واجه مولانا عبدالحمیدا ماں زاهدانِ جمعه (۱۱ مرداد ۱۳۹۸) ءِ گپانی یک بهریا، جوان و ورنا «چاگردِ افتخار» زانتنت و گوشتی: په ورنایاں احترام بِلّیں، گوں چُکّ و ورنایاں مهر و دوستی بکنیں، آیانا په تچکیں راهاں شون بکنیں. هما پیم که ورنایاں تُهک و شادی مان هما پیم په رهشونی و مهر و نرمیا وازمندانت، په ورنایانی کار و شغلا فکر کنگ ببیت.
واجها گوشت: ورنایاں اللهِ بندگیا بکننت و الله والا ببنت مئے سربلندی و افتخارِ سوبنت. علما، دانشگاهی، سرداران و کماشان و سیاداں بایدانت ورنایاں سرپد ببنت و په آیاں راهے به شوهازنت داں که آیاں زانتِ نیمگا برونت، کار و ازم و مهارت یاد بگرنت.
زاهدانِ اهلسنتِ آدینگِ اماما دیمترا چه سلاحِ بڈّ کنگا گپ کت و گوشتی: منی سفارش په ورنایاں اشنت سلاح بڈّ مکننت، چیا که ورنا وهدے که هژم گرنت کارچ زیرنت و په یکدگرا ارش کننت، البت اگه گوں وتا سلاح مزیرنت اگه پیشامدے بیئیت وتا را گوں مشت و لگت جننت و کسے کشگ نبیت که رندا په دو طرفا مشکلانے پیش بیئت.
قاتلانی سپرد په قاضیاں امنیتِ مدد بیت
واجه مولانا عبدالحمیدا وتی گپانی گڈی بهرا گوں اشاره په دو درگیریا که زاهدانا پیش آتکگنت و کُوش اش هم داتگ، «قاتلانی تھبیل کنگ په قضایی مقاماتاں» چه گهتریں کاراں زانت و گوشتی: دوشی نوکیں پیشامدے کپت که چند نفرا وتارا گوں چاقو جتگت، گوں بژن که یکے کشگ بوتگت، البت وشیں پیشامد اشَت که هنگتا چند ادارے نگوستگت که قاتل په مقامات قضائیا سپرد کنگ بوت. چند روچ پیسرا هم ماں یک درگیری یے که یکے کشگ و چند دگه ٹپی بوتگت، لهتے چه مجرماں مقامات قضاییِ سپرد کنگ بوتنت. اے وشیں گپے، چیا که امنیتِ کمکا هم کنت و هم بیمے په آ کساں که قتل و جرم کننت که بایدانت دهما مجرم گرگ و مجازات کنگ ببیت، جیلا بروت و یا قصاص کنگ ببیت.
دارالعلوم زاهدانِ سرمسترا گُڈسرا گوں اشاره په زاهدانِ مسجد مکیِ اڈ بیگِ بازیں وام و بدهکاریاں، چه زاهدانِ درائیں باشندهاں لوٹِت که په عیدقربانِ نمازِ وانگا هر نفرے «صدهزار تومانا» په مسجد مکیِ مددا خاص بکنت و گوں وتا په عیدگاها بیاریت.
چمشانک