مروچی :پنجشنبه, ۹ فروردین , ۱۴۰۳

عمران خان؛ چہ کرکٹِ بامردیا داں پاکستانِ مزن وزیریا

عمران خان؛ چہ کرکٹِ بامردیا داں پاکستانِ مزن وزیریا

پاکستانِ گچین‌کاری دیوانا گوں مزنیں چار و بیچّاریا رند، پاکستانِ مزن دیوان و ایالتی سرجمیں کرسیانی سوبمندیِ جار جتگ.
اے جارِ حالانی ردا انصافِ زرمبشت/جنبشا، گوں عمران خانِ رهشونیا پاکستانِ مزن دیوانِ (ملّی مجلس) گیشتریں کرسی (۱۱۶ کرسی چہ ۲۷۰ کرسیا) وتیگی کتگ. همے گلّ و زرمبشتا خیبر پختونخواهِ ایالتا گچین‌کاری تها گیش بوتگ و پنجاپِ ایالتا کہ گیشتریں مردم همے صوبہ تها اَنت چہ “مسلم لیگِ” گلا رند ایالتی گیشتریں کرسی (۱۲۳) کرسی سوب کتگ.
عمران‌خان پاکستانِ مردمانی خاطرا نوکیں کس و نامے نہنت. پاکستانِ مردم آئیا چہ میلادی هشتادِ دهکا جاه کارنت که آ وهدی تیم ملی کرکٹِ باسک بوتگ. آئیا سال 1992 ءَ وتی ملک (کشورِ) نام پہ کرکٹِ بامردی جاها (مقام قهرمانی) پہ دنیایا رسانتگ و وت هم مستریں نامے در آؤرتگ و پاکستان مردمانی دلِ تها جاگہ کتگ. عمران خانا چہ کرکٹِ بامرد (قهرمان) بیگا رند اراده کتگ کہ سیاستِ گران و بُرزَگ و جَهلگیں کِشکا وتی گاماں ایر بکنت. آئیا وتی وانگ و زانگ چہ پاکستانِ مستریں شهدربرجاهاں و برتانیایا در برتگنت. آئی وانگ سے بهر (رشتہ) علوم سیاسی، فلسفه و اقتصاد بیتگ، بلے پدا هم آ کرکٹِ بامرد (قهرمانِ) ردا جاه آرگ بیتگ.
عمران‌خانا ۱۹۹۶ سالا حزب «تحریک انصاف» پاکستانا جوڑ کت و وهدی سیاست‌مدار په چست و ایرا دعوت کتنت. آئیا چنت سال جدّ و جهدا رند سوبین بیت کہ سال ۲۰۱۳ گچینکاریاں خیبرپختونخواهِ ووٹاں وتی بکنت و یک تپاکی (ائتلافی) حکومتے اے ایالتا جوڑ بکنت. عمران‌خانِ گل (حزب) 2013 گچینکاریاں سوبین بیت کہ 48 کرسی خیبرپختونخواها وتی بکنت و اے کساس انّوگیں گچینکاریاں پہ 65 کرسیا رس اِتگ اَنت. 2013 ءِ عمومی گچینکاریاں تحریک انصافا 34 کرسی ماں پاکستانِ مزن دیوانجاها (پارلمان ملیا) وتی کت و انّوں چہ پنچ سالا رند سوبین بیت 116 کرسی ملّی دیوانا (مجلس) وتی بکنت.
بِلّی توریں عمران‌خان پہ دولتِ جوڑ کنگا گوں جنجالاں دیم پہ دیم اِنت، بلے چو بیت نکنت کہ آئی دعوادار (مخالف) پہ مزن وزیر (نخست وزیر) بیگا آئی دیما داشت بکننت. دو یکجاهیں گل (مسلم لیگ شاخه نواز و حزب مردم) که لوٹت اِش پہ عمرانِ ڈنّ کنگا یک زرمبشتے چست بکننت و پہ گچینکاریِ مزنیں دزّیا اعتراض بکننت و گچینکاریانی آسرا (نتایجا) مہ مَنّنت، بلے انّوں همے جار اِش جتگ کہ ما سوگندواری دیوانا (مراسم تحلیفا) بهر زیریں و چرے راها وتی اعتراضا رندگیری کنیں.
اے دوئیں گلا و حزباں ایالتی دیوانجاها پنجاپ و سندِ گیشتریں کرسی وتی کتگنت و نلوٹنت ایالتی واجهی (دولت) چہ آیانی دستا در بئیت. همے وڑا هنّیگیں گچینکاریانی جتائیں سوبمند هر یکے چہ دگریا رند گوں عمران خانا تپاک و هور بیگ اَنت تا چہ نوکیں دولتِ پرزونگا بهرَوے ببرنت کہ اے کار عمران خانِ دولتِ جوڑ کنگا آسانتر و وشتر کت کنت.
عمران خانِ سوبمندی پہ پاکستانیانی خاطرا اجکّہ و بهمانگی چیزے نہت آ پہ وتی رضامندانی دلا شَرّ و اصیلیں مردے بیتگ کہ گوں اداری و مالی فسادا جنگ و کُستی و آئی دیمگیر بیتگ و مردمانی آسودگی خاطرا جدّ و جهدی کتگ.
عمران‌خان گوستگیں وهدا آمریکا ءِ سیاستانی منتقدے بیتگ کہ هروهدا گوں “سی آی ای”ءِ بے مردمیں جنگی بالیگرابانی (پهپاد) حمله‌یاں مه پاکستانِ قبایلی مناطق تها تظاهرات و زهرشانی کتگ.
اے گل (حزبِ) لوٹوک و واهگداراں گوں یکجاه بیگ و شاهراهانی بندگا، تا کہ سے ماها نئیشتگ مزنیں تریلی و کامیون کہ جنگی اسباب اِش پہ ناتو گون بیتگ، ماں افغانستانا ببرنت.
آسر همے بیت کہ آئیا پاکستانِ پشتوانی دلاں جاگہ کت. حزب تحریک انصافِ شرتریں برورد وانگ و زانگ، جاندراهی و آسودگی پہ مردماں و دینی محافلِ تقابل نه کنگ، روچ پہ روچ اے حزبِ دوزواهانی صف دراج‌تر کت.
«جمعیت علمای اسلام» گوں مولانا فضل الرحمن ِ رهشونیا یکے چہ “تحریک انصافِ” نہ منّوکاں (مخالفان) اِنت بلے گوں اِشیا ماں ایالتِ خیبر پختونخوا “تحریک انصافا” گوں دینی دیواناں شرّیں نزّیکی یے برجم داشتگ و البتے مزنیں زرّے (بودجه) پہ «دارلعلوم حقانیه اکوره ختکا» بکش اِتگ.
بلّی توریں عمران خان چہ مولانا فضل الرحمنِ نیمگا پہ غربِ چالانی (سیاستانی) کاربندگا و “تحلیفِ” قانونِ بدلینگ و «سوگند پہ عقیده ختم نبوت» پہ مدامی چِست کنگا میاربار کنگ بیتگ، بلے گڈّ چہ نوازشریفِ ناسرجمیں جدّ و جهداں کہ پہ سوگندنامهِ بدلینگا، عمران خانا چہ آئیا نقد کتگ و آئی دیمگیر بیتگ. اے گپ هم گوشگ کرزیت که مولانا فضل الرحمنا باز رندا عمران یهودیانی کاسگ چَٹّ و آیانی بدل قرار داتگ کہ اے مردِ لوٹیت اسلامی قانونا پاکستانِ تها خلاص و چِست بکنت. پمشکا آئیا پہ عمران خانا ووٹِ دیگ «حرام» کتگ.

عمران خان ِ اولی لوگبانگِ پیرُک کہ سالِ ۲۰۰۴ ا آ جنینی طلاق کتگ، یهودی یے بیتگ. «جمائمه خان» که عمران خانِ دو چُکّ مات اِت چہ نکاحا پیسر جارِ جتگ کہ مسلمان بیتگ، بلے عمران خان انگت هم یهودی ئیں جنینِ گرگِ شگانا ورگ اِنت.
عمران خان پنچ سالا پیسر یکے، کہ چہ زورمندیں رهشونے قد و بالادا اپوزیسیونا ظاهر بیتگ. آئیا رند چہ “پاناما”ءِ سندانی پاشک کنگا کہ نواز شریف و آئی کهولِ غیرقانونی ملک و جاگاهانی پدّرائیا کنت، نواز شریفِ استعفا و آمیدگسا آئی پیش کنگِ لوٹی کتگ و اعتراضی رهگولی یے (راهپیمایی) پہ نواز شریفِ مخالفا بنداتی کتگ. گڈسرا نوازشریف گوں ارتشِ دیمپانی و چیریں واکانی زورا بے هِچّ نامینگ و چہ مزن وزیریا در کنگ و بندیگ کنگ بیتگ.
گوں برز ِ بیتگیں کارانی همراهیا، “تحریک انصاف” گوں اے وڑیں جاراں، درور: جنگ گوں نیزگاری و بیکاریا، پنچ میلیون لوگِ دیگ پہ بے لوگاں، مالیاتِ قانون ِ سَلّہ و پلگارگ، مِڑ دیگ گوں کارمسترانی مزنی کنگا (اشرافی گری) ڈنّی چالانی (سیاستانی) تها همّت و تعادلِ آرگ، آمریکا و همساهگانی ملکانی هور بیگا، اے پڑا دیما آتک و سوبین بیت کہ بازیں ورنائے چہ درمیانی چاگردا گوں وت هور بکنت و وتی نیمگا ببارت.
البتے اے وڑیں ریپینوکیں (فریبنده) جار (شعار) چہ دگہ گلانی (احزاب) نیمگا هم جنگ بیتگ ات، بلے مردماں آهانی کارکرد پیسرا دیستگ و آزمائینتگ اَت و آهانی کتگیں کار کمتر دیستگ اَت.
انّوں “توپ” «تحریک انصافِ» میدانِ تها اِنت تا وتی حکومتداری ازما پیش بداریت، خاصکار وهدے که زورمندیں واک چوکہ “فوج” هیال هم پہ اے گل (حزبا) گور انت و ظاهرا چه آیانی کار و جهداں راضیگ اِنت.
پاکستانِ مردم بازیں لوٹے چہ عمران خانا دار اَنت، گیشتر چه پهکاں وتی بےروزگاری اڑ و جنجالِ خلاص کنگِ امیدا کشّ اَنت.
آئیا هژدری اِنت آیوکیں پنچیں سالاں ملکِ گران و بازیں سّکیانی دیما اوشتات بکنت. ابید اے کہ عمران خان و چیریں زورمندیں واکانی هوری و تپاکی کمزور و سیاه ترّیت و عمران خان چہ سیاستِ پڑا در کنگ ببیت. اے پنچیں سالانی تها مولانا فضل الرحمنِ پیشگوئیانی راستی و میارباری کہ عمران خانا گوشتگ انتی پدّر بنت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *