شیخ‌الاسلام مولانا عبدالحمید:

ذمه‌وارں په دێمداری شه مزن‌سسّائانی جهَگ ءَ شه ملک ءَ، جاور ءَ بدل کن انت

ذمه‌وارں په دێمداری شه مزن‌سسّائانی جهَگ ءَ شه ملک ءَ، جاور ءَ بدل کن انت

شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (24 دی‌ماه 1400/ 14 جنوری 2022) په مزن‌سسائانی جهگ ءَ شه ملک ءَ وتی بژن ءَ درشان کرت ءُ اقتصادی ءُ رۆزیگی مشکلان ءَ یکے شه اێشی سبباں زانت ئِے ءُ شه ذمه‌وارانی لۆٹ ات په اے مشکل ءِ حل کنگ ءَ جاور ءَ بدل کن انت.

په سنی‌آنلاین ءِ سرهال ءَ شیخ‌الاسلام مولانا عبدالحمید درشان کرت: ارمان که اے رۆچان ملک ءِ رۆزیگی جاور باز سکّ بوتگ انت ءُ اے جاور ءَ په چاگرد ءِ وڑ وڑێں مردماں زندگی ءَ را باز سکّ کرتگ.

واجه ءَ وتی هبرانی دێمتر ءَ به مزن‍سسّائانی جهگ ءَ شه ملک ءَ اشاره کرت ءُ گوشت ئِے: هر ملک ءِ ٹوهترێں ءُ مهمترێں هنتکان آیی مردم انت ءُ هاس هما مردم که علم ءُ زانت دار انت ءُ ماں وڑ وڑێں بهراں کاربلد انت. آ ایرانیانی جهگ که علم ءُ زانت ءُ کاربلدی ءِ واهند انت ءُ شه ملک ءِ ءُ بیت‌المال ءِ هنتکاناں پراواں هرچ بوتگ تاں په ملک ءَ هزمت کن انت، پراستی که په ملک ءَ ٹوهێں نقصانے.

زاهدان ءِ امام جمعه ءَ گوشت: ملک ءِ جاور باز خراب انت ءُ بازێنے شه مزن‌سسائان شه ملک ءَ جه‌انت، پرێشی باید ذمه‌واراں اے بن‌گپ ءَ دلگوش کن انت ءُ جاور ءَ بدل کن انت. یک رۆچے من یک وسی ئێں شخصے را سۆج کرت که پچے مزن‌سسائان شه ملک ءَ جه‌انت؟ گوشت ئِے یک زمان ءِ منی ماجب پانزده ملیون ات که برابر ات گۆں پانزده هزار دلار ءَ، بلێں نون منی ماجب سی ملیون انت که برابر انت گۆں هزار دلار ءَ؛ آوان که وس ءُ کاربلدی ءِ واهند انت چۆن ءَ توان انت گۆں اے جاور ءَ ملک ءِ تها نند انت؟!

مولانا عبدالحمید گوشت: سرجمێں زهرشانیانی که شه وانێنۆک، بازنشست ءُ قاضی ءُ چاگرد ءِ وڑ وڑێں پاٹیانی نێمگ ءَ بوتگ انت، پهکانی سبب اقتصای ءُ رۆزیگی سکّی بوتگ انت. اے مردم که زهرشانی ءَ کن انت «مغرض» نه انت ءُ دشمن آوان ءَ نه شۆرێن ایت، گواچن اێش انت که استمان شه رۆزیگ ءِ بابت ءَ باز گۆں سکّی ءَ دێم په دێم انت.

واجه ءَ گوشت: رۆزیگی مشکلان شه ملک ءِ باز مهمێں مشکل ءُ لس مهلوک ءِ لۆٹان انت که باید ذمه‌واراں پراوان توجیلی درگێج انت.

🔹 نونێں دولت وتی اقتصادی وعدهانی سر ءَ عمل کنت

شیخ‌الاسلام مولانا عبدالحمید شه ملکی زرے بےارزشت بیگ ءَ وتی بژن ءَ درشان کرت ءُ گوشت ئِے: ایرانی زرے حق اے نه ات که اینکس بےارزشت بیت ءُ شه بازێن نادارێں ملکانی زراں هم بےارزشتر بیت. به هر حال اے ملک ءِ زر انت ءُ مئے اعتبار انت، باید ارزشتِ گێش بیت.

واجه ءَ درشان کرت: نونێں دولت باید وتی رۆزیگی وعدهانی سر ءَ عمل کنت ءُ ملکی زرے ارزشت ءَ بر گردێنیت، اے یک ملکی ءُ مردمی لۆٹے.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *