلم ءُ اسلام ءِ شریعت شه سستی ءَ پاک انت. نونێں مشکلانی سبب ردێن کردار ءُ کارمسترانی وت‌سری انت.
واجه ءَ گوشت: ما وشالَ بوتێن اگه توانتێن اێں دنیا ءِ مردم ءُ استمانانی میانجین ءَ ءُ ماں میان استمانی گل ءِ دیوانانی تها جوانێن الگوی پێش کرتێن اێں. ما باز گل بوت اێں اگه دنیا ءِ استمانان گران مهذبێن استمان ءِ کلۆه رسێنگ بوتێن بلێن اێرنگ نه بوت.
🔹 هچ کس نه توانت اے استان ءِ پاگواجه ءُ اسپےریشانی میانجین ءَ جتایی بیار ایت
🔹ما مظلوم ءَ همراهداری کن اێں
زاهدان ءِ آدێنگ ءِ امام ءَ گوشت: همے زوت ءَ لهتێنے لۆٹتگ که هۆنێن جمعه ءِ بن‌گپ ءَ یک رنگے جۆڑ کن انت، وهدےکه الله پاک ءَ په هر مشکل ءِ جۆڑ کنگ ءَ راهے هشتگ. الله پاک ءَ سۆگه کرتگ که وهدے لۆٹ ات گسے ءِ تها پتر ات شه دروازگ ءَ بیا ات نه شه پنجره ءَ. اگه ما هم شه راهے بیا اێں گڑا توان اێں مشکلان جۆڑ کن اێں.
واجه ءَ گوشت: الحمدلله اے ڈیه ءِ پاگواجه ءُ اسپےریشاں یکےانت ءُ گۆں هم تپاک دار انت، هچ کس نه توانت اێشان شه هم جتا کنت، گڑا اگه کسے لۆٹ ایت کارے کنت اێشرا زانت که اے ڈیه ءِ زندگی اےرنگ انت که ادے پاگواجه ءُ اسپےریشاں شه مردماں جتا نه انت ءُ همے مردمانی زهگ انت. الحمد الله ادا یکویی ءُ تپاک است ءُ اے الله ءِ داد انت.
دارالعلوم زاهدان ءِ سرمستر ءَ گوشت: اێشرا هم گوش اێں که ما هچ کسے چپ ءَ نه اێں چه حاکم بیت یا استمان، بلکه ما اێشرا گوشتگ که گۆں مظلوم ءَ اێں. کسے را که ظلم کرتگ پنت ءُ سۆگه کن اێں ءُ هبرے که آیی صلاح ءَ بیت ما آیرا گوش اێں.
🔹گواچنی یکویی وهدے بیت که آیی رد ءَ کردار هم بیت
مولانا عبدالحمید ماں دگه بهرے شه وتی هبراں گوشت: اے چلءُچار سال ءِ دراجی ءَ مدام «یکویی ءِ هپتگ» بوتگ ءُ ما هم ماں آیی دیواناں بهر زرتگ ءُ گپ جتگ، بلێں مئے باور اێش انت که تپاک ءُ یکویی وهدے جۆڑ بیت که کردارانی تها هم بێت. اگه ما بس هبر دے اێں ءُ کردار مه کن اێں گڑا یکویی هچ جۆڑ نه بیت. واجه ءَ گوشت اگه نابرابریاں زورگ بوتێن انت ءُ یکویی ءِ رد ءَ کرد بوتێں گڑا اثر ئِے درا بوت. بس گۆں دیوان ءِ برجم دارگ ءُ هبر دیگ ءَ یکویی جۆڑ نه بیت.
زاهدان ءِ آدێنگ ءِ امام ءَ وتی هبرانی گڈی سر ءَ گوشت: همے زوتی ءَ آوان که لۆٹتگ په وتی زهگ ءُ سیاداں که ماں زهرشانیاں کشگ بوتگ انت سالرۆچ گر انت شه حکومت ءِ نێمگ ءَ گۆں مشکلاں آماچ بوتگ انت، لهتے را دزگر اش کرتگ که اے کار ءَ ما پهکانَ دلسیاه کرتگ. دنیا ءِ رسم اێرنگ انت که گۆں چشێن مردماں همدردی بیت. ایران ءِ مردم دۆدءُربێدگ ءِ واهند انت ءُ مدام گۆں سوگی ءُ رنج دیستگاں همدردی اش کرتگ.
چمشانک