مروچی : 29 فروردین , 1400
مولانا عبدالحمید ماں زاهدان جمعه نمازے دیوانا:

الله ئے احکام ۆ رهبندانِ رد ءَ کِرد کنگ انسان ءِ هستی ئے تها ٹگلَ کار ایت

الله ئے احکام ۆ رهبندانِ رد ءَ کِرد کنگ انسان ءِ هستی ئے تها ٹگلَ کار ایت

 شیخ‌الاسلام مولانا عبدالحمید ماں زاهدان جمعه نمازے دیوانا (27 فروردین 1400/ 16 اپریل 2021) ءَ گوں اشاره به اسلامی شریعت ءِ احکام ۆ فرایضان تأثیران ماں انسان ۆ چاگرد ءَ «باور ماں الله ئے یکویی ۆ پێغمبران رسالت ۆ آخرت ءَ» ۆ «الله ئے احکامان رد ءَ کرد کنگ ءَ» را شه الله ئے مهم اێں رهبندان په انسانے معنوی اێں اپسله ءَ زانت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: الله تعالی ءَ په انسان ءِ جان ۆ روح ءِ اپسله ءَ رهبند درگێجتگ، په انسان ءِ جان ءِ رۆدێنگ ءَ وڑ وڑێں ورگی چۆ میوگ، شیر ۆ گۆشت ۆ دگه چیزانَ جۆڑِ کرتگ ۆ په انسانے روحَے اپسله ءَ هم پیامبرانَ ۆ آسمانی اێں کتابانَ دێمِ داتگ. هماپێم که انسان ءِ بدن گوں ورزش ءَ سکّ ۆ وشَّ بیت، روحَے اصلاح هم گوں وڑ وڑێں معنوی اێں رهبندان جوڑَ بیت.

واجه ءَ الله ئے تیوگێں رهبندانَ انسانے اصلاحے سوَب زانت ۆ درشانِ کرت: الله ئے پهکێں رهبندان چۆ ایمان، الله ئے یکّویی، باور به آخرت ءَ ۆ باور به پێغمبری ءَ انسانے هستی ئے تها ٹگلَ کار اَنت، برزترێں تربیت ۆ اپسله راستێں باور اِنت ۆ  تیوگێں احکامان په انسانے اصلاح ءَ اَنت.

زاهدان جمعه ئے اماما گوں اشاره به نماز ءِ تأثیر ءَ ماں انسان ءِ اصلاح ءَ گوشت: نماز یکے شه الله ئے مزنێں رهبندان په انسان ءِ اپسله ءَ انت؛ نماز تواضعَ کار اِیت ۆ رهوت ءَ گوں الله ءَ جوڑَ کنت، الله ئے مزنی ۆ محبت ءَ دلان تها کار ایت ۆ سوَبَ بیت که انسان شه الله ءَ تُرسیت ۆ گناه ۆ رڈِّیانَ ویل کنت.

واجه ءَ وتی هبران دێمترا گوشت: زکات هم چۆ نماز ءَ انسان ءَ اصلاحَ کنت؛ زکات انسان ءَ شه مال ۆ مقام ءِ دۆستی ءَ رکّێنیت ۆ شه گناهان پاکَ کنت و سوبَ بیت که بێوسان آیر ءَ دعای خێر کن اَنت.

مولانا عبدالحمید رۆچگ ءَ را یک دگرے شه الله ئے مهم اێں رهبندان په انسانے اپسله ءَ زانت ۆ گوشتِ: رۆچگ یکے شه دین ءِ مهم اێں رکنان ۆ الله ئے بےجوڑه اێں رهبندان په انسان ءِ اپسله ءَ اِنت. رۆچگ ءِ ماه بزان گناه ۆ درۆگ ۆ بےپۆکێں کاران تعطیلی. الله تعالی ءَ ماں رمضان ءَ انچێں جاورے جۆڑ کرتگ تاں بندگان گشنگی ۆ تنّگی ءَ پجّ اَنت ۆ گۆں دوری شه گناهان وت ءَ اصلاح کن اَنت. الله تعالی ءَ په رمضان ءَ شۆکێں رهبند چۆ تلاوت، درود، ذکر، صدقه ۆ رۆچگ ءَ را تیار کرتگ.

واجه ءَ گێش کرت: اےوڑ مه بیت که مبارکێں رمضان ءِ ماها شپان گوں بےپوکێں دیوان ۆ تلویزونے چارگ ۆ رۆچانَ گوں واب ءَ گوازێں اێں؛ اے وڑێں رهبندان گوں الله ئے اصلاحی اێں رهبندان جوڑ درَ نیا اَنت.

دارالعلوم زاهدان سرمستر ءَ گێش کرت: واجه رسول الله صلّی‌الله‌علیه‌وسلم ءَ رمضان ءَ دعا ۆ نماز ۆ تلاوتانَ گێشَ کرت، آ واجه ئے سیرت په امّا گهترێں نمونگ اِنت، شپان بوَسپ اِت، اگه سێرواب نه بوت اِت، گڑا رۆچ ءَ وتی واب ءَ پوره کن اِت، رۆچا الله ئے رحمت اێر کاینت، نند اِت قرآن ءَ تلاوت کن اِت، کٹ‌ۆکارے پدا برو اِت، وهدےکه واب شه زلورت ءَ گێشتر بیت اسرافَ بیت ۆ دلانَ سکَّ کنت.

مولانا عبدالحمید گوں اشاره به ماه رمضان ءِ فلسفه ءَ درشانِ کرت: الله تعالی ءَ مشما را رۆچگ ءِ ماها «تشکیل» کرتگ تاں شه اے ماها په رۆچگ ءَ پد توشگ ۆ هدایت ۆ تقوا زورێں، ما باید به الله ئے کتاب ۆ پێغمبرے سنتان لچێں تاں اپسله ۆ اصلاح به اێں.

🔹 کرونا ۆ دگه سکّیان پرێشی اَنت که ما را سرپد کن اَنت تاں شه گناه ۆ بےترانگیان توبه کن اێں

زاهدان جمعه ئے اماما درشان کرت: دنیائے تیوگێں سر ۆ چێران آزمود انت ۆ پرێشی انت که انسان ءَ اپسله کن اَنت تاں انسانان توبه کن اَنت ۆ الله ئے کانودانِ هلاپ ءَ مه کن اَنت. وهدےکه ما وتی پادا شه وتی کۆنٹ ءَ تچکتر کن اێں گڑا الله سکّے ۆ آفتَ کاریت تاں ما را سرپد کنت که الله ءَ بےهیال مه کن اێں ۆ بندگانِ حقانَ پادمالی مه کن اێں.

شیخ‌الاسلام مولانا عبدالحمید درشان کرت: بازێنے شه کارزانتان ٹگارے گرمی ۆ دگه آفَتّان سبب ءَ شه گلخانه ای اێں گازان ۆ کارگسانَ زان اَنت، اے کارزانتان پچے اے آفت ۆ ڈکّال ۆ کرونا ۆ بےکساسێں گرمی ۆ سردی ۆ دگه سکّیان سببانَ نه گند اَنت؟ معنوی اێں کارزانتان که الله ئے حکمتانَ زان اَنت کجا اَنت که اے سکّیانِ معنوی اێں سببانَ بیان کن اَنت؟ پچے دنیائے کوّاسان به قرآن ۆ رسول الله ۆ معنوی کارزانتانِ توارا دلگوشَ نه کن اَنت؟!

دارالعلوم زاهدان سرمستر ءَ گوں اشاره به سکّیانِ سبب ءَ گوشت: الله تعالی ءَ ظاهری اێں اسبابانَ هور کرتگ، بلێں بےهیالی شه الله ءَ، انسانان هبرنزوری شه الله ءَ، ظلم ۆ اَبرم/ فطرت ءِ هلاپ ءَ کردار کنگ ءَ اے سکّیانَ جوڑ کرتگ. وهدےکه انسان ابرم ءِ هلاپ ءَ کِرد کنت الله تعالی ماں زندگی ءَ مشکلات ۆ سکّیَ کاریت.

مولانا عبدالحمید گوں اشاره به اے سکّیانِ تۆجیلان گوشت: الله پاک ءَ تیوگێں مصیبتانَ گوں انسانے کرداران لچێنتگ ۆ غیر شه الله ءَ دگه پناه جای نێست. رکێنگ ءِ راه اێش اِنت که الله ئے باهوٹ به اێں، سردی ۆ گرمی ۆ دگه آفتّان شه الله ئے نێمگا اَنت تاں ما را سرپد کن اَنت. اگه ما په دل توبه کن اێں ۆ گرێوگ ءِ توار شه گس ۆ مسیتان چست بیت الله تعالی بےکساس مهربان ۆ زبرێں رحم کنۆکے گڑا کرونا ۆ دگه سکّیانَ چستَ کنت.

🔹درّێن مردمان به آچاوگ ۆ بدێں تبلیغاتان دلگوش مه کن اَنت ۆ دارالعلوم زاهدان ءَ ماں آیی مالی اێں هرچان مدت کن اَنت

شیخ‌الاسلام مولانا عبدالحمید وتی هبرانِ گڈسر ءَ مسیت ۆ دینی وانگجاهانَ «امنیت، یکویی ۆ خێرے بنجاه» زانت ۆ په مالی اێں پله‌مرزی شه اے بنجاهان تأکید کرت و گوشتِ: رۆچگ ءِ ماها بےوس ۆ نادارانَ بےهیال مه کن اِت. هاس به دارالعلوم زاهدان که به برکت مولانا عبدالعزیز، آیی بن‌هشت اێرکنۆکے دعائان ۆ آدگه همرئشان جهدان ۆ مردمانِ مادی ۆ معنوی اێں پله‌مرزیان به یک جهانی اێں بنجاهے بدل بوتگ، دلگوش کن اِت.

زاهدان جمعه ئے اماما گوشت: مردمانِ مَدَت باز هژدی و مهم اِنت. درّێں مردمان آچاوگ ۆ بدێں تبیلغاتانَ مه مَنّ اَنت که شَنت دارالعلوم زاهدان به مالی اێں کمکان نیاز نه داریت. دارالعلوم زاهدان شه هچ دولتے یک ریالے همَ نه گیت. مئے باور اێش اِنت که همے پوریاگِر ۆ کارمند ۆ سۆداگر ۆ بزگر ۆ مالدار ۆ وڑ وڑێں پاٹیان باید به مسیت ۆ وانگجاها کمک کن اَنت که همێشی تها خێر ۆ برکت اِنت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *