سنیآنلاین| «امیرحمزه فولادی»، 9 سالگێں گونڈل، شه نیکشهر ءِ مزن میتگ ءِ هند، «مستنگ» هلک ءِ مردماں که 12 رۆچ پێسر ءَ وهدے که شه دینی وانگجاه ءَ وتی گس ءِ نێمگ ءَ کێت، آهوران ءِ کوهانی تها زیان بیت.
په سنیآنلاین ءِ سرهال ءَ، امیر حمزہ فولادی ءِ شۆھازگ ءِ پارءَ مردمانی مدامی ءُ شپ ءُ رۆچێں جھداں ابید ھم اے زھگ ءِ بابت ءَ ھچ وڑیں سرپدی دست نه کپتگ ءُ آئی ءِ شۆھازگ ءِ جھد انگت ءَ برجاہ اِنت.
شه دگه نێمگ ءَ ایلنا ءِ ھالرسانی ءَ زی (27 تیرماه 1403) ءَ هالے شنگ کرتگ که نیکشهر ءِ شۆرجاه ءِ سروک ءَ شه «ھلال احمر ءِ واکانی همکاری ءَ گۆں مردمی شۆهازۆکاں» هال داتگ ءُ گوشتگء: «گێش شه 200 نپر ءِ پٹ ءُ پۆل ءَ شه لس مردم ءُ هلال احمر ءِ واکاں تاں نون آسرے نه داشتگ، بلے آ انگت ھمے گونڈل ءِ شۆھاز ءَ اَنت.»
🔸 شیخ الاسلام مولانا عبدالحمید، دوشمبی ءِ شام ءِ وهد ءَ (25 تیرماه 1403) ماں زاهدان ءِ مزنێں مسیت مکی ءِ قرآن مجید ءِ ترجمه ءُ تفسیر ءِ درس ءِ وھد ءَ وتی ارمان ءَ شه امیرحمزه فولادی ءِ بێگواهی ءَ درشان کرت ءُ گۆں اشاره به آیی کهول ءِ «پرێشانی» ءَ شه لس مردماں لوٹ ات که دعا به کن انت تاں آ نیکشھری ئێں زھگ «وش ءُ سلامت وتی کهول ءِ کر ءَ واتر به بیت.»
🔸 ھمے رنگ پرێری (سےشمبے 26 تیرماه ءَ) یکے شه دارالعلوم زاهدان ءِ استاداں شه واجه شیخ الاسلام مولانا عبدالحمید ءِ نێمگ ءَ امیر حمزہ فولادی ءِ ماس ءُ پس ءِ گس ءَ شتگ ءُ مولانا عبدالحمید ءِ سلام ءُ دعا ءِ سر کنگ ءَ ابید، آ گونڈل ءِ شۆھازگ ءِ جھد ءُ پٹءُپۆلانی بابت ءَ هال ء گپتگ.
آ دارالعلوم زاهدان ءِ استاد ءَ ماں گپءُتراں گۆں «سنیآنلاین» ءَ گوشت: نیکشهری ئێں گونڈل ءِ کهول که یک نادار ءُ بےوسێں کهولے ءُ آ زھگ ءِ پس ھم که په سکی ءُ گۆں دگرانی کمک ءَ پاد کێت ءُ نند ایت، شه شیخ الاسلام ءِ دعا ءُ دلگۆش ءَ باز وش بوت ءُ ابید شه سلام ءُ درۆت ءَ شه الله پاک ءَ واجه شیخ الاسلام ءِ سلامتی ءُ دراجێں اُمر ءَ لۆٹ ات.
آئی ءَ گێش کرت: چیزے که ماں اے وئیل ءَ باز دلگۆش کرز ءُ تأثرمند بوت، دمگ ءِ مردمانی میان ءَ ھمدردی، ھمگرنچی ءُ ھمکاری ات که پیر ءُ ورنا پرێشان بوتگ اَنت ءُ په بێگواھێں گونڈل ءِ شۆھازگ ءَ جھد کنگ ءَ ات انت. دمگی مردمانی جهد ءُ کۆشست په امیرحمزہ فولادی ءِ شۆهازگ ءَ انگت برجاہ انت ءُ آوان شه لس مردماں نێکێں دعا لوٹ اتگ.
چمشانک