مروچی :پنجشنبه, ۹ فروردین , ۱۴۰۳

بلوچی زبان ءِ آکبت چے بیت؟

بلوچی زبان ءِ آکبت چے بیت؟

زبان راجانی پجّار اِنت ءُ زندگ داروک اِنت. زبان کہ مر اِیت گُڑا راج ھم مر اِیت. مرگ ءِ مراد بزاں ھما راج نیست ءُ نابود بیت. زبان ئِے پر اِنت بلے گُنگ اِنت. آ راج راجانی دْرچ ءَ ھساب کنگ نہ بیت البت گُنگانی ٹولی ءَ ھساب کنگ بیت. دنیا ءَ بازیں زبانے گار ءُ بیگواہ بیتگ. زبان ءِ زندگ دارگ ءُ دیم ءَ برگ ھما راج ءِ راجی زمّہ واری اِنت کہ وتی زبان ءَ مرگ ءَ میل اِیت. زبان تئی گپ ءُ تران ءُ نبشتہ کاری ءِ مستریں وسیلہ اِنت. ءُ یکّے دومی ءَ گوں وتی راجی جیڑھانی سر کنگ ءُ جیڑھانی گیش ءُ گیوار کنگ ءِ توجیل اِنت. تئی دود ءُ ربیدگ ءُ راجی کدرانی زندگ دارگ ءُ دیمروی ءِ مادنیں کشک اِنت. تئی زبان دنیا ءِ راجانی دیم ءَ تئی پجّار ءِ مانزمان اِنت. ھمے زبان ءِ برکت اِنت کہ ترا چہ اے دگہ راجاں جتائیں بستارے دات. زوراک جھد کنت کہ درستاں ساری تئی زبان ءَ نیست ءُ نابود بہ کنت ءُ ترا وتی گلام بہ دار اِیت ءُ وتی زوریں ھاکمی ءَ دراج کش بہ دنت. زبان شُت تئی پجّار ھم بزاں شُت. تئی آجوئی، وتواجھی ءُ وتواکی گوں تئی زبان ءُ دود ءُ ربیدگاں بندوک اِنت. تئی دودمان ءِ پلگاروک اِنت. چہ میاں استمانی راجدپتراں منّگ بیتگ کہ زوراک دائم ءَ تئی زبان ءُ لبزانک ءِ سر ءَ ارش کنت.

وتی جند ءِ زبان ءِ زندگ دارگ تئی دود ءُ ربیدگ ءُ راجی کدرانی پجّار اِنت. زوراک مدام جھد کنت کہ وتی زبان ءَ تئی سر ءَ بہ مُش اِیت. تئی زبان ءَ بہ پُل اِیت. وتی دود ءُ ربیدگاں ءُ وتی دودمان ءَ ءُ وتی زبان ءَ تئی گُٹ ءَ لوپ کنت. داں تو وت ءَ بہ شموش ئے ءُ زوراک ءِ زبان ءَ گپ ءُ گال بہ کن ئے ءُ نبشتہ بہ کن ئے. مرچی ما چاریں کہ بلوچی زبان ءِ لکّانی ھساب ءَ مرواردیں گال گار ءُ بیگواہ بیتگ اَنت. ھمے گاریں گالانی جاہ دری گالاں گپتگ. اگاں ھمے داب ءَ مئے گال چیر بہ ترّ اَنت. گُڑا مئے زبان گار ءُ بیگواہ بیت ءُ زبان کہ بیگواہ بیت گُڑا تئی راجی سسّا ءُ سما ءِ کندیل ھم کوردیم بیت. تئی راجی جھد، راجی پجّار ءِ دیمروی ءِ گام سُست ءُ نزور بنت. تئی راجی مارشت مران بنت. وھدے کہ تو اے جاہ ءَ سر بیت ئے بزاں کہ تو وت ءَ شُمشُتگ ءُ بیگواھی ءِ نیلبومیں زر ءَ بُڈّو وران ئے. جاور ترا ناچار کن اَنت کہ تو زوراک ءِ زبان ءَ ءُ دود ءُ ربیدگاں وتی بہ کن ئے ءُ زوراک بیت کنت کہ ترا پہ کُشگ بیگواہ کُت مہ کنت بلے زبان ءُ لبزانک ءِ کُشگ ءِ جھد ءَ کنت، پرچا کہ آ دلجم اِنت وھدے کہ راجے ءِ زبان شُت، دود ءُ ربیدگ ءُ دودمان شُت اَنت، آ راج گُڑا وت ءَ دیر ءَ زندگ داشت نہ کنت. زبان تئی زند ءِ آدینک اِنت، وھدے کہ آدینک پْرش اِیت گُڑا تو وت ءَ چار اِت ءُ پول اِت نہ کن ئے.

وتی اسلی دروشم ءَ وت ءَ ندارگ کُت نہ کن ئے، پرچا کہ زند ءِ آدینک پْرشتگ. ھمے واست ءَ زانتکار ءُ کواس گْوش اَنت کہ لبزانک ءُ دود ءُ ربیدگ راجانی آدینک اَنت. راجانی دیمروی ءِ رھبند اَنت. بلوچی زبان ءِ شائری، بتل گنج، چاچ، گیدی کسہ ءُ ساز ءُ زیمل تئی راج مڈّی اَنت. تئی گْوست، تئی مروچیگ ءُ تئی باندات ءِ جھگیر اَنت. اگاں اے راج مڈّی چہ ترا شُت اَنت بزاں کہ تئی زانشت ءُ تئی پجّار ھم شُت اَنت. زبان اے کُلّیں راجی مڈّیانی کلیت اِیت. زوراک ءِ مستریں جھد تئی زبان ءِ بیگواہ کنگ اِنت. بلوچی زبان ءِ رژنائیں آکبت گوں بلوچی لبزانک کار ءُ زبان دوست ءُ راج دوست ءُ ورنائیں وانندہ گل ءُ رژنا پگر ءُ کواسیں ءُ دپتر زانت ءُ بلوچی زبان ءِ ادارہ تئی جھد ءِ چمدار اَنت. باید اِنت کہ زبان ءِ جھد ءَ لس مھلوک ھمکوپگ ءُ ھمسنگر ءُ ھمپرّگ بہ بیت. اے دگہ چیزانی سر ءَ اکتلاپ بیت کنت، بلے باید ایش اِنت کہ زبان ءِ بابت ءَ اکتلاپات مہ بیت کہ زبان تئی پدریچ ءِ باندار اِنت. باندات ءِ جھگیر اِنت. بلوچی زبان ءِ آکبت ھما وھد ءَ رُژنا بیت کہ زبان ءِ گپ ءُ گال‌کنوک یکدست ءُ تپاک بہ بنت ءُ زبان ءُ لبزانک ءِ ارزشت ءُ بستار ءَ پوہ بہ بنت. زبان ءِ گار ءُ بیگواہ کنگ ءِ دیم ءَ بندے جوڑ بہ کن اَنت. اے دْرچ ءَ ندکار ءُ لبزانکی مھلوک بلوچی لبزانک‌کار ءُ ادارھانی بلاھیں کردے بیگ لوٹ اِیت.

بنگالی ورنایاں ءُ وانندھاں پہ زبان ءِ ھاتر ءَ وتی سرانی دیمونی دات ءُ زوراک ءِ پرئونی لشکر تیر باران کُت. بلے وتی زبان ءُ ڈیھ چہ زوراک ءَ آجو کُت اَنت. آ راج زبان ءِ ارزشت ءَ زان اَنت. آ راجے کہ زبان ءِ ارزشت ءَ زانت گُڑا آ راج گلام نہ بیت. سیاست ءُ لبزانک جتائیں چیز نہ اَنت. زبان ءِ ھزمت ءُ زبان ءِ پولگ مستریں سیاست اِنت. بژنی گپ ایش اِنت کہ مئے مرچیگیں سیاست دان گیشتر زر ءُ مال مُچ کنگ ءَ اَنت. آپ ءُ نل ءُ دَگ بلوچ ءِ زلورت اِنت بلے بلوچ ءِ وتواکی ءُ پجّار ءِ مانزمان نہ اِنت. بلوچی ءِ آکبت ءِ مانزمان زانت اِنت، بلوچ ءِ لبزانک اِنت، بلوچ ءِ دودمان ءُ دود ءُ ربیدگ ءِ زندگ دارگ اِنت. زانتکارے گْوش اِیت «تاں وتی جند ءُ لبزانک ءَ رکّینت مہ کن ئے ترا ارزشت نہ بیت». زوراک ماتی زبانانی ازلی دژمن اِنت. باید اِنت بلوچ ءِ راجی ءُ آشوبی زبان بلوچی بہ بیت.

سرچمگ: سنگر


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *