مولانا عبدالحمید وتی هبرانه اول سرا به جنوب بلوچستان سیلے تاوانان اشاره کرت ؤ گوشته: جنوبے گوستگین هپتگے اور لهتین منطقهوی تها به 200 ؤ 250 میلیمترا رست که سیل و آپا بازین تاوانی به مردمان رسینت ؤ بازین گسے را ٹالینته.
مولانا وتی هبرانه دیمترا گوشت: نزّیک به نود درصد شه زرآباد باگ ؤ کشار ؤ آپیئین چاهانَ سیل و آپا خراب کرته. زرآباد ٹوهین موزے باگ داریت که پوره خراب بوتگنت ؤ آوانه میوگانه که چتنے وقتش بوته هم آپا برته، همےپيم آوانه پس ؤ مال و نپادانه خراب کرته ؤ آوان کریابنت.
واجه گوشت: بلوچستانے جنوبے باگ ؤ کشاران کشورے ٹوهین نیازبوندی دیماره گپته ؤ کشور به ای منطقهوے کشاورزی ؤ دامداریا نیاز داریت. په همے بابتا باید شه كشاورز ؤ مالداران حمایت ؤ پلامرزی بیت ته به گزایلکشی ؤ بیپؤکین شغل و کارانِ نیمگا مرّونت، په چے که پلامرزی شه كشاورز ؤ مالدارن، پلامرزی شه کشورنت.
مولانا شه مردمانِ کمکان باز خوشحال بوت و گوشته: الحمدلله که ایرانے مردمانِ تها یه هُب جوڑ بوته که به زمزلهجتگ ؤ سیلگپتگ ؤ دگه آسمانیئین بلاوانِ وقتا کمک کننت که یه باز جوانین چیزے. ایرانے مردمان پاری به کرمانشاه زمزلهجتگان ؤ گلستان سیلگپتگان ؤ لرستان ؤ دگه جاهان کمک کرت ؤ امبرانی هم به بلوچستانے جنوبے سیلگپتگین مردمان کمکش کرت که آوانِ کمک به همے نیمگا شئوگنت.
زاهدانِ مردمانِ پیشنمازا گوشت: بلین انون اساسیئین کمک نیازنت که مردمانِ ٹگار جوڑ بینت ؤ روستا و کشارانے که آپ ؤ سیلے دیماونت پراوان سیلبند جنگ بیت، رودانِ کرّا هم سیلبند جنگ بیت که اگه آپ باز بیت مردمانِ گس و کشارانه خراب مکنت.
مولانا عبدالحمید به کارانے که دولت باید آوانه کنت هم اشاره کرت ؤ گوشته: بعضی شه سنگینین کارانه که شه مردمانِ وسا درنت چو راه ؤ پل ؤ سدے جوڑ کنگ ؤ جادَهوانه آسفالت کنگ، دولتے بٹاونت. البته گوشته مردمه تواننت به ٹگاران ؤ سیلبندانِ جوڑکنگ و چاهانه جتنا کمک کننت و ماشین سنگین چو لدر و گریدور و بلدزر بیارنت یا وتی کمکانه به مؤسسه محسنینا که دارالعلوم زاهدان زیر نظرنت، رسیننت. واجه گوشت: لهتین سیلگپتگین منطقهوے مردم په ورگیئین آپا هم مشکل دارند ؤ هنچین وقتے بیت که یک ٹانکرے را په 200هزار تومنَ گرنت ؤ اورے آپ بےپوکا به دریابا رچیت.
دارالعلوم زاهدانے سرمسترا گوشت: سیلگپتگانِ مشکلانِ حل کنگ شه یک منطقه ؤ شهرے وسا درنت ؤ سرتاسريئين رمِّ لوٹیت.
ـ استانے مردمان شه شبکه هامونا گلگ دارنت
زاهدانے جمعه پیشنمازا گوشت: مردم شه شبکه هامونا گلگ دارند پچے که سیل گپتگانِ هالانه باز سست و ضعیف شینگه کنت. مردم انتظار دارنت که استانی شبکه یه موضوعا باز دلگوش کنت ؤ سیلے خسارتا پوره شینگ کنت ته تمام مردم سهی ببنت. واجه تأکید کرت که شبکه استانی ؤ شبکه ملی باید ٹوئین بهرے شه وتی پروگرامانه په همے موضوعا بلّنت.
چمشانک