شیخ‌الاسلام مولانا عبدالحمید ماں یک بهرے شه وتی هبران به اهل‌سنتے جمعه نمازے دیوانا (25 بهمن 1398) گوں اشاره به گچینکاری‌یے تبلیغاتے روچان په پارلمانے یازدهمین گشت شه گچینکاریا، گِردانَ به مکارم اخلاقی‌یے ساتتنا توصیه کرت ؤ کاندیدا ؤ آیانِ دؤزواهانَ شه دروغ و بِنڈا په یکےآدگرا مکنِ کرت.
شه زاهدانِ اهل‌سنتِ جمعه پیشنمازِ دفترِ حال‌رسانی حالا، مولانا عبدالحمید درشان کرت: اے پارلمانے گچینکاری‌یے تبلیغاتے روچنت، اپسوزنت که اے روچان درؤگ و بِنڈ په یکےآدگرا بازَ بیت. واجها گوشت: اپسوزنت که مے جامعه‌ئے توکا رِڈّین کردار باز بوتگنت ؤ جْوانین کردار کَپتگَنت. وهدے که مسلمانان قرآن ؤ سنتے تعالیمانَ گوں وت دارنت باید آیان معلم اخلاق بوتێننت ؤ دگران آیانَ گام‌گیج گِپتێن. بداخلاقی ؤ رڈّین کردار ٹوه‌ترین خطرے که اسلامی ؤ بشری جامعه‌یا تهدیدَ کنت.
زاهدانِ جمعهٔ پیشنمازا گێش کرت: گچینکاری‌یے تبلیغاتے وهدا نباید درؤگ گوشگ بیت ؤ نه درؤگێن قول ؤ وعده داتگ بیت ؤ شه افترا ؤ بِنڈا هم پلگار بیت.
چین دولت ظلما شه آ ملکے مسلمانانِ سرا زوریت
زاهدانِ اهل‌سنتے جمعه‌ی پیشنمازا وتی هبرانِ دێمترا گوں اشاره به ویروس کروناوی تالان بیگا به چین تها گوشت: ما باز اپسوزَ ورَن که ویروس کروناوی ناجوڑی‌یا چین مردمانَ گِپته. اے ناجوڑیا بازینے شه چین مردمانَ گپته ؤ پهکێن باپار ؤ بےباپارین پروازانِ دێم گرگ بوته ؤ آ ملکے مردمانِ زندگی‌یے رهبند خراب بوته.
واجها گێش کرت: مے یقین و گشترێن گَت اێشنت که اے ناجوڑی‌یے تالان بیگ به چین آ ظلمے سٹّنت که آیان به آ ملکے کمّین مسلمانان، خصوصاً استان سین کیانگِ مسلمانان سرا کرته.
دارالعلوم زاهدان سرمسترا گوشت: چین سرؤکان په اعتقادے واستا مسلمانانِ سرا ظلم کرته ؤ انسانی حقانه آ ملکے تها پادے چیرائش کرته، ظلمے آسر اللهٔ هژم ؤ آکڑ اِنت. مولانا عبدالحمید درشان کرت: مے کُله په چین مردم ؤ سرؤکان اێشنت که ظلما شه آ مسلمانانِ سرا زورنت ؤ آ مسلمانانَ که به زؤرین اردوگاهانِ تها بندیگ انت ؤ آ زهگانے که شه پت ؤ ماتان جتایش کرته ویل کَننت. واجها دینی ؤ مذهبی آزاتیا هر انسانے حق زانت ؤ گوشته: اے هر انسانے حق اِنت که دین ؤ عقیده‌وے گچینے تها آزات بیت ؤ هچّ کس حق نداریت اے بابتا دخالت کنت.
مولانا عبدالحمید گوشت چین دولت وتی اے سیاستا گوں مسلمانان بدل کنت. اگه آ دولت بندیگێن مسلمانانَ ویل کنت ؤ ظلما شه آوانِ سرا زوریت ما ؤ درستین مسلمانان دعاءَ کنن دان الله وتی اے عذابا که ویروس کرونا بیت شه آوانِ سرا زوریت ؤ آ ملکے مردم به وتی دندا ؤ زندگی‌یے سرا بِرگردنت.
جماعت تبلیغے کار، یکے شه هما پاکترێن دینی ؤ اصلاحی‌ئین کاراننت
زاهدانِ اهل‌سنتے جمعهٔ پیشنمازا گوں اشاره به بعضے ملکانِ تصمیما په جماعت تبلیغے کارانِ دیم‌گرگا گوشت: اپسوزَ ورن که بعضے شه ملکان ائولکی‌ئین تصمیمَ گرنت که جماعت تبلیغے دێما گرنت، وهدی که یکے شه گهترێن کاران به اے قرنا ماں اسلامی ملکان تها جماعت تبلیغے کارنت. واجها گێش کرت: جماعت تبلیغے کار گوں سنتا چپ نهنت ؤ آیی اصلی‌ئین مقصد اێشنت که مسلمانان به قرآن و سنت ؤ عمل به شریعتا برگردنت. اے جماعتے شعار اێشنت که اول وت به دینا عمل کنت گوڑان دگرانه دعوت دنت که به دینا عمل کننت. واجها گوشت که جماعت تبلیغے کار تهنا اصلاحی‌ئین کارے و هچّ دخالتے به سیاستا نداریت.
دارالعلوم زاهدان سرمسترا گوشت: اے تصمیمانَ که بعضی وختا گرنت اێشرا نشانَ دنت که آوان شے جماعتے مقصدا ناسهی انت. جماعت تبلیغ یکے شه حقین راهاننت ؤ مخالپت گوں حقے راها شه هرکسے نێمگا بیت بدێن آسرے داریت ؤ الله‌ئے ناراضگیا هم پدا داریت.
چمشانک