پنجشنبه 16 اردیبهشت 1395 (27 رجب 1437) بازیں مردمے کساس 200 هزار نپر چه ایرانءِ مختلفیں ملک و دمگاں دور و دراجیں راهاں یهتگ اِتنت و دارالعلوم زاهدان، ایرانءِ اهلسنتءِ ٹوهتریں علمی و فرهنگی مرکزءَ مُچ بوتگ اِتنت تا دارالعلوم زاهدانءِ فارغالتحصیل و زانتدربرانی جشن و پاگبندی دیوانءَ بهر زور اَنت.
اِے مهمان چه ایرانءِ هر نیمگ خراسان و هرمزگانءَ بگر تا گلستان و کردستان، و دگه بازیں جاهے وت اِش زاهدانءَ سر کتگ اَت تا چه اے دینی و معنوی دیوانءَ بهر بزور اَنت.
اصلی پروگرام همیش اَت که اے دیوان پنجشنبهءِ سباهءَ بنگیج ببیت، بلے بازیں دیندوستیں مهمانےءَ وتءَ چهارشنبهءَ زاهدانءَ سر کرتگ اَت، پمشا دیوانءِ اولی بهر چه چهارشنبهءِ بیگاهءَ بنگیج بوت. واجه حافظ محمدکریم صالح و دگه بازیں واجهےءَ ماں همے بهرءَ په گوشداروکاں گپ و تراں کرت. و چنت سرود هں وانگ بوت.
دیوانءِ اصلی بهر
دارالعلوم زاهدانءِ طالبانی پاگبندی دیوانءِ اصلی بهر پنجشنبهءِ سباهءَ گوں واجه قاری گلمحمد سالارزهیءِ تلاوتءَ بنگیج بوت.
?«مولوی آصف احمدی»ءَ دارالعلوم زاهدانءِ زانتدربرانی بدلءَ په دیوانءِ نندوگاں گپ کرت. اے ورنائیں مولویءَ اولی مسلمانانی پیروزی و سوبیں بیگءِ سوب ماں قرآن و سنتءِ رندگیریءَ زانت و چه حاضرانی لوٹ اِت که آیانی گامیگیجءَ گام زور اَنت. رند چه اے واجهءِ گپاں «آوای اسلام»ءِ گروهءَ چه کُنَرکّءَ وتی سرود پیش کرت.
?ڈاکٹر «سید احمد هاشمی» جماعت دعوت و اصلاحءِ باسکءَ ماں وتی گپاں، ملکءِ قومی و مذهبیءِ دگری یک فرصتے زانت و په دگرانی مَنّگءَ تاکیدی کرت.
?«مولوی بهزاد فقهی» خراسانءِ وش گپیں مولوی، یکے دگه چه دیوان گپ کنوک و سخنرانان اَت. مولوی فقهیءَ په اسلامی فکر ءِ بارهءَ گپ کرت و «علامه اقبال لاهوری» و «علامه ابوالحسن ندوی» رحمهماالله، ئی دو مزنیں زانتکار زانت که په اسلامی امتءِ بیداری و آگاه کنگءَ باز جهد اِش کرتگ.
?یکے دگه چه دیوانءِ گپ کنوکاں «دکتر جلال جلالیزاده»، کردستانءِ پیشتری وکیل اَت. ڈاکٹر جلالیزادهءَ گوں اپسوز چه اسلامی ملکانی نگیگیں جاور و سکیں هالاتءَ «پچ ترگ په قرآن و سیرت»ءَ تهنائیں بچّگءِ راه چه اِے آپتاں زانت.
?اے واجهءَ گوں وتی وشهالیءِ درشاں کنگءَ چه دیوانءِ برجم داروکاں منتواری کرت و واجه مولانا عبدالحمیدءِ بارهءَ گوشتی: مسلمانان و ایرانءِ اهلسنت په واجه مولانا عبدالحمید ءَ پَهر بند اَنت.
?مولانا محمدعثمان، خاشءِ دینی مدرسه مدینةالعلومءِ کارمستر، دیوانءِ اے بهرءِ آخری سخنران اَت. واجه مولانا عثمان صاحبءَ گوں آیه آیه «فَإِنْ آمَنُواْ بِمِثْلِ مَا آمَنتُم بِهِ فَقَدِ اهْتَدَواْ وَّإِن تَوَلَّوْاْ فَإِنَّمَا هُمْ فِي شِقَاقٍ» صحابه ءِ ایمان، په دگرانی ایمانءِ قبولیءَ معیار و شاهیم زانت.
رند چِه مولانا محمدعثمانءِ گپاں، چَه 45 قرآن مجیدءِ حافظ و 10 قاری که تجویدءِ یکسالهایں دوره اِش در برتگ اَت، تجلیل بوت و داد/جایزه دیگ بوت اَنت.
دیوانءِ اولی بهر گوں واجه مولانا محمدانورءِ دعا و پریاتءَ هلاس بوت. همے بهرءَ آ واجهاں که نتوانتگ اِتش دیوانءَ حاضر بنت، پیگاماِش وانگ بوت اَنت.
دیوانءِ برجم داروکاں ظهر و عصرءِ در میانءِ وقت، په سبارگ و استراحتءَ خالی کتگ اَت.
?دیوانءِ دومی بهر
دارالعلوم زاهدانءِ طالبانی پاگبندی دیوانءِ دومی بهر رند چه عصرءِ نمازءَ گوں قاری اکبر موسیخانیءِ تلاوتءَ بنگیج بوت. رندءَ مولوی ضیاءالرحمن صحت و حافظ محمدعمر خَمّرءَ گوں وتی وشّیں گٹءَ سرودے وحدت و تپاکیءِ بارهءَ وانت.
?واجه مولانا مفتی محمدقاسم قاسمی، دیوانءِ اے بهرءِ اولی سخنران اَت، واجهءَ پیغمبرءِ سیرتءِ بارهءَ گپ کرت. مفتی قاسمیءَ په سکی و مشکلاتے که پیغمبرءَ دینءِ واستا کشّتگ اِتنت اشاره کرت و طائفءِ سفری یکے چه آیاں نام گپت. واجهءَ گوشت: اگه اللهءِ راهءَ هر سکی و مشکلے تحمل کن ایں، الله ما را عزتءِ برزیں جاهءَ رسینیت.
دارالعلوم زاهدانءِ دارالافتای کارمسترءَ، پیغمبر صلیاللهعلیهوسلمءِ سیرت، اعتدال و میانهرویءِ نمونه زانت و دوری چه پیغمبرءِ اعتدالی راه و رهبنداں تمامیں مشکلات و آپاتءِ سوب زانت.
رندچه مفتی صاحبءِ گپاں، واجه مولوی فضل الله رئیسیءَ سرودے بلوچی زبانءَ دپگال کرت.
?دیوانءِ گُڈی بهر
اے دیوانءِ گُڈی بهر رند چه مغربءِ نمازءَ گوں یک سرودے چه دارالعلوم زاهدانءِ طالبانی زانتدربرانی نیمگءَ بنگیج بوت.
رند چه سرودءَ مردمانی نعرهیانی در میانءَ واجه شیخالاسلام مولانا عبدالحمید په گپءَ اوشتات. تمامیں مردین و جنیں واجهءِ گپانی نیمگءَ دلگوش اِتنت.
?واجه مولانا عبدالحمیدءَ پیسر چه هرچیزے الله تعالی ئی شگر گپت که اے دیوانءِ برجم دارگءِ فرصتی داتگ ات. واجهءَ چه تمامیں عالم و زانتکاراں که ماں دیوانءَ بهر اِش زرتگ اَت منتواری کرت.
واجه مولانا عبدالحمیدءَ دیمءَ ماں وتی گپاں، اسلامءِ دین و قرآن و سنت، الله تعالیءِ ٹوهتریں نعمت زانت و تمامیں مشکلاتءِ سوَبی دوری و سرتاب دیگ چه قرآن و سنتءَ زانت. واجهءَ چه بانُکاں هں لوٹ ات که شیرزالانے چوش بیبی فاطمه و بیبی عائشه و دگه ازواج مطهراتءَ وتی نمونه و الگو کناَنت.
ایرانءِ اهلسنتءِ مزنیں عالم و زانتکارءَ ماں اے دیوانءَ چه اشی که شیعه و سنی وتءَ یکادگرءِ دژمن بزان اَنت گلّه کرت و صهیونیسمی، مسلمانانی ٹوهیں مشکل زانت. واجهءَ په اهلسنتءِ مشکلاتءِ حل بیگءَ تاکید کرت و گوشتی باید جهد بیت که مشکلات، گوں قانونی راه و رهبنداں گیشّینگ به بنت.
?دیوانءِ گڈی بهرءَ دارالعلوم زاهدانءِ 193 زانتدربرءِ سرءَ پاگ بندگ بوت. همے پیم ماں اِے دیوانءَ 133گهار که فاضله بوت انت و ده نپرءَ قرآن مجید در برتگ ات ناماش وانگ بوت انت.
دیوان گوں واجه مولانا عبدالحمیدءِ دعاءَ و پریاتءَ هلاس بوت.
چمشانک