شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (3 بهمن 1404، 23 جنوری 2026) وتی بژن ءُ همدردی ءَ کشگ بوتگێں مردمانی بازێں کچءُکساس ءِ باروا درشان کرت ءُ گوشت ئی که شه اے بازێں کچءُکساساں ایران ءُ دنیا ءِ مردماں بهمانگ بوتگ انت.
🔹ماں گوستگێں زهرشانیاں مردماں بازێں سکی سوری ئے را جار جت/ مردم مالزانشتی مشکلانَ گۆں سیاست ءُ ملک ءِ سرمستری ءَ همگرنچَ زان انت
په سنیآنلاین ءِ سرهال ءَ مولانا عبدالحمید درشان کرت: اے زوتاں دلار ءِ ارزشت ءِ برز روگ، ریال ءِ بےارشی ءُ بازێں گرانیانی سوب ءَ مردمانی سۆداگری ءُ کٹءُکاراں گرانێں گپچلانی آماچ بوت انت که مردماں زهرشانی کرت ءُ وتی مشکلاں جار اش جت.
واجه ءَ گێش کرت: دێرێں زمانے که ایران ءِ مردماں گۆں مالزانشتی ءُ رۆزیگی مشکلاں آماچ انت ءُ اے مشکلاں گۆں ملکاری ءُ ملک ءِ کارمستری ءَ همگرنچَ زان انت. پمێشا مردماں زهرشانی کرت ءُ وتی اێراداں درشان اش کرت ءُ مشکلاں جار اش جت.
🔹ماں گوستگێں زهرشانیاں هزاراں جنێن ءُ مردێن ءُ زهگ ءُ نۆکورنا کشگ بوت انت
زاهدان ءِ آدێنگ ءِ امام ءَ گوشت: ارمان که ماں آ زهرشانیاں لهتے گرانێں پێشامد هم بوت ءُ کارے که نبائد بوتێں، پێش آت. ماں دنیا ءِ تیوگێں ملکاں زهرشانی هست ءُ برے ماں آوان ترندی همَ بیت، بلے په زهرشانی کنۆکانی جتا کنگ ءَ ماں میاناستمانی کانوداں دگه راه هم هست چۆ لاکیئێں تیراں یا آپپاشێں ماشین یا ارسی گێس که گۆں اے رهبندان مردم کشگ نه بنت.
واجه ءَ گێش کرت: ماں دگه ملکاں آوان که آشوبگر انت، بندیگ کنگ به انت. ماں دنیا ءَ شه مردمانی جنگ ءُ کشگ ءَ پهرێزَ کن انت. بژن انت که ماں 98 ءُ 1401 ءِ زهرشانیاں هم مردم کشگ بوت انت، بلے ماں 1404 ءِ زهرشانیاں هزاراں مردم شه جنێن ءُ مردێں ءُ زهگ ءُ نۆکورنائاں کشگ بوت انت که ایران ءُ دنیا ءِ مردماں بهمانگ بوت انت. پمێشا ماں نونێں جاور ءَ که ایران ءِ مردم سوگیگ انت زانتکار ءُ سسا ءِ واهنداں دێم ءَ بیا انت ءُ توجیلے درگێج انت.
🔹گوستگێں جنز ءِ کشگ بوتگێں مردماں درملکی نه انت، ایران ءِ مردم انت
مولانا عبدالحمید درائێنت: آوان که ماں اے جنز ءَ کشگ بوتگ انت ایران ءِ مردم انت، درملکی نه انت ءُ گۆں درملکاں هم وابستگ نه انت، بلێں گواچن اێش انت که آ ایران ءِ مردم بوتگ انت که سالاں گۆں سکی سوریاں آماچ انت ءُ زهرشانیَ کن انت.
🔹هچ سرکارے نبائد گۆں وتی مردماں ترندی کنت/ مردمانی وشنودی ءِ کٹگ هر رنگی که بیت حکومت ءُ سرکارانی اگده انت
زاهدان ءِ آدێنگ ءِ امام ءَ گوشت: هچ سرکارے ماں دنیا ءَ نبائد گۆں وتی مردماں ترندی کنت ءُ آوانَ کُش ایت، بلکه مردمانی هبرانی اشکنگ ءُ آوانی مشکل ءُ سکیانی رندگیری کنگ شه حکومتانی اگدهان انت. ماں دنیا ءَ رسم انت که وهدے مردماں زهرشانی کن انت سرکاراں گۆں آوانَ نند انت ءُ گپان اش گۆشَ دار انت ءُ لۆٹان اش رندگیریَ کن انت ءُ اگں لازم بیت وتی سیاستانی ته ءَ بدلیَ کار انت یا کارمستراں گستایَ به انت تاں مردمانی وشنودی ءَ کٹ انت، بلے ارمان که مئے ملک ءِ ته ءَ اێرنگ نه بوت.
واجه ءَ گێش کرت: دێر انت که ملک ءِ دلاسۆزاں ڈاه دےانت، من مدام گۆں دلاسوزی ءَ گوشتگ که ملک گۆں مالزانشتی ءُ ملکاری بنبست ءَ دێمپهدێم انت، لهتے شه کارمستراں گوشت که شما مردمانَ ناامێتَ کن ات؛ من گوشت من نه لۆٹ آں که مردماں ناامێت کن آں، بلے اے گواچنے ءُ من لۆٹ آں که کارمستراں زوتر په مالزانشت ءَ که گۆں ملکاری ءَ همگرنچ انت، توجیلی درگێج انت، بلے ارمان که اے ڈاهاں دلگۆش نه بوت انت.
زاهدان ءِ آدێنگ ءِ امام ءَ گوشت: پێشامد ءُ گرانێں تاواناں که ماں گوستگێں سالاں ملک ءِ ته ءَ پێش آت انت سوب بوت انت که مردم شه دین ءَ دور به انت ءُ په حاکمانی جند ءِ مذهب ءَ هم گرانێں تاوان دار ایت. همےرنگ وهدےکه دنیا ءِ مردماں اے پێشامداں چار انت ایران ءِ کارمسترانی باروا چۆن گیشءُگیوارَ کن انت؟
🔹پیغمبر ءُ صحابهئانی کرد گۆں مخالفاں په رحم ءُ حکیمانه بوتگ
مولانا عبدالحمید وتی هبرانی دێمتر ءَ گوشت: اسلام ءِ اول ءَ دوپۆستاں په مسلمانانی دشمناں جاسوسی کرتگ ءُ مسلمانانی هالاں دشمنان اش داتگ. شه واجه رسول الله صلّیاللهعلیهوسلّم ءَ لۆٹگ بوت که دوپۆستان کمێن مردمےانت، کشگ به انت. بلێں واجه رسول الله ءَ نه منّ ات و درائنت ئی اگه من اے کار ءَ کن آں دنیا ءِ مردماں گوش انت که محمد ـ صلّیاللهعلیهوسلّم ـ وتی مردمانَ کش ایت ءُ همے چیز سوبَ بیت که منی سر ءَ بێسه مه کن انت. همےرنگ وهدےکه دوپۆستانی سرۆک عبداللهبنابیّبنسلول بێران بوت، آئی زهگ که مخلصێں مسلمانےات، شه واجه ءَ لۆٹ ات ئی که وتی جامگ ءَ عبداللهبن ابیّ گور ءَ دنت تاں بلکێں شه قبر ءِ عذاب ءَ رک ایت.
واجه صلّیاللهعلیهوسلّم ءَ همے کار ءَ کرت ءُ آئی جنازه ءِ سر ءَ نمازء ونت. همے په رحم ءُ حکیمانه ئێں گامگێج سوب بوت که بازێنے شه دوپۆستاں توبه کن انت.
واجه ءَ گێش کرت: مهتر عثمان رضیاللهعنه ءِ خلافت ءِ زمانگ ءَ یک پاٹی ئے شه آشوبگراں ماں مدینه منوره ءَ مسجدالنبی ءَ گپت ءُ مهتر عثمان ءِ گس ءَ بێڑو اش کرت. صحابهئاں گوشت اگں خلیفه مۆکل دنت ما یک رۆچ ءَ آشوبگرانی تند ءَ پتا اێں، بلێں مهتر عثمان ءَ نه منّ ات ءُ درائێنت ئی: من وشنود نه آں که واجه رسول الله ءِ شهر ءَ هۆنرێچی بیت ءُ فتنه جۆڑ بیت. مهتر عثمان رضیاللهعنه که امیرالمومنین ءُ خلیفةالمسلمین ات، نه لۆٹ ات ئی که کسے ءِ هۆن رێچگ بیت. گوشت ئی من گۆں آوانَ نند آں ءُ آوانی گپاں گۆش داراں، بلے آوان واجه ءِ گس ءِ سر ءَ بێڑ برت ءُ وهدے که مهتر عثمان گۆں قرآن ءِ وانگ ءَ گلائێش ات، شهید بوت.
🔹کڈنَ کن آں که «زهرشانیانی دزگر بوتگێں مردماں» ءُ «سیاسی بندیگاں» آزاد کن ات
واجه ءَ دوارگ په «دزگر بوتگێں مردم ءُ سیاسی بندیگانی آزاتی ءَ» کڈن کرت ءُ گوشت ئی: من کڈنَ کن آں ءُ اے تیوگێں مردمانی لۆٹ انت که هزاراں نپر که ماں زهرشانیاں دزگر بوتگ انت، آزات به انت. همےرنگ اے لۆٹ ءَ هم پرامَ کن آں که سیاسی بندیگاں هم آزات کن ات ءُ گپان اش گۆش دار ات.
🔹 دامگ ءِ بند کنگ ءَ مزنێں تاوانے مردمانی کٹءُکاراں رسێنتگ؛ کارمستراں زوت دامگ ءَ پچ کن انت
مولانا عبدالحمید دامگ ءِ پچ کنگ ءِ لۆٹۆک بوت ءُ گوشت ئی: دو هپتگ انت که جهانی دامگ بند انت ءُ دامگ ءِ بند کنگ ءَ مردمانی مردمانی کٹءُکاراں مزنێں تاوانے رسێنتگ. کارزانتانی گپانی رد ءَ دامگ ءِ بند کنگ ءَ رۆچے گێش شه 3 هزار ملیارد تومن ءَ مالزانشت ءُ مردمانی کٹءُکاراں تاوان رسێنتگ.
واجه ءَ ٹکاٹک گوشت: دامگ ءِ بند کنگ په ملک ءُ مردماں بےجبران ءُ ٹوهێں تاوانے دار ایت، پمێشا کارمستراں زوت دامگ ءَ پچ کن انت.
🔹ما پهکانی توکل ءُ رجوع به الله پاک ءَ بیت
زاهدان ءِ آدێنگ ءِ امام ءَ وتی هبرانی گڈسر ءَ درائێنت: شه الله پاک ءِ بارگاه ءَ ما را امێت هست که سکیانَ بۆج ایت. ما پهکانی توکل ءُ رجوع به الله پاک ءَ بیت. همےرنگ شه الله پاک ءَ لۆٹ اێں که مچێن ایرانیاں که ماں اے پێشامداں کشگ بوتگ انت، برزێن درجه دنت ءُ آوانی پشپداں مز ءُ اۆپار ءُ ٹپیاں شفا دنت ءُ ملک ءِ پهکێں مشکلاں بۆج ایت.
چمشانک