ایرانءِ اهلسنتءِ دانشجو و زانشجاهی دَربروکانی دیوان پنجشنبه 20 اسفند 1394ءَ ماں دارالعلوم زاهدانءَ برحم دارگ بوت.
په ایرانءِ اهلسنتءِ هالرسانی سایتءِ هالکاریءَ ایرانءِ بازیں دانشجو و کالجی دربروکے گوستگیں پنجشنبهءَ ماں زاهدانءَ یهت اَنت و گوں عالم و زانتکاراں گِند و گدارش کرت.
اے گِندونندءِ اولی دیوان پنجشنبهءِ شپءَ گوں واجه حافظ محمد کریم صالحءِ گپاں بنگیج بوت. اِے تبلیغی واجهءَ ماں وتی گپاں گوشت: ما پهر بندیں که قرآن مجید و پیغمبرءِ سنتانی واهند اِیں، قرآن و سنت تمامیں مشکلات و آپتانی حل کنوک اَنت. تمامیں کائنات اللهءِ مخلوق اِنت و تا وهدے که انسانءَ اللهءِ بے مٹیءِ سرا یقین مبیت آئیءِ مشکل حل نبنت.
اے دیوانءِ دگه بهرےءَ رند چه عشاءِ نمازءَ شعرومشاعرهءِ شپ برحم دارگ بوت. دانشجو و طالباں وتی پر بستگیں شعر و لچه وانت اَنت و دیمءَ مشاعره و شعرجنگی ورنا و نوکورنایانی در میانءَ برجم دارگ بوت.
پنجشنبهءِ سباهءَ دیوانءِ رسمی بهر بنگیج بوت ماں اے دیوانءَ رند چه جارچین/مجریءِ وشآتکءَ و پاکیں قرآنءِ تلاوتءَ، واجه مولوی عبدالحکیم عثمانی و واجه مولانا مفتی محمد قاسم قاسمیءَ گپ جت. همے پیمءَ یک دانشجویےءَ وتی نبشتانک وانت و لهتے سرود هں وانگ بوت.
واجه مولوی عبدالحکیم عثمانی: مشکلاتءِ اصلی سوب غربءِ ظلم و زوراکی اِنت
واجه مولوی عثمانیءَ په مسلمانانی نگیگیں جاور ءَ اشاره کرت و گوشتی: مرچی مسلماناں چه پهکاں گیشتر مشکلات و آپتانی تهءَ کپتگ اَنت. اے تمامیں آپتانی سوب غربی مادی و اشتباهیں فکر غالب بیگ و سرءَ آیگ اِنت. غربی رسانکاں اسلام و مسلمانانءَ میاریگ کن اَنت، بلے اِے مشکلاتءِ اصلی سوب همے غربءِ ظلم و زوراکی اِنت. آپت چه همودءَ شروع بوت اَنت که فلسطین اشغال کنگ بوت، رندءَ امریکهءَ اوگانستان و عراق جت و تباه کرت اَنت. غربی بزان اَنت تا وهدے که اے پیم ظلم و زوراکی کن اَنت سارتیں آپ چه آیان نُکّءَ اِیر نه روت.
واجه مولانا مفتی محمد قاسم قاسمی: مرچی مسلماناں چه ایمانءِ سستیءَ تاوان گنداَنت
واجه مولانا مفتی محمد قاسم قاسمیءَ ماں وتی گپاں گوشت: مرچی مسلماناں چه ایمانءِ سستیءَ رنج بر اَنت و تاوان گند اَنت. بازیں آپتے سوب ما وت ئیں. مزن تریں آپت ایمان و اخلاق ءِ آپت اِنت.
واجهءَ گوشت: وهدے که ایمان سست بیت انسان شک و شبهیانی کفر و شرکءِ کڈانی تهءَ کپیت. اے دابیں شخصے دیمءَ ماں منطقه و جهانءَ آپت جوڑ کنت.
واجهءَ دیمءَ گوشت: بازیں آپتے ریشگ و آهونڈ ماں غرب اَنت. میلیوناں انسانءَ شپ شام نے، بلے غربی گربگ و پشّک ناز و نعمتانی تهءَ اَنت.
واجه مفتی قاسمیءَ دانشجو و واننده وصیت کرت اَنت و گوشتی: چو مبیت که شما مزنیں مدرک و سند بگر اِت، بلے قرآنءَ بلد مه بت و قرآنءِ سرءَ عمل مکن اِت. چه وتی اصلاح و پاکیءَ بےترانگ بئیت.
ماں اے گندونندءِ دگه بهرے رند چه ظهرءِ نمازءَ دانشجویانی دینی و عقیدهای جُست، پَسّو دیگ بوت اَنت. و رند چه عصر نمازءَ هر ملک و دمگءِ دانشجویاں گوں واجه شیخالاسلام مولانا عبدالحمید و واجه مفتی قاسمی چه نزیکءَ دیدار کرت.
دیوانءِ گڈی بهر رند چه مغربءِ نمازءَ برجم دارگ بوت اول سرءَ قاری گلمحمدءَ دیوان گوں قرآن پاکءِ آیاتءِ وانگءَ چمک دار کرت و رندءَ قاری ضیاءالرحمن صحتءَ وتی سرود په حاضراں پیش کرت.
دیوانءِ گڈی بهر واجه مولانا عبدالحمیدءِ دُرّیں گپ اِتنت.
واجه مولانا عبدالحمید: باید آپتانی سوب درگیجگ به بیت
واجه مولانا عبدالحمیدءَ مروچی دنیا چه هر زمانےءَ گیشتر گوں مشکلات و آپت دیم په دیم اِنت و تهنا نجات و در آیگءِ راه اِشنت که قرآن و سنتءِ نیمگءَ پچ ترّگ لوٹیت.
واجهءَ گوشت: تمامیں آپت و بحران معلول اَنت و اِشانءَ یک علت و سوبے هست باید سوبانءَ شوهاز کنایں و درگیجیں. باید علتاں چه بین برگ به بنت.
واجه مولانا عبدالحمیدءَ دیمءَ په اعتدال و میانی راهءِ گرگ تاکید کرت و گوشتی: میانی و اعتدال راه هما راه اِنت که بنبست نبیت. آ که ترندروی کن اَنت و انسانانی حقءَ ور اَنت باور کن اَنت یک روچے پروش ور اَنت. اهلسنتءِ راه همے درمیانی راه اِنت.
واجه مولانا عبدالحمیدءَ په اهل سنتءِ حق و حقوقءِ بارهءَ گوشت: اهلسنت وتی حقءَ چه قانونءِ طریق و راه لوٹیت و رندگیری کنت. باید راج و مذهبانی مردم گوں یک چمءَ چارگ به بنت و کار گرگ به بنت.
واجه مولانا عبدالحمیدءَ دانشجو و واننده وصیت کرت اَنت و گوشتی: منی توصیه په شما همش اِنت که په علم و زانتءِ یادگرگءَ هیچ سستی مکن اِت. تهنا مدرک و کارءِ پدءَ مه بئیت په مردمانی هزمت ءَ فکر کن اِت.
چمشانک