شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (8 بهمن 1400/ 28 جنوری 2022) گۆں اێشی بیان ءَ که «اے مئے اگده انت که په وتی ءُ وتی لۆگمانانی رکێنگ ءَ شه الله ءِ عذاب ءَ جهد کن اێں» په زهگانی اسلامی ءُ اخلاقی تربیت ءُ اپسله ءَ ءُ همےپێم پله‌مرزی شه آوان تاں علم کٹ انت ءُ کاربلد بےانت، سکّ سۆگه ئِے کرت.
په سنی‌آنلاین ءِ سرهال ءَ شیخ‌الاسلام مولانا عبدالحمید پد شه اے مبارکێں آیتے وانگ ءَ: «يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ» [تحریم: 6] درشان ئِے کرت: الله پاک ءَ ماں تحریم ءِ مبارکێں سوره ءَ مۆمنان ءَ گوشتگ که وت را ءُ وتی گس ءِ مردمان ءَ شه آچش ءُ عذابے که الله ءَ په کافر ءُ مجرماں تیار کرتگ، نگاه دار ات. پرےواستا ما اگده دار اێں که وت را ءُ وتی لۆگمانان ءَ شه الله ءِ عذاب ءَ نگاه دار اێں. الله ءِ حکم اے نه انت که ما تهنا په وتی بچێنگ ءَ جهد کن اێں ءُ شه وتی زهگاں بےترانگ به اێں.
واجه ءَ گێش کرت: زهگاں باید الله ءِ احکامانی رد ءَ کردار کن انت ءُ شه الله ءِ هبرنزوری ءَ پهرێز کن انت. دلگۆش کن اێں مئے سنگتاں کاهل نمازی مه کن انت. اے مئے اگده انت که پراواں دنیا ءُ آخرت ءِ فکر ءَ به اێں.
دارالعلوم زاهدان ءِ سرمستر ءَ گوشت: مسلمانان وتی زهگانی بارو ءَ دو اگده دار انت: یکے اێش انت که وتی زهگان ءَ شه اسلامی ءُ ایمانی لحاظ ءَ خب اپسله کن انت؛ آوان ءَ قرآن، نماز، رۆچگ، احکام ءُ صحیح ئێں باور ءَ یات دےانت. آ زهگان ءَ که توان انت مسیت ءِ آدابان ءَ کِمار کن انت، برےبرے مسیت ءَ بر انت تاں نماز جماعت ءَ گند انت ءُ گۆں احکامان درستی بےانت. آوانَ یات دےات که مردمانَ سلام دےانت ءُ احترام به هلّ انت. دگه چیز اێش که زهگاں باید آ چیزان ءَ که پراوان ماں دنیا ءِ زندگی ءَ لازم انت، یات گر انت ءُ زانتجاهی ءُ شریعت ءِ علومان ءَ دربر انت.
زاهدان ءِ جمعه ءِ خطیب ءَ درشان کرت: زهگانی اپسله شه کٹءُکار ءَ هم مهم تر انت. زهگان ءَ پله‌مرزی کن ات تاں علم ءُ کاربلدی کٹ انت. اگاں زهگاں انسانیت، آداب، مردمداری ءُ صله‌رحم ءَ یات گر انت اے پِسّ ءُ ماسانی ٹوهترێں ءُ گهترێں هنتکان انت. گهترێں زر آ نه انت که په نان ءُ پچ ءُ سواری ءَ هرچ بیت، گهترێں زر هما انت که په زهگانی سوات ءَ هرچ بیت.
واجه ءَ درائێنت: اگه زهگان ءَ دلگۆش مه کن اێں و ماں چاگرد ءَ ویل بےانت، نشه‌ای، بےسوات ءُ جنگرهَ بے انت ءُ جنگ ءُ جێڑه جۆڑ کن انت. وهدےکه زهگان شه پس ءُ ماس ءِ نادلگۆشی ءِ سبب ءَ بےاپسله، بد تب ءُ بےدین ءُ راه‌جن بےانت، اے یک وڑ زهگے قتلے. بدترێں قتل هما انت که بچک ءُ جنکاں شه پس ءُ ماسے مهر ءُ اپسله ءَ زبهر بےانت و فاسد ءُ خراب بےانت.
واجه ءَ گێش کرت: اگاں مدام زهگان ءَ پنت ءُ سۆگه کن اێں، بلێن آوان مئے هبران ءَ دلگۆش مه کن انت، شاید مئے اگده هلاس بیت ءُ قیامت ءِ رۆچ ءَ که گلباگ ءِ نێمگ ءَ برو اێں آ زهگ مئے دێما مه گیت، ابید شه اێشی بچک ءُ جنکان شکایتَ کن انت که مئے پس ءُ ماساں گۆں ما وش تب نه بوتگ انت، وت نماز اش ونتگ ءُ ما را نمازے نێمگ ءَ فرمانش نه داتگ.
مولانا عبدالحمید وتی هبرانی دێمتر ءَ ورنائان ءَ سکّ سۆگه کرت که کارءُ دندا یات گر انت ءُ گوشت ئِے: ورنائان کار ءُ دندا یات گر ات، برق کشی، لوله کشی ءُ دگه کار ءُ ازمانَ یات گر ات تاں کارجاهاں شما را کار گر انت. واجه ءَ همےپێم پس ءُ ماسانَ سۆگه کرت که وتی زهگانَ کمک کن ات تاں کار یات گر انت، آوان ءَ ویل مه کن ات، آوان کار ءُ وانگے نێمگ ءَ تێلانک دےات، تاں علم کٹ انت ءُ کار یات گر انت ءُ په چاگرد ءُ استمان ءَ هزمت کن انت.
چمشانک