شیخالاسلام مولانا عبدالحمید ماں زاهدان ءِ جمعه نماز ءِ دیوان ءَ (22 بهمن 1400/ 11 فوریه 2022) گۆں اشاره به انقلاب ءِ سالرۆچ ءَ، اے انقلاب ءَ مردمی جنز ءِ برورد زانت ءُ پرێشی که اے انقلاب مان ایت په عدالت ءِ اجرا ءُ مردمانی رضایت ءِ کٹگ ءَ سک سۆگه ئِے کرت.
په سنیآنلاین ءِ سرهال ءَ شیخالاسلام مولانا عبدالحمید درشان کرت: ماں ایران ءَ گۆں کودتا ءُ نظامی بێڑ ءَ انقلاب نه بوتگ، بلکه گۆں مردمی جنز ءُ زهرشانیاں انقلاب بوت، پمێشا انقلاب ءِ مانگ تاں آ زمان ءَ انت که مردم گۆں آیی هور بےانت.
مولانا عبدالحمید سک سۆگه کرت که تاں وهدےکه ذمهواراں توان انت مردمانی دل ءَ دار انت، عدالت ءَ ماں تیوگێں ملک ءَ اجرا کن انت ءُ گۆں هزمت به مردمان آوانی رضایت ءَ کٹ انت، اے حکومت مان ایت.
زاهدان ءِ جمعه ءِ امام ءَ گوشت: انقلاب ءُ حکومت گۆں زۆر ءُ سلاح ءَ نه مان ایت، هرچۆں که په دێمپانی شه سیمسران نظامی قدرت ءُ سلاح هژدری انت ءُ اے هر ملک ءِ حق انت که په دێمپانی شه وت ءَ سلاح داشته بیت، بلێں نظام ءُ حکومت ءِ مانگ ءِ راز ماں ملک ءَ استمان ءِ پلهمرزی ءُ آوانی رضایت ءِ کٹگ ءُ عدالت ءُ برابری ءِ اجرا کنگ انت.
واجه ءَ ٹکاٹک گوشت: ملک ءِ سرۆک ءُ اگدهداراں باید اے بنگپے سر ءَ فکر کن انت که مردم چنکس گۆں نظام ءَ هور انت ءُ پرێشی که مردم شه حکومت ءَ پلهمرزی کن انت چه سیاست ءُ کارے بیت. ماں ایران ءَ وڑ وڑێں راج، مذهب ءُ سسا ءِ واهند است که باید پهکاں به وتی حق ءَ رس انت ءُ هچ کس ءِ حق پادمالی مه بیت.
دارالعلوم زاهدان ءِ سرمستر ءَ گوشت: رسول اکرم صلّیاللهعلیهوسلّم رحمةللعالمین ات ءُ مدام دلگۆشے کرت که ماں اسلامی سرڈگاراں هچ بےدینے ءِ حقے تها ظلم مه بیت. واجه رسول الله صلّیاللهعلیهوسلّم ءُ خلفای راشدیناں ماں وتی زندمان ءِ گڈی دماں سۆگه کرتگ که ماں اسلامی حکومت ءَ هچ بےدینے ءِ سرا ظلم مه بیت ءُ هچ دین ءُ استمان ءِ عبادتجاه شۆر مه وارت. مهتر علی رضیاللهعنه بےدینانی حقانی بارو ءَ باز آزگسما ات. یک گشتے یک مردمے یهودی ئێں جنینے ءِ زران ءَ دز اِت اَت، مهتر علی باز تپرکه بوت ءُ گوشت ئِے شه اێشی ما مر اێں گهتر انت. اهلبێتانی رهبند همے بوتگ که مدام په عدالت ءُ انصاف ءُ مردماں فکر اش کرتگ.
🔹اگاں په ناموسی مسائلانی مجازات ءَ مشخصێں قانونے بوتێں مردماں وتسر مجازات نه کرت
زاهدان ءِ جمعه ءِ امام ءَ ماں دگه بهرے شه وتی هبراں به همے زوتَے اهواز ءِ ناموسی قتل ءَ اشاره کرت ءُ گوشت ئِے: همے زوتَے پێشامد که یک مردمے وتی لۆگ بانک ءَ را په یک ناموسی ئێں بنگپے ءِ سر ءَ کشت ات، ماں دنیا ءِ رسانکدراں شنگ بوت. من ماں یک رسانکدرے دیست که اے بنگپ ءَ را ریس ءُ پریسے کرت ءُ گوشت اش که ماں ایران ءَ سالے تها صداں اے وڑێں قتل بیت.
مولانا عبدالحمید درائێنت: اے قتلانی بنیادی سبب اێش انت که تا جای که من زان آن ملکے تها پرے جرماں هاسێں مجازاتے نێست، اگاں کانودے هست گڑا آمیدگس ءِ ذمهواراں آیرا جار جن انت، پچےکه وهدے ما مردمان گوش اێں اے بارو ءَ آمیدگس ءَ برو ات، آوان گلگ کن انت که آمیدگس رندگیری نه کنت.
زاهدان ءِ جمعه ءِ امام ءَ سک سۆگه کرت که منی لۆٹ ءُ مردمانی لۆٹ اێش انت که آمیدگس ءِ ذمهواراں اے بارو ءَ چارگے گند انت ءُ اے بارو ءَ کانودے درگێج انت که مکنکنۆک بیت ءُ مردماں آیرا منّ انت.
🔹چلیمگس ءُ پنڈوگرانی بازی ماں زاهدان ءَ، پرے شهر ءَ خب نه انت
شیخالاسلام مولانا عبدالحمید ماں دگه بهرے شه وتی هبراں گۆں انتقاد شه چلیمگسانی بازی ءَ ماں زاهدان ءَ گوشت: بژن انت که ما را هال رس ایت که مئی شهرے تها چلیمگساں باز بوتگ انت ءُ لهتێں شه ورنایان په سرگرمی ءَ همۆد ءَ رو انت که هچ جوانێں دابے نه انت. دوت ءُ چلیم ءِ آسر معتادی انت.
واجه ءَ گێش کرت: آوان که زوت پرے جاهاں جواز دےانت اے چیز ءَ زان انت که بازێں ناامنیاں شه همدا بنگێج بوتگ انت، ورنایان گوں وت جنگ کرتگ ءُ آسرات ءَ به قومی جنگاں رستگ. نیاز انت که په ورنایان جوانێں ءُ سالمێں کار ءُ سرگرمی درگێجگ بیت.
زاهدان ءِ جمعه ءِ امام ءَ شه پنڈۆگرانی بازی ءَ هم ارماں کرت ءُ گوشت ئِے: هال رستگ که پنڈۆگری ماں شهر ءَ باز بوتگ ءُ پنڈۆگراں مردمانی دکان ءُ گسانی دپ ءَ رو انت. هرچۆں وهدےکه پنڈۆگرے مئے کرّ ءَ کێت باید آیی حرمت ءَ سات اێں ءُ تاں وتی وسے کساس ءَ آیرا مدت کن اێں، اما باید کار ءُ دندا ءِ درگێجگ ءِ نێمگ ءَ دلگۆش کن اێں ءُ مردمان ءَ دلبڈی دے اێں که کار ءُ ازم یات گر انت. وهدےکه مهتر رسول الله صلّیاللهعلیهوسلّم ءِ کرّ ءَ پنڈۆگرے آت، واجه ءَ آیرا دلبڈی دات ءُ په کارے نێمگ ءَ رهشۆنی ئِے دات تاں شه وتی دستکٹ ءَ روزی بوارت.
چمشانک