نام: محمد
کنیت: ابوعبداللہ
قریشی ہاشمی انت و اے آئی نسب نامہ انت: محمد بن ادریس بن عباس بن عثمان بن شافعی بن عبد یزید بن ہاشم ابن مطلب ابن عبدمناف القریشی المطلبی۔
رسول کریم صلی اللہ علیہ وسلمء بن پیرک مطلب، امام شافعیء کٹمء بن پیرک انت۔
ودی بوگ
امام شافعی رحمہ اللہ سنہ ۱۵۰ ماں فلسطینء گلزمینء دنیاء اہت، نوک ورنائیء امام شافعی رحمہ اللہ علمء حاصل کنگء نیتء حجاز شریفء آرگ بوت، ہمے حالء ہمے پاک و مبارکیں سرزمینء امام شافعی ہفت سالگیء قران کریمء حافظ بوت و دہ سالگیء امام مالک رحمہ اللہء نامی ئیں کتاب مؤطاءِ ہم حافظ جوڑ بوت، ہمے درمیانء فقہ ہم حاصل کرتگ تاں کہ شانزدہمی سالء فتویٰ نبیسی کار گلائیش کرتگ۔
امام شافعی عربی ادبء تہا ہم مزنیں دستےء واہندات و چہ کوہنیں عربی شاعرانی شعر و گالان و علاوہ وتی جندء شعرے ہم بازتامدار و ادبی اتنت، بلئے گوشیت یک روچے من کعبہ شریفء دیوارء تکہ داتت کہ گوشئے یکے منا چہ پشتء توارا انت، ’’یا محمد علیک باالثقہ و دع الشعر‘‘ او محمد شعرء یلہ کن و پکّائین چیزء بزور بزان شعرء یلہ کن و قرآن و سنتء بزور۔
درس و تدریس
امام شافعی رحمہ اللہء خدمتء لہتے وہد نندگء رند امام شافعی بغدادء اہت و چیزے وہد ادء عالم و محدثانی گورا نشت و چہ اشان چیزے حاصل کرت و پدا مکہ مکرمہء شت و چہ اودا پدا یکبرے بغداد اہت و چہ ادا پدا مصر شت و ہمودا درس و تدریس شروع کرت، حالانکہ چہ اشی و پیسر ہم آئی ہمدا کہ وت طالب علمےء حیثیتء عالم و بزرگوارانی خدمتء شت و اہت وتی جندء فتوی و حدیثء اجازت ی ہم ہستت۔
امام شافعی رحمہ اللہ استاد
چونائیء امام شافعی رحمہ اللہ چہ بازیں بزرگوارےء علم حاصل کرتت، بلئے چہ آیاں امام مالک رحمہ اللہ و سفیان بن عُیینہ مشہورتر انت۔
امام شافعی رحمہ اللہء شاگرد
امام شافعی رحمہ اللہ شاگردانی تہا تپناک تریں نام امام احمد بن حنبل رحمہ اللہ انت، بلئے چوناء دگہ بازیں نامداریں محدث و فقیہاں امام شافعیء شاگردیء شرت ہم حاصل کرتگ۔
امام شافعی رحمہ اللہء حاضر دماغی و ہوشیاریء اندازہ چہ اے گپء جنگ بیت، کہ امام محمد رحمہ اللہ گوشیت کہ یک روچے امام شافعی رحمہ اللہء چہ من امام ابوحنیفہ رحمہ اللہء مشہوریں کتاب اوسط پہ امانتی زرت، وتی گورا ایوکء یک شپے و روچے داشت، ہمے دورانء کتاب اول تاں آخر یات کرت و کتابء جند منا واپس دات، امام شافعی رحمہ اللہء بزرگواریء اندازہ چہ اے گپء جنگ بیت کہ وت گوشیت کہ من کسان سالیء واب دیست کہ حضرت رسول کریم صلی اللہ علیہ وسلمء منا توار کرت من پسّہ دات لبّیک یا رسول اللہ صلی اللہ علیہ وسلم، منا واجہء فرمان کرت کہ منی نزدیکء بیا من رسول اللہ صلی اللہ علیہ وسلمء نزیکء اہتن واجہء منا گوشت وتی دپء پچ کن، من کہ دپ پچ کرت واجہ وتی مبارک لِبز منی دپء دات و دعائے خیر کرت کہ برو اللہ ترا خیر و نیک بختیء علم نصیب بکنت۔
امام شافعی رحمہ اللہ بیان فرمائینیت وہدے من اولی بر امام مالک رحمہ اللہء خدمتء حاضر بوتُن آواجہ منی بُرّ و گاڈگندگء رند جست کرت کہ تئی نام کئے انت، من عرض کرت کہ محمد! گڑا امام مالک رحمہ اللہء منا گوشت کہ محمد تقوی و نیک نیتیء راہا برو چیا کہ من گندگاءُن ہمے زوتاں اللہ تعالی چہ تو پہ امتء بلاہیں کارے گیرت، تاں زمانگے من امام مالک رحمہ اللہء خدمتء جاہمنند بوت ونت بلئے وہدے من واجہء را رخصت کرت گڑا امام مالک رحمہ اللہء منا روگء اجازت دات و منا لہتے نصیحت کرت:
او ورنا اللہء تئی دلء تہا نور ماں کرتگ، نوں تئی سرا لازم انت کہ اے نورء حفاظتء بکن، وتا چہ گناہان دور بدار چیا کہ گناہانی تہاری تئی دلء نورء چیر چنت۔
حضرت امام احمد بن حنبل رحمہ اللہ فرمان کنت؛ علم حدیثء تہا ناسخ و منسوخ، خاص و عام و مفصل و مجمل من نزانتگنت، بلئے وہدے من امام شافعی رحمہ اللہء خدمتء نندگ بنا کرت گڑا اے تمامیں چیز من چہ ہمائی سکت و یاد گپتنت۔
کتاب نبیسی
وہدے امام شافعی رحمہ اللہ مصر جاہمنند بوت گڑا اے دگہ دینی کارانی تڑبء تصنیف و کتاب نویسیء سلسلہ ے ہم شروع کرت و گوشنت کل آئی ۱۱۴ کتاب نبشت کہ چہ آیانی تہا نامی ئیں کتاب ’’الام‘‘ گیشتر نام مدار بوت۔
وفات
آخر کہ ہنچو کہ جیانء دود انت ہر یک ساہےء اے جاہ یلہ کنگی انت، امام شافعی رحمہ اللہء وتی زند روچ پورہ کرتنت و رجب المرجب ۲۰۴ ہجریء ماں مصر چہ دنیاء شت و ہمودا آئی آخری آرا مجاہ بوت۔
اللہ تعالی آئی قبرا چہ نورءَ پر کنات
سرچمّگ: راستیں راہ
چمشانک