شیخالاسلام مولانا عبدالحمید، ماں زاهدان ءِ جمعه نماز ءِ دیوان ءَ (11 فروردین 1402/ 31 مارس 2023) گۆں اشاره به جمهوری اسلامی ءِ ووٹکاری ءِ سالگشت ءَ، مذهبی دیدانک ءَ را ملک ءِ پدمانی ءِ سبب زانت.
په سنیآنلاین ءِ سرهال ءَ شیخالاسلام مولانا عبدالحمید درشان کرت: فروردین ءِ دوازدهمی رۆچ، هما رۆچے که استمان ءَ ووٹ/ رأی دات که چه حکومتے لۆٹ انت. گێشتری مردمان اسلامی السواجهی ءَ را گچێن کرت. استمان ءَ السواجهی ءَ را گچێن کرت که هر چیزے باروا مردمانی دیدانک ءُ رأی مهم انت. اے اسلامی السواجهی ءِ انت ءُ اسلامی احکامانی رد ءَ انت.
واجه ءَ گێش کرت: ایران ءِ پلێن مردماں هما چیز ءَ را گچێن کرت که قرنانی دراجی ءَ مردمانَ باز دۆست بوت ات؛ پچےکه مردماں اسلام ءَ را شه واجه رسول الله صلّیاللهعلیهوسلّم ءِ زندگی ءُ خلفای راشدین ءُ مهتر علی ءِ زمانگ ءَ دُرست کرتگ که دین چه جوانێن گوهرے. استمان ءِ پهکێن پاٹیان شه شیعه ءُ سنی ءُ دگه رمباں ءُ راجاں په جمهوری اسلامی ءَ رأی دات. اے باز جوانێن وارےات، اگاں شه اێشی په جوانی کارگرگ بوتێن ءُ اسلام ءِ برزێن بستار کارمرز بوتێن ءُ گۆں استمان ءِ وڑوڑێن پاٹیان اسلام ءِ رۆگه ءَ کردار بوتێن ءُ پهکانی وسیاں کارگرگ بوتێن انت نه یک هاسێن مذهبی دیدانکے. گڑا تاں صد سال دگر ءَ هم هچ زهرشانی ءِ جۆڑ نه بوت.
🔹استمان ءِ وسی ءُ مزنسسائائێن مردماں گچێن نه بوت انت
زاهدان ءِ آدێنگ ءِ امام ءَ دێمتر ءَ گوشت: مشکلے که پێش آت، اێش ات که حکومت په پهکێن استمان ءَ برابر نه انت. کمێن پاٹی ءُ اهلسنتان گۆں ظلم ءُ نابرابریاں آماچ بوت انت، اهلسنتانی وسیاں منّگ نه بوت انت ءُ بلکه دگه پاٹیانی وسیاں هم منّگ نه بوت انت. بازێن وسی ئێن مردمے که توانت اش راجکماش هم بےانت، بلێن وزیر اش هم نه کرت ءُ تاں اے وهد ءَ اهلسنتے را استاندار اش هم نه کرتگ.
واجه ءَ گۆں اشاره به مذهبی سکیاں که اهلسنتانی سر ءَ بوت انت، گوشت ئِے: ابید شه اے مشکلاں اهلسنتانَ آ رنگ که بنیادی کانود ءَ مۆکل داتگ، هم آزات اش نه هشت. اهلسنتانَ گۆں بازێن مذهبی سکیاں آماچ اش کرت، پد ءَ هم یک رهبندے جۆڑ اش کرت که آوانی پهکێن مذهبی چیزانَ یک پاٹی ءِ دست ءَ دات اش که من ماں آن ماڑی ءَ تهران ءَ گوشت: وهدے شه پانگجاه ءَ تاں بُرزگ ءَ هچ اهلسنتے نێست، گڑا اهلسنتاں چۆن شمے سر ءَ برۆسه کن انت؟! چشێن چیزے هچ نه بیت.
🔹مذهبی دیدانک ءَ ملک ءَ را یک هاسێن پاٹی ءِ دست ءَ دات
مولانا عبدالحمید گێش کرت: مذهبی دیدانک چه شیعه بیت یا سنی، پابندی جۆڑ کنت. ماں اے ملک ءَ همے چیز سبب بوتگ که یک هاسێن پاٹی ءِ ملک ءِ راه برگ ءَ دست ءَ گێت تاں اۆد ءَ که هما دیندارانَ که پکر اش کمے پاچ تر بوتگ هم آوانَ کار اش نه گپتگ. بازێن اهلسنتے گوشگ بوت انت که شما شه هما دروازگے که آتگ ات، در بےات. اختیار ارگانانی دست ءَ انت که آوانی کارمستر ورنا انت ءُ کتهکار نه انت.
واجه ءَ درشان کرت: برے من پکر کن آن که درێگے پلێن شیعه ئانی وسیاں کار گرگ بوتێن انت. اهلسنتانی حقانَ که نه دات اش، ماستێن شیعه ئێن وسیانَ کار اش گپتێن که په مردمان کار کن انت. شیعه ئانی وسیان هماوان انت که نون یورپ ءُ دگه ملکانَ جۆڑ کن انت. ماں ایران ءَ بازێن وسی ئێں مردم هست که شه ایران ءِ ٹوهترێن هنتکانان انت.
🔹ڈیه ءِ مڈی ءُ واراں همے استمان ءِ حق انت
مولانا عبدالحمید دێمتر ءَ گۆں اشاره به سیستانءُبلوچستان ءِ مردمانی گڑتیاں گوشت: سیستانءُبلوچستان ءِ اهلسنتێن مردماں ماں وڑوڑێن پڑاں چۆ وسیانی کارگرگ ءُ مذهبی آزاتیاں گڑتی دار انت. یکے شه مهمێن گڑتیاں همے مکران ءِ تیابدپ ءِ رهبند انت که لۆٹ انت اے دریابکرّ ءَ پوره دگرانَ دےانت. همے مردماں په آ ڈگارانی پهازگ ءَ کشگ بوتگ انت ءُ سکیان اش سگتگ، اے دریابکر همے مردمانی حق انت.
🔹دلارے که شاه ءِ زمانگ ءَ 7 تومن بوتگ نون به 54 هزار تومن ءَ رستگ/ دگه په اے استمان ءَ چے منتگ؟
زاهدان ءِ آدێنگ ءِ امام ءَ رۆزیگی جاورے باروا گوشت: ماں ایران ءَ یک لس گڑتی ءِ جۆڑ بوتگ که بازێن مردمے شه جنێن ءُ مردێن ءُ ورنائانَ پرێشان ئِے کرتگ که پچے اے ملک دێمروی ءِ بدل ءَ گۆں چشێن جاورے آماچ انت. رۆچے که حکومت شه شاه ءَ مئے دست ءَ کپت دلار 7 تومن انت، پچے مرۆچی به 54 هزار ءُ برزتر ءَ رستگ؟ اگاں شه 7 تومن ءَ به 70 تومن ءَ رستێن هم ایرادے جا ات، بلێن شه 7 تومن ءَ به 54 هزار ءَ رستگ. دگه پرے استمان ءَ چے منتگ؟ اێشی مردمان گۆں بازێن سکی ءِ آماچ کنت.
🔹کے را باور بیت که جمهوری اسلامی نماز ءَ مکن کنت!
مولانا عبدالحمید گێش کرت: ماں آخری گچێنکاری ءَ گۆں پهکێن مشکلانے که هست ات، پهکان نه، بلێن یک بهرے شه شیعه ءُ سنیان ماں گچێنکاری ءَ بهر زرت ءُ رأی اش دات تاں مشکلاں جۆڑ بے انت، بلێن مشکلاں گێشتر هم بوت انت. نون دهاں نمازجاه ماں مشهد ءِ شهر ءَ بند بوتگ انت. کے باور کنت که جمهوری اسلامی نماز ء هم مکن کنت! اگاں اے گپ ءَ دگه جاهے گوش اێں، گوش انت که درۆگے. هچ کس نماز ءَ مکن نه کنت. نماز ءُ نمازجاه په هچ کس ءَ نقصان نه دار ایت.
🔹ماں ملگر ءُ صهیونیستێن اسرائیل ءَ چنکه نپر ماں زهرشانیان کشگ بوتگ انت؟
مولانا عبدالحمید درشان کرت: منی سۆگه به کارمستران اێش انت که اگاں استمان زهرشانی کنت نه بائد لٹءُشاپ ءُ بندیگ بےانت. ماں اسرائیل ءَ که ما پهکان آیرا ملگر ءُ صهیونیست زان اێں چنکه نپر ماں زهرشانیان کشگ بوتگ انت؟ ماں فرانسه ءَ مردماں زهرشانی کرتگ پلیس ءَ گۆں آپ ءَ آوانی دێم ءَ گپتگ.
واجه ءَ درائێنت: گۆں جنگی ءُ ساچمه ای تیراں ماں هچ جائے شه دنیا ءَ مردمانَ نه جن انت، اے شمے مردم انت، من شمے خیر ءَ لۆٹ آں من ءَ چیزے نه رس ایت، بلێن مردمانی جنَگ مزنێن ردی ئِے. جنێن ءُ مردێنانی بندیگ کنگ ءُ دلسۆجانی بندیگ آوانی گسانی تها رد انت.
🔹سی سال انت من ءَ نه هل انت گۆں مزنرهشۆن ءَ نیاد کن آں/ گۆں راجکماشاں نیادۆن کرتگ بلێن آوان اختیارے نه دار انت
زاهدان ءِ آدێنگ ءِ امام ءَ درشان کرت: من شما را منّتگ ءُ مدام گۆں شما همکاری کرتگ. اهلسنتان گۆں شما همکاری کرتگ ءُ من آوانی پێش امام بوتگ آں. شمے گچێنکاریانی گرمی شه اهلسنتانی نێمگ ءَ بوتگ، بلێن سی سال انت که من گوشتگ گۆں مزنرهشۆن ءَ من ءَ گپ هست، بلێن شما مۆکل نه داتگ که گۆں آیی نیاد کن آں. من گۆں راجکماشاں گپ جتگ بلێن آوانَ اختیارے نێست. واجه ءَ گوشت به هل ات گپ کن اێں. اگه گۆں مخالفاں نشتێن ات مرۆچی گۆں اے مشکلان آماچَ نه بوت ات. منی سۆگه به کارمستراں اێش انت که چارگے درگێج انت، اے راهے که تچان ات بند انت.
چمشانک