واجه مولانا محمد حسين گرگيجءَ ماں وتي جمعهءِ وعظاں، چه حضرت أم المومنين عايشه صديقهءِ بدءُ بيراه گوشگ ماں تهرانءِ گوستگيں نماز جمعهءَ سك گله كتءُ إے توهيناني گوں ترنديءَ رد كت أنت.
واجه مولانا گرگيجءَ ازواج مطهراتءِ فضيلتءِ بارهءَ گوشت: اهل بيتءِ اولي درجه ازواج مطهرات أنت ، رندءَ آل عليءُ آل جعفرءُ آل عقيل أنت.
واجهءَ ازواج مطهراتءِ بدءُ بيراه گوشگ حرام زانتءُ گوشتي: هما پيمءَ كه پيغمبرءِ احترام إيركنگ مئے سرءَ فرض إنت همے پيمءَ پيغمبرءِ پاكيں لوگيانءُ آئيءِ اولادءُ اوبادگاني احترام كنگ فرض إنت ءُ آياني بد گوشگ حرام إنت.
مولانا گرگيجءَ چه لهتے بدواهءَ كه لوٹ أنت گوں تاريخي روايتانءُ صحابهءِ اختلافاتءِ بيان كنگءَ ، آيانءَ گوں مروچگيں جنگءُ واقعاتاں تشبيه بدينت، سك انتقاد كتءُ گوشتي: ما تاريخءَ پَبِه رد نكنيں، بلے ما گوشيں كه تاريخءَ پتءُ مات نيست، هانے پهكيں تاريخي روايتاني سرءَ مردم بروسه كت نكنت؛ ما بايدإنت كه صحابهءُ ازواج مطهراتءِ فضيلتءَ چه قرآنءُ صحيحں سنتءَ بگرإيں، هچ مجتهدے تا هني چه تاريخي روايتاں، فقهي مسائل نگپتگ.
دارالعلوم فاروقيهءِ گاليكشءِ كار مسترءَ اهل بيتءِ احترام دارگ سك مهم زانتءُ گوشتي: هما پيمءَ كه ما حضرت عايشه، خديجهءُ إے دگه امهات المومنينءَ احترام كنيں همے ڈولءَ حضرت فاطمهءُ پيغمبرءِ إے دگه جنيں چكانءَ احترام كنيں، ءُ هريكے چه إشانءَ بد گوشگ، اهلسنتءِ مقدساتءِ إيرجنگ إنتءُ ما إے توهيناني ديمءَ اوشتيں.
واجهءَ گوشت: لهتے ماں وتي جلسه ياني تها گپ جن أنتءُ فكر كن أنت كه گوشداروك إش تنها لهتے جاهلءُ بے سواد أنت، بلے نزان أنت كه آياني گپ ماں كل جهانءَ شنگ بنت.
مولانا گرگيجءَ گوشت: مارا كارے گوں سياستءَ نيست، كه كجام حزبءُ پاٹءَ گوں كيا اختلاف هست، بلے إے زمانءِ جرياناں په اصحابءِ اختلافءَ تشبيه ديگءُ حضرت عايشه، طلحهءُ زبيرءَ فتنهءِ سروك زانگ، بالكل غلطيں كارے ،ءُ إشي اهلسنتءِ مقدساتءِ توهين كنگ إنت، بلے لهتے ماں مياتكءُ بے پرواه، مئے مقدساتءَ توهين كن أنت. گڑا اگاں ما إشاني جوابءَ بدإيں مئے مقصد اختلافءِ جوڑ كنگ ماں ملكءَ نه إنت، بلكيں مئے مقصد ديمپاني چه وتي مقدسات إنت. ما هچ وڑءَ اهلسنتءِ مقدساتءِ إير جنگءَ نمن إيںءُ هركسے كه توهين بكنت ما آئيءِ ديمءَ اوشتيں، ما اهلسنت هميشه مظلوم بوتگيں، مارا راهے بيد چه دفاع چه وتي مقدساتءَ نيست.
حكمانے كه په مولانا نقشبنديءُ آئيءِ همراهاں صادر بوتگ أنت بايديں اپدءَ چارگ ببنت ءُ إے واجهاں آزاد ببنت
اهلسنتءِ آزاد شهرءِ جمعهءِ پيشنمازءَ، مولانا نقشبنديءُ آئيءِ همراهاني بيگناهي پدءَ جار جتءُ گوشتي: مولانا نقشبندي يك پكّائينءُ پرهيزگاريں عالمے أت ءُ يكے چه بلوچستانءِ مزن تريں عالمان أت. بلوچستانءِ پهكيں عالمان تأكيد كن أنت كه مولانا نقشبندي يك نيكينءُ صالحيں بنده إے بوتگ، گڑا هچبر إے ڈوليں عالمءُ زانتكار په دگرےءِ كشگءَ حكم نكنت، ماں حديث شريفءَ آتكگ: اگاں يكے كلمه “أقتل” (بكش)ءِ نيمءَ بگوشيت، آئي ماں كشگءِ حكمءَ شريك إنتءُ جهنمءَ روت. گڑا چه پيمءَ يك عالمءُ پرهيزگارے دگه عالمےءِ كشگءِ حكمءَ دنت؟
واجهءَ آخر سرءَ گوشت: گوں إے دابيں تهمتاں مئے عالماني دامن پولنگ نبنت، بايدإنت صادر بوتگيں حكماں پروشگ ببنتءُ آميدگسءُ قضايي ذمه داراں وتي حكمانءَ اپدا بچار أنتءُ هرچے زودتر إے واجهاں آزاد ببنت.
سيستانءُ بلوچستانءِ پهكيں مردم گاز ديگ ببنت
واجه مولانا گرگيجءَ ماں وتي جمعهءِ آخري گپاں په وتي نوكيں سفرءَ په بلوچستانءَ اشاره كتءُ گوشتي: مئے ملك، گازي لحاظءَ دومي درجهءَ ماں جهانءَ اوشتاتگ، بلے بلوچستانءِ مردماں چه گازءِ نعمتءَ محروم أنت. مردم گوں سكيءَ وتي زندءَ گوازينگءَ أنتءُ همشي سبب بوتگ لهتے كه وتي سيتءِ رندءَ أنت ماں نفتءِ تها آپءُ گازائيل مان كن أنت كه شي سبب بوتگ سميءُ سرطاني گازے أڈ ببيتءُ مردمانءَ خفه بكنت.
واجهءَ آخر سرءَ گوشت: سيستانءُ بلوچستان بهرے چه همےملك إنت بايدإنت ذمه داراں په إے سرزمينءِ مظلوميں مردماني حالءَ برس أنت.
چمشانک