مروچی :جمعه, ۱۰ فروردین , ۱۴۰۳
مولانا عبدالغنی بدری ماں زاهدان ءِ جمعه نماز ءِ دیوان ءَ:

ظلم ءُ مردمانی حقانی پادمالی کنگ گندگێں آسرات دار ایت

ظلم ءُ مردمانی حقانی پادمالی کنگ گندگێں آسرات دار ایت

مولانا عبدالغنی بدری ماں زاهدان ءِ جمعه نماز ءِ دیوان ءَ (18 شهریور 1401) گۆں اشاره به «انسانی حقانی» ارزشت ءَ ماں اسلام ءَ لس مهلوک ءُ هاس حکومتانَ شه ظلم ءُ انسانی حقانی پادمالی ءَ مکن کرت.

په سنی‌آنلاین ءِ سرهال ءَ مولانا عبدالغنی بدری پد شه اے پاگپ ءِ وانگ ءَ: «مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ» [النحل: 97]  درشان ئِے کرت: دنیا ءِ زندگی باز کم ءُ گونڈ انت، بلێں اگاں ماں اے گونڈێں زندگی ءَ الله ءِ حکمانی رد ءَ کرد بیت گڑا همے گونڈێں زندگی به انچێں زندگی ءِ بدل بیت که انسانے مدامی ئێں وشبهتی ءُ سۆبمندی ءَ سبب بیت.

آیی گوشت: الله ءِ حکمان دو بهر انت «الله ءِ حقاں» ءُ «انسانی حقاں». ایمان به الله ءِ جند ءَ ءُ آیی صفتاں ءُ همےپێم الله ءِ هاسێں صفتان بس په الله ءِ جند ءَ زانگ، الله ءِ اولی حق انت بندگانی سر ءَ. پد ءَ آدگه احکام ءُ فرایض انت چۆ: نماز، رۆچگ، حج، پاک‌ونڈ ءُ دگه احکاماں.

دارالعلوم زاهدان ءِ هێلکاری معاون ءَ گوشت: انسانی حقاں هم الله ءِ حقانی کساس ءَ ارزشت دار انت. ماں بندگانی حقاں ابید شه انساناں دگه ساهداراں هم شریدار انت. هماپێم که ماں حدیثاں هست که الله پاک ءَ مردمے را پرێشی که ساهدارے ءِ سر ءَ ظلم کرت ات عذاب دات یا دگه مردمے ءِ سر ءَ رحم کرت پرێشی که آیی ساهدارے ءِ سر ءَ رحم کرت ات.

مولانا عبدالغنی بدری دێمتر ءَ به مردمانی جندے حقاں اشاره کرت ءُ گوشت ئِے: انسانانی حقاں انچۆش مهم انت که اگاں مسلمانے شه دگه مسلمانے نفرت داشته بیت، گڑا بیت‌کنت که ایمان تباه بیت ءُ اگه گۆں دگه مسلمانے کێنگ کنت بیت‌کنت که نێکی ءِ زیان بےانت ءُ اگه مسلمانے را حقیر زانت گۆں الله ءِ هژم ءَ آماچ بیت ءُ اگه وتی مسلمانێں براسے هون ءَ رێچ ایت مدامی جهندمے تها مان ایت. گواچنی ئێں مسلمان هما انت که دگه مردمے را رنج مه دنت.

مولانا بدری گوشت یکے شه مسلمانانی حقاں محبت انت، مسلمان بائد گۆں دگه مسلمان ءَ محبت کنت ءُ آیرا وتی براس زانت. آگاں محبت بیت گڑا ظلم نه بیت.

دارالعلوم زاهدان ءِ هێلکاری معاون ءَ گوشت: الله پاک صحابه ئانی بارو ءَ گوش ایت: «رُحَمَاءُ بَینَهُم»؛ سجهێں مسلماناں بائد اے صفتے واهند بےانت. صحابه ئاں شه وڑوڑێں قوماں ات انت بلێں گۆں وت محبتش داشتگ، اگه مسلماناں هم گۆں وت محبت کن انت همدگرے سر ءَ ظلم نه کن انت.

مولانا بدری سک سۆگه کرت که ظلم انچێں چیزےکه حکومت ءُ زۆرآورانی رۆتگ ءَ سۆچ ایت ءُ مظلومے آه ظالم ءَ تباه کنت.

دارالعلوم زاهدان ءِ استاد تفسیر ءَ همےپێم «توبه» ءِ بارو ءَ گوشت که مزن شأنێں قرآن درائێنیت: «أَوَلَا يَرَوْنَ أَنَّهُمْ يُفْتَنُونَ فِي كُلِّ عَامٍ مَرَّةً أَوْ مَرَّتَيْنِ ثُمَّ لَا يَتُوبُونَ وَلَا هُمْ يَذَّكَّرُونَ» [توبه: 126] زاناں مردم نه گند انت که سالے تها یک بر یا دو بر گۆں مشکل ءُ سکیاں آماچ بےانت، بلێں انگت توبه نه کن انت ءُ پنت نه زور انت؟! الله پاک سکی ءُ مشکلان کار ایت تاں مردم پنت گر انت ءُ الله ءَ زاری کن انت. نون توجیل اێش انت که ما پهکاں الله ءِ نێمگ ءَ بر گرد اێں، مردمانی حقان پادمالی مه کن اێں ءُ وتی اصلاح ءَ بنگێج کن اێں.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *