ڈاکٹر حبیب‌الله سالارزهی ءِ نمازجنازه برجم دارگ بوت

ڈاکٹر حبیب‌الله سالارزهی ءِ نمازجنازه ءِ دیوان مرۆچی دۆشمبے ءَ (29 شهریور/20 سپتمبر) شه پێشین ءِ نماز ءَ پد ماں مسیت مکی ءَ برجم دارگ بوت.

واجه شیخ‌الاسلام ءَ اے دلپدردی ءَ تیوگێں مردماں هاسکار ڈاکٹر ءِ کهول ءُ هلاکه‌دار ءُ آئی همرئشاں دل‌تسلایی گوشت و درائێنت ئی: «ڈاکٹر رحمه‌الله شه هلاکه ءِ مزن‌سسا ءُ علمی واجه‌کاران ات، توانێں گوشێں که آئی شه ملک ءِ مزن‌سسائان ات. جهدکار ءُ وانۆکے ات که آئی گهوانی سک باز ات ءُ وتی اگدهانی ته ءَ سۆبێن بوتگ. دیندارے ات که هچ کس ءِ دلء نه پرۆشتگ ات.»

واجه ءَ دێمتر ءَ گوشت: «اے ناگتێں بێرانی ءِ منگ په چاگرد ءَ گران انت که آوان باور کن انت که ڈاکٹر ءَ وت‌کشی کرتگ، پچےکه پهکاں زان انت که آئی باخدائێں مردے بوتگ ءُ نمازتهجد ء ونتگ، کسےکه وت‌کشی کنت آئی سزا الله ءِ کر ءَ گران انت، پمێشا ما شه هلاکه‌دار ءُ هلاکه ءِ کامستر ءُ شورای تامین ءِ باسکاں لۆٹێں که اے باروا بےدۆزواهی ءَ پٹءُپۆل کن انت تاں گواچن درا بیت.»

واجه ءَ همےرنگ شه کارمستراں لۆٹ ات تاں مردماں شه پٹءُپۆلانی آسر ءَ سهی کن انت.