مهسا امینی ءِ پێشامد ملک ءِ مردمانی جنز ءِ سوب بوت

اگں کارمستراں مردمانی هبراں بُشکتێں، هم‌ملکیاں کُشَگ نه بوت انت ءُ ملک اے جاور ءِ دۆچار نه بوت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (27 شهریور 1405/ 18 سپتمبر 2026) گۆں اشاره به مهسا امینی ءِ مرک ءِ سالگشت ءَ ءُ پد ءِ «تهلێں ءُ ناوشێں پێشامداں» گوشت: اگاں کارمستراں مردمانی هبراں بُشکتێں ءُ آوانی حقێں لۆٹاں منتێں ءُ ملک ءِ ته ءَ بدلی بیاورتێں، مردماں کشگ نه بوت انت ءُ مرۆچی ملک اے جاور ءِ دۆچار نه ات.

🔹گوستگێں سالانی زهرشانیانی ته ءَ بازێنے شه مئے هم‌ملکیاں بێران بوتگ انت؛ وتی همدردی ءَ گۆں دردمندێں کهولاں جار جن اێں

په سنی‌آنلاین ءِ سرهال ءَ مولانا عبدالحمید درشان کرت: اے رۆچاں همدپ انت گۆں مهسا امینی ءِ پێشامد ءَ که ملک ءِ ته ءَ جنزے ءِ سوب بوت ءُ هم‌ملکیاں زهرشانی کرت. چنکه وهد پد ءَ زاهدان ءِ مصلا ءِ پێشامد بوت که بازێں مردمے شهید بوت انت. همےرنگ آبان 98 ءِ زهرشانیاں ءُ 1404 ءِ دی‌ماه ءِ دلبرێجۆکێں پێشامد پێش آت انت.

واجه ءَ گێش کرت: بژن انت که ماں آ زهرشانیاں بازێنے شه هم‌ملکیاں بێران بوت انت ءُ بازێں کهولے دردمند بوت انت. اے پێشامداں سک تهل ءُ ناوش ات انت ءُ ما گۆں پهکێں ایرانیانی غم ءَ شریدارێں ءُ گۆں آوان همدردی کن اێں.

🔹گهترێں ءُ آسان‌ترێں راه مردمانی هبرانی گۆش دارگ ات/ کارمستراں، زانتکاراں ءُ اسپےریشاں مردمانی هبراں بُشکن انت ءُ ترندێں هبراں سگ انت

زاهدان ءِ آدێنگ ءِ امام ءَ گوشت: اگں کارمستراں مردمانی گپاں گۆش داتێں ءُ آوانی حقێں لۆٹاں منّتێں ءُ ملک ءِ ته ءَ بدلی بیاورتێں، مردماں کشگ نه بوت انت. مردمانی هبرانی گۆش دارگ گهترێں ءُ آسان‌ترێں راه ات که هم الله ءُ هم مردمانی وشنودی ءِ سوب بوت ءُ هم واجه رسول الله ءُ آدگه پیغمبرانی سیرت ءِ رد ءَ ات.

واجه ءَ گێش کرت: رسول الله صلی‌الله‌علیه‌وسلم ءَ اینکس مردمانی هبراں گۆش دات که منافق/ بنڈان گوشت «هو أذن»؛ آ هرچی گۆش دار ایت. درێگی مئے کارمستراں هم اشکنۆکێں گۆش داشتێں ءُ مردمانی هما ترندێں گپاں هم گۆش داشتێں. کارمستراں، زانتکار ءُ اسپےریش ءُ آوان که مردمانی رهشۆن انت، بائد مردمانی گپاں گۆش دار انت ءُ آوانی ترندێں هبر ءُ بنڈاں سگ انت، اے چیز پهکانی خیر ءَ انت.

 مولانا عبدالحمید ٹکاٹک گوشت: اگه کارمستراں مردمانی حقێں لۆٹاں دلگۆش کرتێں، مرۆچی ملک اے سکێں جاور ءِ دۆچار نه ات ءُ حتا اے جنگ ءِ آماچ نه اتێں. اگاں ایران ءِ دژمن ءُ درآمدێں زۆرآوراں زانتێں که ایران ءِ ته ءَ هچ اختلافے نێست ءُ مردم ءُ حکومت گۆں وت یکےانت ارش ءِ هێمات ءَ نه کرت اش.

🔹درملکی ءُ نیابتی واکاں ایران ءِ ته ءَ میار ات؛ گهترێں سیاست همێش انت که ایرانیانی جند ءَ کارمرز کن ات

زاهدان ءِ آدێنگ ءِ امام ءَ ماں دگه بهرے شه وتی هبراں گۆں اێراد شه درملکی ءُ نیابتی واکانی آرگ ماں ملک ءُ هلاکه ءَ گوشت: هالانی رد ءَ درملکی ءُ نیابتی واکاں ملک ءُ سیستان ءُ بلوچستان ءَ آرگ بوتگ انت. منی دیدانک ءَ اے سیاست سۆبێں نه بیت. منی باور ءَ کارمستراں مردمانی سر ءَ برۆسه کن انت، چیا که دمگی مردماں توان انت دشمنانی دێم ءَ بۆشت انت.

واجه ءَ کڈن کرت: درملکی راج ءُ مذهباں ملک ءِ ته ءَ میار ات. ایران، ایرانیانی ملک انت ءُ راستێں سیاست همێش انت که ایرانیانی جند کارمرز به انت.

🔹 انوگێں پاهوانی ته ءَ گێشتری بهر «بلوچ ءُ کُردانی» بوتگ

مولانا عبدالحمید درشان کرت: بژن انت که پاهو باز بوتگ ءُ گێشتری پاهواں «سیاسی» انت. سیاسی پاهو گۆں اسلامی ءُ شرعی ءُ میان‌استمانی کانود ءُ دنیا ءِ رسم ءَ چپ انت.

واجه ءَ درائێنت: ماں انوگێں پاهواں بازێں ایرانی ئے کشگ بوتگ انت، بلێں کُرداں ءُ بلوچاں گێشتری بهر ءَ داشتگ. بژن انت که بازێں مردمے که پاهو دیگ بوتگ انت، بلوچستان ءِ مردم انت.

🔹مردماں گشنگ انت، پچے گشنگاں پاهو دےات؟! ماں نونێں جاور ءَ پاهو په نشه ئی موادانی سوب ءَ شرعی ءُ کانودی توجیه ئے نه دار ایت

زاهدان ءِ آدێنگ ءِ امام ءَ درائێنت: گێشتری پاهوانی سوب نشه ئی مواد انت، وهدےکه همے رۆچاں خشخاش ماں هلاکه ءَ کِشگ بیت ءُ تریاک جۆڑ بیت، اێشی باروا هچ مکنے نه بوتگ، گڑا پاهو په تریاک ءِ باپار ءَ کجام میان‌استمانی کانود ءُ شریعت ءِ رد ءَ توجیه بوتگ؟! اے چه کانودے که یک زمانے نبشتگ بوتگ ءُ شما انگت آیرا اێر دار ات!

واجه ءَ ٹکاٹک گوشت: مرۆچی مردم گشنگ انت ءُ کیتو ءُ لاپ اش هۆرک ان ءُ سکێں جاور ءِ دۆچار انت، شما پچے گشنگاں پاهو دےات؟!

🔹ترۆندی، ترۆندی کار ایت، شه هرکس ءِ نێمگ ءَ بیت؛ گهترێں راه «ترانکاری» انت

مولانا عبدالحمید وتی هبرانی دێمتر ءَ گۆں اشاره به ترۆر ءُ ناامنیانی گێش بوگ ءَ ماں ڈیه ءَ، مردم ءُ حکومت ءَ په پهرێز شه ترۆندی ءَ په امنیت ءِ واستا سۆگه ءُ کڈن کرت: بژن انت که اے رۆچاں ترۆر ءُ ناامنی ءُ ترۆندی باز بوتگ. پهکاں دلگۆش کن انت که ترۆندی، ترۆندی کار ایت، نبائد ترۆندی بیت. ترۆندی اگں شه مردم یا واکانی نێمگ ءَ بیت، ترۆندی ءِ سوب بیت، گهترێں راه «ترانکاری» انت.

🔹مکه مکرمه ءِ سر ءَ بوتگێں ڈرۆن ارش ءَ مچێں مسلمانانی دلاں پدرد کرت/ حرمێن ءِ ڈگار «حرمت» دار ایت ءُ اے حرمت هروڑ ءَ بائد پهازگ بیت

زاهدان ءِ آدێنگ ءِ امام ءَ وتی هبرانی گڈسر ءَ گوشت: ڈرۆنے که مکه مکرمه ءِ نێمگ ءَ آس دیگ بوت، تیوگێں مسلمانانی دلانی پدرد کرت. اے کرد شه هرکس ءِ نێمگ ءَ بیت بائد ملامت ءُ اێرجنگ بیت.

واجه ءَ ٹکاٹک گوشت: حرمێں شریفین ءِ ڈگار حرمت دار ایت. بائد هر وڑ ءَ اے ڈگارانی حرمت ساتگ بیت. بلکه اے ڈگارانی حرمت که مسلمانانی باورا مقدس‌ترین جاگه انت، شه دنیا ءِ پهکێں مردماں مسلمان ءُ نامسلمانانی نێمگ ءَ پهازگ بیت.