ملک ءِ مالزانشت تباهی ءِ تک ءَ سر بوتگ

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (13 شهریور 1405/ 4 سپتمبر 2026) مردمانی زندمان ءُ رۆزیگی جاور ءَ سک ءَ نگێگ زانت ءُ گۆں اێشی بیان ءَ که مالزانشت سک خراب انت، گوشت ئی گهترێں توجیل په ملک ءِ رکێنگ ءَ شه اے گپچل ءَ سهل ءَ انت.

🔹مردمانی مالی جاور سک ءَ نگێگ انت ءُ زندماناں بن‌بست ءِ آماچ بوتگ انت

په سنی‌آنلاین ءِ سرهال ءَ مولانا عبدالحمید درشان کرت: اے رۆچاں ناداری ءُ مالزانشتی مشکلاں مردمانی ٹوهترێں گڑتی انت. ملک ءِ مالزانشت سک خراب انت. دلار ءِ نهاد رۆچ‌په‌رۆچ برز روت ءُ راجی زر بےارزشت بوتگ.

واجه ءَ گێش کرت: مردمانی مالی جاور سک ءَ نگێگ انت ءُ مردماں ماں زندمان ءَ بن‌بست ءِ آماچ بوتگ انت. دکاناں گراک نه دار انت ءُ گراکاں گرگ ءِ وس ءَ نه دار انت. هچ کس زندمان ءِ هژدری وازمندیانی پجائێنگ ءِ وس ءَ نه دار ایت ءُ استمان سکێں جاورے را گوازێن ایت.

🔹تانسرپسنداں مردمانی دلاسۆز نه انت؛ کارمستراں مردمانی پگر ءَ به انت/ گهترێں راه په ملک ءِ رکێنگ ءَ سهل انت

زاهدان ءِ آدێنگ ءِ امام ءَ کڈن کرت: کارمستراں بائد مردمانی پگر ءَ به انت. په کارمستراں هچ اگده ئے شه مردمانی مشکلانی رندگیری ءَ مهمتر نه انت. ایران شاهگانێں ملکے گۆں نزیک به نود ملیون مردم ءَ، اے ملک ءُ آئی مردمانی مشکلانی رندگیری کارمسترانی اگده انت.

واجه ءَ درائێنت: کارمستراں نبائد تانسرپسندانی کرداراں چار انت که آ هچ مردمانی پگر ءَ نه انت. آ کارمستراں که پراستی مردمانی دلاسۆز انت بائد مردمانی پگر ءَ به انت که تاوانانی دێم ءَ گر انت. گهترێں توجیل سهل انت. کارمستراں سهل کن انت تا ملک شه اے گچپلاں رک ایت.

🔹اُرشے که ماں سیریک ءَ آرۆسان ءِ سر ءَ بوت ءُ همےرنگ میناب ءِ جنکانی دربرجاه ءِ سر ءَ بوت، سک دلبرێجۆک ات؛ ما اے جنایتاں اێر جن‌اێں

مولانا عبدالحمید گۆں اشاره به امریکه ءِ ارشاں گوشت: ماں ارشے که سیریک ءِ مێتگ، بندرکوهستگ ءَ بوت، آرۆسانے هم نشانگ کنگ بوت که 5 مردم شهید ءُ 60 ٹپی بوت انت که گێشتری جنێں ءُ زهگ بوتگ انت. ماں میناب ءِ جنکانی وانگجاه ءِ سر ءِ ارش ءَ هم بازێں نۆدربرے شهید بوت انت. اے پێشامداں سک دلبرێجۆک انت ءُ ما آوان اێر جن‌اێں.

واجه ءَ گێش کرت: آوان که آرۆسان ءُ وانگجاه ءَ بمگواری کرت که بازێں بےمیارێں مردمے شهید کنگ بوت انت، بائد پسو دےانت.

🔹هلوچ‌گری ءُ باج ءِ لۆٹگ ظلم انت به وتی جند ءِ ءُ استمان ءِ سر ءَ/ هلوچ‌گر ءُ باج لۆٹاں شه مظلوم ءِ آه ءَ ءُ الله ءِ عذاب ءَ ترس انت

زاهدان ءِ آدێنگ ءِ امام ءَ مردمانی سر ءَ ظلم کنگ ءَ سک اێر جت ءُ هلوچ‌گری ءُ باج ءِ لۆٹگ ءَ ظلم زانت ءُ گوشت ئی: مردمانی مال ءُ آبرو ءِ پادمالی ظلم انت. هلوچ‌گری چه په وامانی گرگ ءَ بیت یا په باج ءِ لۆٹگ ءَ ٹوهترێں ظلم ءُ جنایت انت ءُ پهکان اے رڈێں پدرائشت ءِ دێمداری ءَ کن انت که دشمنی گۆں الله ءَ ءُ آئی بندگان انت. په وتی وامانی گرگ ءَ کانود ءِ رد ءَ کرد کن ات. شرع ءُ کانود ءِ رد ءَ نه توان ات دگه مردمے را په وامانی بابت ءَ اسیر ءُ بندیگ کن ات.

واجه ءَ هلوچ‌گران ڈاه دات که شه الله ءِ عذاب ءُ مظلومانی آه ءَ ترس ات ءُ هلوچاں آزات کن ات ءُ شه اے بدێں کرد ءَ توبه کن ات، پچےکه اگه توبه مه کن ات گۆں الله ءِ عذاب ءَ دێم‌په‌دێم به ات که نه توان ات شه آئی دێم ءَ جی ات.

شیخ‌الاسلام ءَ گێش کرت: آوان که هلوچ‌گری کن انت لۆٹ انت ڈیه ءِ مردمان بنّام کن انت که صداں سال انت په شرف زند اش گوازێنتگ. هچ ٹکے ردکارێں مردمان وتی ڈیه ءَ مه هل ایت. مردم ءُ اسپےریشاں وتی وس ءِ کساس ءَ اے پدرائشت ءِ دێم ءَ بۆشت انت. کارمستراں هم وتی اگده ءِ رد ءَ کرد کن انت.

🔹ملک ءِ مانگ ءُ امنیت ءِ شرط عدالت ءِ اێردارگ انت/ ظالم چوناهی ءَ وتی رۆتگ ءَ گۆں تپر ءَ جنت

مولانا عبدالحمید درائێنت: عدالت سک هژدری انت ءُ په ملک ءِ مانگ ءُ امنیت ءَ شرط انت. بائد وڑوڑێں پاٹی ءُ مردمانی میانجین ءَ عدالت اێر دارگ بیت. بیت‌کنت که الله پاک آ ظلم ءَ سگ ایت که آئی جند ءِ باروا بیت ءُ آئی انگڑێنگ ءَ په قیامت ءَ به هل ایت، بلے ظلمے که بندگانی سر ءَ بیت، آیرا سگ ات نه کن انت ءُ همے دنیا ءَ سزا دنت. فرعون ءَ که بنی‌اسرائیل ءِ سر ءَ ظلم کرت همے دنیا ءَ گۆں الله ءِ عذاب ءَ دۆچار بوت.

واجه ءَ گێش کرت: ظالم هرکس بیت، چوناهی ءَ وتی رۆتگ ءَ گۆں تپر ءَ جنت. بائد انت شه ظلم ءَ پلگار بیت، نه بائد کسے ناحق ءَ بندیگ بیت یا زرءُمال ئی واهندی به انت. چۆروهانی حقاں کمار به انت. آوانی که چۆروهانی مالاں ور انت، چوناهی ءَ جهندم ءِ آچش ءَ ور انت. گڈبهر، گڈبرۆکانی شرعی حق انت؛ جنک ءُ گهارانی حقاں ماں گڈبهر ءَ کمار کن ات.

واجه ءَ گوشت: بدترێں ظلم که الله ماں دنیا ءَ عذاب دنت، ظلمے انت که مردمانی سر ءَ بیت، پمێشا په سار به ات که مردمانی آه ءُ بدێں دعا شمے پد ءَ مه بیت. الله پاک سیده مظلوم ءِ کوکار ءَ اُشکنت ءُ آیرا پسو دنت.