شیخالاسلام مولانا عبدالحمید مان زاهدانِ جمعه نمازے هبرانِ تها (3 مرداد 1399) ذیالحجهوی ائولی ده روچا را په دنیاوے تیوگین مسلمانان یک بےجوڑئین وارے زانت ؤ شه اے روچان برکاتانِ کارمرز کنگا تأکید کرت.
په زاهدانِ اهلسنتے جمعهوی پیشنمازے دفترے هالرسانیئے سرهالا، مولانا عبدالحمید شه مبارکین «فجر» سورهوی ائولیئین آیاتانِ وانگا پد درشان کرت: گیشترین مفسر و شوهازکارانِ دیدانک همیشنت که «لیال عشر» مه فجر مبارکین سورهوی تها هما ذیالحجهوی ائولی ده شپ انت.
واجها گیش کرت: الله تعالی مه اے سورهوی تها به ذیالحجهوی ائولی ده شپ ؤ اعیدے روچا که حجے برجمدارگے روچنت سوگند وارته. شه اودا که اللهئے رحمت و فضل پراهمَنجِنت اے روچانَ نه تهنا په حاجیان، بلکین په گرد اللهٔ راهے رئوکان، مؤمنان ؤ آوان که جَدُ وَلَّ کننت که به الله ؤ دو دنیاوے سوبمندیا رسنت، بےجوڑئین وارےءِ داته.
واجها دیمترا گوشت: عبادتے مُزّ مه اے ده رؤچان تها شه جهاد مه اللهئے رها هم گیشترنت. رؤچگ هم اے روچان تها بازین مزے داریت که به دگه روچان اے ثوابَ نرسیت. عرفهوی رؤچے رؤچگ دو سالے رؤچگے اندازهوا ثواب داریت. اے رؤچ، قرآنے وانگ ؤ ذکر ؤ نماز ؤ صدقه ؤ خیرات ؤ تکبیرے روچنت. جنین ؤ مردین تکبیرات تشریقانَ که شه نهم ذیالحجهوی صهبا شروعَ بَینت، بواننت. البت تکبیرات تشریقان گوشتن (الله أکبر، الله أکبر، لا إله إلاالله، الله أکبر، الله أکبر و لله الحمد) په میتگانِ مردمان که اؤدا نماز جمعه ؤ اعید وانگ بیت واجبنت.
زاهدانِ جمعهوی پیشنمازا گوشت: اے روچان بےوس و صغیر ؤ بندیگانِ خانوادهئانَ دلگوش کنن ؤ په بےوسان نوکین پچ برن ؤ اعیدے روچا آوانِ سرا که چیزے ندارنت نان ؤ گؤشت بهر کنن.
ـ مئے جندے کرداران ما را شه حجا پدا پرینته
مولانا عبدالحمید وتی هبرانِ دیمترا به امبرانیئین حجے ساتے تنک بیگا به سوَب ویروس کرونای تالان بیگا مان دنیاوا اشاره کرت ؤ گوشته: امرانیئین حج په کروناوے سوبا گوں مشکل ؤ تنک بیگا دیمپهدیم بوته. بازین حاجیئے که بائد نون اللهئے گسے کنکّا بوتےننت شه حجے ساتا پدا منتَگَنت. ائشی ٹوهین پریشانیئے مان اسلامے دنیاوے تها جوڑ کرته. مروچی عرفات، منا، مزدلفه، مطاف، مسجدالحرام و مسجدالنبی هلوتَنت.
واجها درشان کرت: مزنین هبر ائشنت که مئے کردار سوب بوته که شه حجا پدا کپن. «کرونا» آپت و سوبے که الله آیرا چَرّےنیت ؤ بندگانِ نیمگا دیمے دنت، بلین قرآن دیمپهدیما شیت که گِردِ آپت انسانے جندے کردارے آسراتنت. الله پرمایشَ کنت: «وَمَا أَصَابَكُمْ مِنْ مُصِيبَةٍ فَبِمَا كَسَبَتْ أَيْدِيكُمْ» [شوری: 30] پمیشا پهکین آپت و سکیوسؤریانِ سوب انسانے هبر نزوری ؤ ٹگی ؤ نادلگوشی ؤ گناه ونت.
ـ وهدے که ما کروناوا وتی گناهانِ آسرات زانن ؤ توبه کنن، الله اے آپتا زوریت
مولانا عبدالحمید وتی هبرانِ دیمترا درشان کرت: الله اگه لوٹیت توانت که کرونا و زمینچنڈ ؤ سیل ؤ ڈکّال ؤ دگه آپتانِ دیما گیت، بلین الله گون اے آپتانِ آرگا لوٹیت که بندگ دلگوش کننت ؤ سار کننت که کرونا ؤ دگه آپتانِ درمان، برگشتن په اللهئے نیمگائنت. الله پرمایشَ کنت: «فَلَوْلا إِذْ جَاءَهُمْ بَأْسُنَا تَضَرَّعُوا وَلَكِنْ قَسَتْ قُلُوبُهُمْ وَزَيَّنَ لَهُمُ الشَّيْطَانُ مَا كَانُوا يَعْمَلُونَ» [أنعام: 43]
واجها گیش کرت: نونین جاورے تها بائد ما گرد وتی زندگیا شه سر نوک اصلاح کنن ؤ جامعهوے تها جار جنن که کرونا گندگین آپتے ؤ مردم بائد توبه کننت، صدقه دینت ؤ وتی ویلین کردارانَ بدل کننت.
مولانا عبدالحمید گوشت: اگه اے روچانِ تها بےسد نندن دلان سکّترَ بینت ؤ آ وهدا بیتکنت که ٹوهترین آپتے بَیت یا کرونا ته چنکه سال مانیت. کروناوا وانگگس ؤ دربرجاهانَ تعطیل کرته، به زانش ؤ اقتصاد ؤ جاندراهیا نقصانِ رسئنته ؤ هزاران سُهبدهین انسانا را شه مئے گپته ؤ اگه انگت مانیت کےیه توانت آیرا شه امّا دور کنت؟
ـ زاهدانِ اهلسنتے ٹوهین اعیدے نماز گوں بهداشتی پروتکلانِ رعایت کنگا برجمدارگَ بیت
شیخالاسلام مولانا عبدالحمید وتی هبرانِ گُڈی بهرا شه زاهدانِ اهلسنتے ٹوهین اعیدے نمازے برجم دارگا «گوں بهداشتی پروتکلان رعایت کنگا» سهی کرت ؤ گوشته: یکے شه باز جوانین پیشامدان مان دنیای اسلاما ائشنت که اے سالا گِرد مسلمان ٹوهین اعیدا هم چو گونڈین اعیدا یک گشتا اعیدَ کننت.
واجها تاکید کرت: شه تیوگین نمازوانوکانَ لوٹین که وهدے که په نمازا کاونت وتی دپ ؤ پؤزانَ گوں ماسکا بندنت ؤ بهداشتی سهگهئانَ رعایت کننت، شه گْرؤپ بیگا مان اعیدگاهوے درانِ دپا پهریز کننت، پچے که گرؤپ بیگ یکے شه اے ناجوڑییے مهمین سوَباننت.
دارالعلوم زاهدانِ سرمسترا گوشت: منی سهگه به درین مردمان ائشنت که اعیدے روچان شه هر وختَے گندؤنندان پهریز کننت ؤ حتی په وتی پس ؤ ماسے گندگا هم مرّونت. حالے سوج کنگ ؤ «حق بَهِلّییے» دودءُربیدگ گوں گوانک ؤ اینترنتا همَ بیت.
مولانا عبدالحمید وتی هبرانِ گُڈیا جار دات که اهلسنتے ٹوهین اعیدے نمازے دیوان مان زاهدانا ساعت 6:15 شروعَ بیت ؤ نماز ٹک 7:45 وانگَ بیت.
چمشانک