بندشانی گێش کنگ، کش‌ورۆکێں جنگ ءُ وس کرتن گوستگێں سیاستانی سر ءَ، ملک ءَ گێشترێں گپچلانی نێمگ ءَ تێلانک دنت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (20 شهریور 1405/ 8 سپتمبر 2026) وتی بژن ءَ شه مردمانی مالزانشتی ءُ رۆزیگی جاور ءَ درشان کرت ءُ بندشانی گێش کنگ ءُ کش‌ورۆکێں جنگ ءَ ماں اے مشکل ءُ گپچلانی گێش بوگ ءَ اثرمند لێک ات ءُ شه گوستگێں سیاستانی برجاهی ءَ ءُ کارمسترانی نادلگۆشی ءَ سک اێراد گپت.

🔹مردماں ماں زندگی ءَ سکیانی آماچ انت/ بازێنے رۆزیگی مشکلانی پارءَ وت‌کشی کرتگ

په سنی‌آنلاین ءِ سرهال ءَ مولانا عبدالحمید درشان کرت: شه یک نێمگ ءَ مالزانشتی بندشاں که نزیک به بیست سال انت برجاه انت ءُ شه دگه نێمگ ءَ کش‌ورۆکێں جنگ ءَ ملک ءَ گێشێں گپچلانی نێمگ ءَ کش انت.

واجه ءَ گێش کرت: هررۆچ دلار ءِ نهاد برز روت ءُ راجی زر بےارزشت بیت. گران‌نهادی سوب بوتگ احتکار باز بیت ءُ کٹءُکاراں تاوان گند انت. مردماں ماں زندمان ءَ سکیانی آماچ انت. کارمستراں شه مردمانی جاور ءَ پوره سهی نه انت. بوتگ که پِساں یا ڈاکٹر ءُ وانندهاں ءُ چاگرد ءِ وڑوڑێں پاٹیاں رۆزیگی مشکلانی پارءَ وت‌کشی کرتگ.

🔹ملک ءِ گپچلانی سوب «سیاسی بن‌بست» انت/ پچے کارمستراں په مردمانی مشکلانی گیشءُگیوار ءَ توجیلے در نه گێج انت؟!

زاهدان ءِ آدێنگ ءِ امام ءَ ملک ءِ سکی ءُ گپچلانی سوب ءَ سیاسی بن‌بست زانت ءُ گوشت ئی: تیوگێں سکی ءُ مشکلانی رۆتگ سیاسی بن‌بست انت. مدام گۆں دلاسۆزی ءَ ڈاه داتگ اێں که هستێں سیاستاں ملک ءَ بن‌بستانی نێمگ ءَ تێلانک دےانت، بلے ارمان که آ ڈاه ءُ کوکاراں دلگۆش کنگ نه بوت انت.

واجه ءَ ٹکاٹک گوشت: نون ملک گرانێں بن‌بستانی دۆچار انت ءُ ارمان که هچ رهبندے هم په درکپگ شه اے جاور ءَ نه انت. دیدانک ءِ واهنداں ءُ آزاوراں هچ رۆژنائێں آیۆکے پرے جاور ءَ نه گند انت. مردم ءُ سسا ءِ واهنداں بهمانگ انت که اے وَ چه جاورے که ملک آئی دۆچار انت ءُ پچے کارمستراں پرایی توجیلے در نه گێج انت! کارمستراں ءُ سرکار بائد پێش شه هر چیز ءَ مردمانی پگر ءَ به انت، گۆں مردماں شور کن انت ءُ په سکیاں توجیل درگێج انت. اے جاور ملک ءَ گرانێں گپچلانی آماچ کنت.

🔹کرانه باختری ءِ ته ءَ بازێں شهرک ءِ جۆڑ کنگ «راجی ءُ مذهبی پاکسازی» انت؛ یورپی ملکانی گامگێج اے کارروائی ءِ چپ ءَ «ستاکرز» انت

مولانا عبدالحمید درائێنت: شهرک‌ساچی ماں کرانه باختری ءَ ءُ یهودیانی جاه دیگ ماں آ ڈیه ءَ یک رنگ راجی ءُ مذهبی پاکسازی ئے که دو ملکی ءِ رهبند ءَ ءُ فلسطین ءِ جتائێں ملک ءِ جۆڑ کنگ ءَ المی ئێں سکیانی آماچ کنت.

واجه ءَ گۆں وش آتک شه لهتے یورپی ملکانی گامگێجاں گوشت: دوازده یوروپی ملکاں هوار گۆں انگرێز ءَ اراده کرتگ که شهرکانی جۆڑ کنگ ءِ سر ءَ بندش جن انت که په دێمپانی شه انسانی حقانی واستا ستاکرزێں گامگێجے.

زاهدان ءِ آدێنگ ءِ امام ءَ درشان کرت: بژن انت که اسلامی ملکانَ نون وار نه بیت که شه فلسطین ءِ مردماں دێمپانی کن انت، چیا که گۆں وت جنگ ءَ انت ءُ شه وت ءَ ترس انت. اے بدترێں تلگے که مسلماناں آئی دۆچار انت ءُ وارے په اسرائیل ءِ تانسرپسنداں.

مولانا عبدالحمید درائێنت: فلسطین ءِ جتائێں ملک ءِ جۆڑ کنگ په میان‌رۆدرآت ءُ دنیا ءِ مشکلانی گیشءُگیوار ءَ راسدێمێن پدکردے دار ایتءُ اگں اسرائیل تیوگێں فلسطین ءِ ڈگاراں واهندی ءُ شهرک‌ساچی کنت، انگت جنگ ءُ مێڑ هلاس نه بیت.