حضرت امام ابوحنیفہء نام: نعمان
پتء نام: ثابت
کنیہ: ابی حنیفہ انت
امام صاحب پہ ابوحنیفہء چوں نام کپت، اے بابتء شرتریں گپ ایش انت کہ ادا حنیفہ چہ حنیفہء انت، بزان اللہ تعالیء گورا دلگوش و چہ شرک و شرکء ہمدپیں دگہ کار و عادتاں دور و بے زار۔
گوشنت کہ وجہارا حنیفہ نامیں جنکے بوتگ، کہ پہ ہمے نسبتء کنیہ ابوحنیفہ نام گپت بوتگ اے گپ صحیح نہ انت۔
ودی بوگء سال و زمانگ
سنہ ہشتاد ہجریء امام اعظم ابوحنیفہ ماں کوفہء دیناء سر بوت۔
وش قو، وش رو، گوں برزیں آوازےء گپ و تران کنوک، آسودگ حال و تجارت پیشہ، وش پوش، وش دیوانے بوتگ۔
تعلیم
یک بزرگواریں تابعی ے کہ نام امام شعبی رحمہ اللہ انت اے واجہ یک روچے امام ابوحنیفہء گندیت جستے کنت کہ تو جاہے کسےء گورا پہ تعلیمء خاطرا رو و آکنگء ئے یا نہ؟ امام ابوحنیفہ گوشیت کہ من وانگا نہ ءُن، گڑا امام شعبی رحمہ اللہ گوشیت کہ من تئی تہا علمء گوہر و صلاحیت گندگاءُں تو برو بوان کہ تئی مستقبل تپناک انت، حضرت شعبیء سکینء برکت امام ابوحنیفہ حضرت حماد رحمہ اللہء درسء دیوانء روت و نندیت، اے واجہ چہ حضرت انس بن مالک رضی اللہ عنہء حدیث بیان کنت۔
کوفہء تہا مزنیں ایدگہ عالمانی گورا علمء ہیل گرگء رند امام ابوحنیفہ محسوس کنت کہ باید انت اے دمگانی مزنیں عالمانی گورا سفر کنگ ببیت و چہ آیان علم حاصل کنگ ببیت، گڑا پہ ہمے مقصد حضرت امام صاحب حجاز شریفء سفر سرگپت، و حجاز شریفء حضرت عطا ابن ابی رباح و امام اوزاعی حدیثء وانگ بنا کرت،۔
درس دیگءِ شروعات
امام ابوحنیفہء گوشگ انت کہ منی دلء اہت کہ من بایدانت بوانینان ہم گڑا ہمے زمانگء کہ امام صاحب انگت کوفہء ات یک روچے واجہء استاد حضرت امام حمادء سیادے ماں بصرہء وفات بوت کہ امام حماد ہمے سلسلہء وت بصرہء شت و وتی جاہء امام ابوحنیفہ نادینت۔
امام صاحب گوشیت کہ اے درگتء من ہرچے فتوی بداتیں من آداتگیں فتوی و فیصلہ وتی گورا لکّت و ایر کرتنت، چہ منی اے داتگیں فتوایانی تہا شست(۶۰) فتوی و فیصلہ ہنچین اتنت کہ آیانی بابتء من چہ وتی استادء چیزے نہ ونت ات، وہدیکہ منی استاد چہ وتی سفرء واپس بوت گڑا من وتی داتگیں فتوی و فیصلہانی دفتر واجہیں استادء خدمتء ایرکرت گڑا بزرگواریں استادء چہ اشانی تہا بیست فتویء تہا غلطی گپت و ایدگہ چل فتوی ہر لحاظء صحیح قرار داتنت۔
امام ابوحنیفہء استادانی حساب سک بازانت، بلئے آینانی تہا نامداریں واجہ حضرت حماد، حضرت عطا ابن ابی رباح و امام اوزاعی رحمہم اللہ انت۔
ہمے پیما امام صاحبء شاگرد و طالبانی حساب سک بازانت، بلئے دلچسپیں گپ ایش انت کہ امام صاحب، شاگردانی تہا حدیثء امامانی یک رُمبے ہورانت چوشکہ امام عبداللہ ابن مبارک اے واجہء وتی گوشگ انت کہ اگر منا ابوحنیفہ و سفیانء مدت و ہمراہداری گوں مبوتیں من چو ہمے دگہ عام مردمانی پیمیں مردمے بوتُں، بلئے اے دوئیں واجہان منا تاں اے جاہء سر کرت۔
دومی نامئیں شاگرد یحیی بن سعید القطان انت، حدیثء جرح و تعدیلء امام انت، اے واجہء بابتء حافظ حجر گوشیت: یحیی بن سعید قطانء گوشگ انت؛ ’’قد اخذنا باکثر اقوالہ‘‘ یعنی من گیشتر امام ابوحنیفہء گپانی سرا عمل کرتگ۔
امام ابوحنیفہء سیمی نامداریں شاگرد حضرت وکیع بن جراح انت، اے بزرگواریں واجہ فقہ شافعیء بانی و پیشونک حضرت امام شافعیء استاد انت۔
ہمے پیما مکی بن ابراہیم، زید بن ہارون، حفص بن غیاث، یحیی بن زکریا، ابن ابی داود، مسعر بن کدام، ابو عاصم النبیل، قاسم بن معن، فضیل بن دکین و عبدالرزاق بن ہمام شامل انت۔
اندازہ کنگی انت کہ کسے کہ آئی شاگردانی اے حال انت گڑا آئی جِند چہ اندازہا مزنیں علمی مقام و بستارےء واہند بوتگ؟
چہ امام ابوحنیفہ رحمہ اللہء شاگردانی تہا فقہء مزنیں امامانی بازیں نامے ہم ہور انت کہ چہ آیانی تہا آوتی فقہء نامداریں امام محمد و امام ابویوسف، امام زفر و دگہ بازینے ہورانت۔
امام ابوحنیفہء بابتء آئی زمانگء عالمانی خیال و لیکہ
امام اعظم رحمہ اللہء کمال و برکت چہ اے جاہا گندگ بیت کہ آئی زمانگء تمام ولی و بزرگواریں عالم و محدثان آئی بابتء چونیں تعریف و ساڑائی خیال داشتگ۔
حضرت فضیل بن عیاض رحمہ اللہ گوشیت: امام ابوحنیفہ مزنیں فقیہ و مالدار و سخی ئیں مردمے بوتگ کہ شپ و روچ آئی کار مطالعہ و ہورت چاری بوتگ، عبادتگزار و خاموشیں مردمے ات، جاہے کہ حلال و حرامء جیڑہ دیما بیاہتیں گڑا امام ابوحنیفہ راست و ٹِکّیں خبرا پروا نداشت، چہ بادشاہانی داد و دہشاں نفرت کنوکے بوتگ۔
حضرت جعفر بن ربیع رحمہ اللہ گوشیت: من پنچ سال امام صاحبء خدمتء جَلّ ات، چہ امام ابوحنیفہ کمتر خبر کنوک من ندیست، اگر فقہی مسئلہے کسےء جست بکرتیں گڑا امام صاحبء گوں برزیں آوازےء جواب و پسّہ دات۔
حضرت ملیح بن وکیع رحمہ اللہ گوشیت: امام ابوحنیفہ امانتدار و بہادریں کسے بوتگ۔ ہر چیزء تہا اللہ تعالیء رضا و وشنودی دیما ایر کرتگ، اللہء رضاء ہمک ٹپے سکتگ و برداشت کرتگنت، اللہ تعالی آئی سرا رحم بکنات باز نیکیں مردمے بوتگ۔
حضرت عبداللہ بن مبارک رحمہ اللہ؛ حضرت امام ابوحنیفہء امام اعظم نام بندوک ہمے واجہ عبداللہ بن مبارک وت انت۔
حضرت باقر رحمہ اللہ؛ گوں حضرت باقرء مدینہ منورہء امام ابوحنیفہء ملاقات بیت، گڑا حضرت امام باقر امام ابوحنیفہء جست کنت، توئے کہ منی پیرکء دینء تہا تو قیاسء چہ حدیثء فوقیت دئے؟ بزان وتی قیاس و اندازہء زورئے و حدیثء یلہ کنئے؟ امام ابوحنیفہء گوشت من اول توا سئے جست و سوال کناں، تو منی سوالانی جوابء بدئے رندا من ترا تئی جواب و پسہء دیان، امام باقرء گوشت شرّ انت۔ امام ابوحنیفہ آ واجہا را جست کرت کہ مردین نزورتر و ناتوان تر انت یا جنین و زالبول؟ امام باقر گوشیت کہ جنین!۔ امام ابوحنیفہ جستے کنت کہ میراثء مردینء بہر گیشتر انت یا جنین؟ امام باقر جواب دنت کہ مردینء بہر گیشتر و جنین و زالبولء حصہ کمتر انت، امام ابوحنیفہ گوشت کہ اگر پہ قیاس تئی پیرکء دین تہا تبدیلی بکرتیں گڑا من جنینء حصہ چہ مردینء گیش کرت، چیا کہ مردیں زوراک و طاقتور انت و جنین و زالبول نزور و بیوسیں مردمے۔ امام ابوحنیفہ دومی جست کرت کہ اسلامء تہا نمازء اہمیت گیشتر انت یا روچگء؟ امام باقر گوشت کہ نمازء، امام ابوحنیفہ گوشت کہ اگر من قیاسء سرا عمل بکرتیں گڑا من روچگء قضا معاف کرت و نمازء قضاء فتوا دات، اے جستانی پسہء رند حضرت باقرء امام صاحبء پیشانی بوسہ دات و باز احترام کرت۔
امام اوزاعی رحمہ اللہ: اے واجہ شامء نندوکیں مردمے ات و حضرت عبداللہ بن مبارکء استاد اَت، یک روچے امام اوزاعی وتی دوستیں شاگرد ابن مبارکء را جست کرت کہ اے ابوحنیفہ کئے انت، من اشکتگ کہ اے گمراہیں مردمے، ابن مبارک گوشیت کہ ادا من ہچ نگوشت من اہت و چہ وتی لوگء امام ابوحنیفہء بیان کرتگیں فقہی مسئلہانی یک کتابے من زرت و امام اوزاعیء دات، آئی کتاب ونت و رندا منا جستی کرت کہ نعمان بن ثابت کئے انت، من عرض کرت واجہ نعمان بن ثابت ہمے ابوحنیفہ انت کہ تئی خیالء آراہا ردیں مردمے، ابن مبارک گوشیت کہ منی گپء اشکنگء رند آئی دیمء تاب گشت و زرد ترّت و منا گوشتے ما چے اشکتگ و حقیقت چے انت! او ابن مبارک اے مردمء نیاد و ہمراہداریء یلہ مدئے چہ اشی فائدہ بزور۔
حضرت امام ابوحنیفہ رحمہ اللہء علمی کمال و عقلی درجہ و تقوی و خداترسیء قصہان کتاب پرانت، ہمدا اے گپ بیان کنگی انت کہ امام صاحبء دوازدہ لک و نود ہزار شرعی و فقہی مسئلہ تحقیق کرتگ و چہ قرآن و حدیثء روشنی درچتگ و محفوظ کرتگنت، و اے کارء خاطرا امام صاحب چہ وتی ہزارانی حسابء کمالی ئیں طالب و شاگردان یک جماعتے گچیں کرتگ و اے کار پرماتگ کہ آ اے مسئلہاں شرتر و گیشتر بچارانت و اشان نزآرنت تانکہ رندی مردم چہ اشان فائدہ چست بکننت، امام صاحب طریقہ ایش بیت کہ مسئلہانی حل اور قرآن، اگر قران کریمء راہنمائی مرسیت گڑا حدیث و صحابہ کرام رضی اللہ عنہمء عملء زوران اگر ادا راہنمائی مرسیت گڑا اہل علمء ہمتپاکیں شور و فیصلہ، اگر چہ ادا چیزے مگندان گڑا وت اجتہاد کناں۔
چہ واجہء نسل و باپدء آئی چک حضرت حماد و نماسگ حضرت اسماعیل رحمہ اللہء علمی نام و درجہ حاصل کرت و چہ شاگران داود الطائی، ابویوست، اسد بن عمرو، امام محمد، زفر و ابن مبارک ہم تاں برزشت انت، امام صاحبء خدمت و محنتانء اللہ تعالیء ہم ہما درجہ دات کہ خلیفہ ہارون الرشیدء دورء امام صاحبء فقہ حکومتی قانون جوڑ کنگ بوت۔
عباسی خلیفہ منصور امام ابوحنیفہ رحمہ اللہء قضاوتء کار و عہدہ پیش کرت، بلئے امام صاحبء عذر پیش کرت کہ من اے کارء لائق نہ ءُن، منا درگزر کن، منصور گوشت کہ تو دروغ بندئے تو اے کارء لائق تریں مدمئے! گڑا امام صاحبء گوشت کہ تو وت منا گوشت کہ من دروغ بندے ءُن گڑا آیا یک دروغ بندےء اے عہدہ دیگ جائز انت؟ منصور لاجواب بوت گڑا امام صاحبء گوشت کہ من عجمہ مردمے ءُن، اگر تو منا قاضیانی کار مستے کنئے گڑا بلکہ ایدگہ مردم ایراد بگرانت، منصور سوگند وارت کہ تو قاضی ئے و امام صاحبء سوگند وارت کہ من اے کارا کرت نکناں من اے بارء نزوران۔ پہ ہمے خاطرا امام صاحبء قید کنگ بیت و تاں مزنیں روچ و زمانگے ہمے پیما قیدء تہا مانیت، بلئے درس و تدریس ہمدا ہم جاری بیت، واجہء نامی تریں شاگرد امام محمد ہمک سبقء ماں قیدی جاہء حاصل کنت۔
دین اسلامء اے راست بازیں عاشق و قرآن و سنتء نورء تالان کنوک و آئی حکم و دستوراں دنیاء را پیشداروک سنہ ۱۵۰ ہجریء چہ اے ناقدریں دنیاء پہ وتی آخرتء آباد و ابدمانیں ہنکینء سر بوت، و آئی وصیتء مطابقء خیزرانء قبرستانء دفن کنگ پنچ بر آئی جنازہ وانگ بوت، و قصاص پنجاہ ہزار مردمء جنازہ ونت، بغدادء ہمے ہندء کہ امام صاحبء قبر انت تا روچ مروچی اعظمیہ نام انت۔
سرچمگ: راستیں راہ
چمشانک