امام مالک رحمہ اللہ

نام و کنیت: ابوعبداللہ مالک
بزرگواریں پت: انس
نام گپت: امام دارالہجرۃ، اے لقب پمشا رستگ کہ اے واجہء وتی زند و علمی جہد مدینہ منورہ گوازینتگنت۔

امام مالک رحمہ اللہ مدہنہ طیبہء اے دنیاء اہتگ و ہمدا رُستگ و ہمدا وتی زندء روچ پہ علم و عمل و تعلیم و تربیت گوازینتگنت، ہجرتء اولی قرنء نود و سیمی سالء امام مالک ہنچیں دورےء پاد اے جہانء ایر کرتت انت کہ اموی حاکمانی دوراَت، و آ روچان مسلمانانی حاکمی تاں کابل و سندھ، افریقہ و اندلسء سر اَت۔
مدینہ: ہما جاہ کہ جہانء طالبانی منزگ بوتگ و رسول اللہ صلی اللہ علیہ وسلمء ہنکین و آخری لوگجاہ بوتگء برتگء وہدء مزنین عالم و بزرگوارانی دیوان و مِنندی بوتگ، پہ امام مالک رحمہ اللہ علمء حاصل کنگ گران نبوت، چیا کہ ہمدا آرا ہرچیز کہ برسیت رسگی ات، علم و عمل و عشق و محبت و رسول اللہ صلی اللہ علیہ وسلمء راہ و طریقہء روکانی ہجوم۔
امام مالک رحمہ اللہء قرائت چہ آ روچانی مستریں قرآن زانت، نافع بن عبدالرحمنء در برتت کہ وتی وقتء امام القرّاء بوتگ، آ زمانگء وانکانی وانگ و علمء حاصل کنگء ڈنگ و طریقہ ہمے بوتگ کہ ہر عالمء گواروگ و چہ آئی علم حاصل کنگء چک و پد نبوتنت، اے پیما امام مالک رحمہ اللہ چہ ہما کسان کہ چیزے نہ چیزے در برتگ آیانی حساب و تعداد ۹۰۰ گوشگ بوتگ، بلئے گیشتر چہ حضرت عبداللہ بن عمر رضی اللہء خاصیں خدمتگار حضرت نافعءَ علم حاصل کرتگ و تاں مزنیں زمانگے اے واجہء خدمتء بوتگ۔

حافظہ و یادداشت
آ دورانی مردمانء ہنچیں یادداشت و حافظہ بوتگ کہ ہر یکے حال و واقعاتاں کہ مردم وانیت حیران بیت کہ چونیں مردم بوتگنت، چہ ہمے پیمیں مردماں یکے امام مالک وت انت کہ گوشیت وہدے یک بر من چیزے یات کرتگ گڑا منا دومی برا آئی یات کنگء حاجت نبوتگ و آچیز گڑا ہچ بر چہ منی ذہن و ہوشءَ در نہ شتگ۔

درس و تدریس (وانینگ)
برگواریں و مہربانیں صحابیانی دورا حضرت عبداللہ بن عمر رضی اللہ عنہما مدینہ منوریء وانوکانی مزنین بنجاہ و استاد بوتگ کہ چہ آئی رند آئی خاصیں خادم و خاصیں طالب حضرت نافع رحمہ اللہ آئی پشپد داشتگ و آئی خالی کرتگیں جاگہ پر کرتت، چو بزان حضرت نافع، ابن عمرء خلیفہ و جاہگیر بوتگ، ہمے دابء امام مالک رحمہ اللہء اے شرف حاصل انت کہ آئی وتی بزرگواریں استاد امام نافع رحمہ اللہء جاگہ نشتگ و قران و حدیث و فقہ و فتویء درس داتگ، ہفتدہ سالء عمرء وانینگ و استادی شروع کرتگ و تاں ۶۲سال اے مبارکیں جہد و کار برجاہ داشتگ۔
امام مالک رحمہ اللہء حدیث وانگ وانینگء اے عادت بوتگ کہ بے دست نمازء نہ حدیث ونتگ نا کہ وانینتگ، چہ وانینگء ساری وضویا کہ [موسمء مطابقءَ] غسل کرتگ و نوکیں گد و پوشاک گورا کرتگ و وشبو و عطر و دُن کار گپتگ و نوں پہ اے مبارکیں منندیء نشتگ، گوں وتی طالب و مریداں امام مالک رحمہ اللہء حال اے بوتگ کہ آئی شاگرد گوشنت، عام حالان امام صاحب رحمہ اللہء سلوک و رفتار ہنچو بوتگ کہ مردما فرق کرت نکرتگ کہ طالب کئے انت و استاد کئے، بلئے وہدے حدیثء درس شروع بوتیں گڑا ما ہمے مرت کہ مئے استاد مارا درست نکنت (جاہ نیاریت) ما ہم نزانیں کہ اے مردم ہما مردم انت یاد گرے۔
چہ امام مالک رحمہ اللہء اللہءِ بازیں بندہےء حدیث و فقہء تعلیم و تربیت حاصل کرتگ کہ آیانی پورئیں حساب مشکل انت، بلئے گوشنت کہ آیانی حساب چہ سیزدہ صدء گیش انت۔ اے نامیئیں بزرگوار ہم امام مالک رحمہ اللہ شاگرد و طالب انت، امام محمد، امام شافعی، عبداللہ بن مبارک۔

امام مالک رحمہ اللہ بابتء ایدگہ بزرگوارانی خیال و لیکہ
امام اعظم امام ابی حنیفہ رحمہ اللہ: من چہ مالکء ابید دگہ چشیں کسے ندیستگ کہ زوت جواب بدانت و راست و صحیح جواب بدانت۔
امام شافعی رحمہ اللہ: اگر امام مالک و ابن عُیینہ مبوتین انت، حجاز سرزمین چہ علمء زبہر [محروم] بوت، امام مالک پہ انساناں چہ اللہ تعالیء گورا یک حجت و دلیلے۔
ابن قطان و ابن معین رحمہما اللہ گوشنت: امام مالک چہ اللہ طرفء یک حجت و دلیلے و تمامیں زانوگر ہمشورانت کہ امام مالک مزنیں علمی جاہء سرا انت۔
امام مالک رحمہ اللہ گوشیت تاں وہدے کہ منی علمی بود و لیاقت و فتوایانی علمی بوتگء ہفتاد بزرگواریں عالماں تصدیق نکرتت من ہچ گپےء سرا فتویٰ ندات، امام مالک رحمہ اللہ فرمان کنت کہ من ہر شپء وابء تہا حضرت رسول اللہ صلی اللہ علیہ وسلمء زیارت کرتگ۔
تاریخ نبیسوکانی گوشگ انت کہ اے گپ باز برا بوتگ کہ امام ابوحنیفہ و امام مالک چہ سر شپء تاں سہبء نمازء مسجد نبویء نشتگ و علمی و دینی مسئلہانی سرا پٹ و پول و گپ و تران کرتگ۔
عبداللہ بن مبارک رحمہ اللہ گوشیت کہ یک روچے درسء سرا من دیست کہ واجہء دیم دمان پہ دمان تکلیفء نشانی ظاہر بنت، وہدے درس ہلاس بوت من شت و چہ واجہء جست کرت کہ حضرت خیرانت کہ درسء دورانء تئی دیما تکلیفء نشانی گندگ بوتت، گوشتے ہو و منا زومےء دمان پہ دمان ڈنگ جتگت، بلئے منا حدیثء مبارکیں دیوان دل نبوت کہ من پاد آیان۔
امام مالک رحمہ اللہء بابتء اے گپ ہست انت کہ آئی ہچ بر مدینہ منورہء سواریء سرا سوار نبوت، تاں پیران سریء آئی عادت ہمیش ات، گوشتتے کہ اے خاک صحابہ کرام و رسول اللہ صلی اللہ علیہ وسلمء پاد جاہانی خاک انت، منا چہ اے خاکء ہمایانی وشیں بو محسوس بیت۔

آزمائش و صبر
خلیفہ منصورء زمانگء کہ چہ اشانی سببء بازیں فتنہ و بدعتےء سر چست کرتت، امام مالک رحمہ اللہء اے خلیفہ و اشی گماشتہانی پشتء نماز وانگ یلہ داتت، اے گپ پہ خلیفہء گران گوست، آئی وتی دمگء والی و گماشتہء را دستور دات کہ امام مالک رحمہ اللہء بلوٹائین و اے گپانی سزاء بدئے، آئی امام مالک رحمہ اللہء لوٹائینت و چابک و شلاق جت، باز سزا دات، بلئے گندوکانی گوشگ انت کہ ہر چابکےء لگّگء امام مالک رحمہ اللہ گوشت: ’’اے اللہ اشانء ہدایت بدئے چیا کہ اے نزاننت‘‘۔
اے ظالماں امام مالک رحمہ اللہ تاں ہما کچء جتگ کہ امام صاحب بیہوش بوتگ، ہمے بیہوشیء حالتء واجہء را چست کرتگ و آئی لوگا سرکنگ بوتگ، گوشنت کہ وہدے امام صاحب ہوشء اہت وتی کر و گورءِ نشگتیں مردمانء گوشت شما شاہد ببت کہ من اشانء معاف کرتگ۔
چہ امام مالک رحمہ اللہء اللہ رب العزتء باز کار گپت، بلئے چہ آ عظیمں کار پدان یکے آئی نام پرشتگیں کتاب ’’مؤطا‘‘ انت کہ حدیثء تہا اولی کتاب انت کہ وتی روچاں حدیثء مستندتریں کتاب بوتگ و رند کہ امام بخاری رحمہ اللہء وتی زمانگء اے کار کرت گڑا مؤطا آئی تقریبا سر پورہء وتی ’’الصحیح الجامع‘‘ (صحیح بخاری)ء تہا ہور کرتنت۔
تاں مزنیں زمانگےء امت و علمء خدمتء نور تالاں کنگء رند امام مالک رحمہ اللہ سنہ ۱۷۹ ہجریء چہ دنیاء شت و مدینہ منورہء مبارکین قبرستان ’’جنت البقیع‘‘ء درپ و جاہ بوت۔
رحمہ اللہ رحمۃ واسعۃ

سرچمّگ: راستیں راہ