بےبرجاهێں مالزانشت ءِ سوب بےبرجاهێں سیاست انت؛ گوست ءِ بےپکارێں سیاستاں یله کن ات

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (12 تیرماه 1405/ 3 جولای 2026)، گۆں اشاره به مردمانی نگێگێں مالزانشت ءُ رۆزیگی جاور ءَ بےبرجاهێں مالزانشت ءِ سوب ءَ بےبرجاهێں سیاست زانت ءُ پرے بےپکارێں سیاستانی یله دیگ ءُ نۆکێں ءُ راستێں سیاست ءُ رهبندانی زورگ ءَ کڈن کرت.

🔹حاکم ءِ مهمترێں اگده عدالت ءِ اێردارگ انت؛ نابرابری ءُ بےعدالتی په حاکم ءَ المی حرام انت

په سنی‌آنلاین ءِ سرهال ءَ مولانا عبدالحمید درشان کرت: جهاد تهنا جنگ گۆں ملگراں نه انت، بلکه عدالت ءِ اێردارگ په حاکماں ٹوهترێں جهاد انت ءُ هچ حاکمے اگده ءُ فریضه ئے مهمتر شه عدالت ءِ اێر دارگ ءَ نه دار ایت.

واجه ءَ گێش کرت: حاکم بائد وتی استمان ءَ برابر چار ایت. په حاکم ءَ المی حرام انت که عدالت ءَ نادلگۆش کنت ءُ نابرابری ئے آماچ بیت. نابرابری گۆں اسلام ءَ چپ انت. اسلام ءَ عدالت، آمید ءُ گشتانک ءُ ند ءِ آزاتیانی بابت ءَ سک کڈن کرتگ.

🔹شه جوانێں شرگداریاں وشال به ات ءُ شرگداراں بندیگ مه کن ات/ ھما مردماں که وڑوڑێں سکیانی باروا زھرشانی اش کرتگ، آوان «محارب» ءِ حکم مه جن ات

زاهدان ءِ آدێنگ ءِ امام ءَ گوشت: اگاں جوانێں شرگداری ماں چاگردے مه بیت، گڑا آ چاگرد شیطانیانی نێمگ ءَ روت ءُ شه راستێں راه ءَ در بیت. حاکم ءُ کارمستراں بائد چاگرد ءِ شرگداراں ءُ دۆزواهاں هاسکار عالم ءُ زانشتجاهیاں وشاتک کن انت. زانتشجاهی، اسپےریش ءُ عالماں هم بائد حق ءِ گپ ءَ جن انت ءُ اصلاح ءِ پکر ءَ به انت.

واجه ءَ کارمسترانَ گوشت: آوان که لێکه ءِ واهند انت ءُ دۆزواه انت، گۆں آوان شور کن ات ءُ گپان اش گۆش دار ات. به هل ات مردماں گپ جن انت. شرگداراں دزگر مه کن ات.

زاهدان ءِ آدێنگ ءِ امام ءَ گێش کرت: ھما مردماں که وڑوڑێں سکیانی باروا زھرشانی اش کرتگ، آوان «محارب» ءِ حکم مه جن ات؛ اے وشێں کردے نه انت. «محاربه» که ماں قرآن پاک ءَ یهتگ هاسێں بزانتے دار ایت ءُ «محاربه» ءِ گهترێں بزانت هما چیزے که واجه رسول الله ﷺ ءُ مهتر علی ءُ خلفای راشدیناں شه قرآن ءِ پاگپ ءَ داشتگ.

🔹گوستگێں سیاستاں کار نه کرتگ؛ نۆکێں سیاست ءُ رهبند درگێجگ بیت/ ماں نونێں جاور ءَ کارمسترانی مهمترێں اگده مردمانی زندمان ءِ گهبودی انت

مولانا عبدالحمید وتی هبرانی دێمتر ءَ درائێنت: ملک ءِ ته ءَ مالزانشتی مشکلاں سک باز انت. زر ءُ مالزانشت نگێگی ءُ بےبرجاهی ءِ آماچ انت ءُ اے چیز ءِ سوب بےبرجاهێں سیاست انت.

واجه ءَ گێش کرت: اگاں ملک ءِ ته ءَ سیاسی برجاهی ءُ عدالت ءُ آمید بیت ءُ ملک ءِ ملکاریاں راستێں وڑے به انت، گڑا مچێں سکیاں که یکے شه آوان مالزانشت انت، جۆڑ به انت ءُ ملک ماں هچ پڑے ناهمسنگی ءِ آماچ نه بیت.

زاهدان ءِ آدێنگ ءِ امام ءَ کڈن کرت: کته‌کاری ءِ رد ءَ گوستگێں سیاستاں بےپکار بوتگ انت. بےپکارێں ملکاری ءُ رهبنداں یله کن ات ءُ جاور ءِ رد ءَ سیاست ءُ نۆکێں رهبند درگێج ات تاں مردمانی وشنودی ءَ کٹ ات. ماں نونێں جاور ءَ کارمسترانی مهمترێں اگده ملک ءِ سکیانی رندگیری ءُ ایران ءِ مردمانی زندمان ءِ گهبودی انت.