نوشکی ءَ ماتی زبانانی میان اُستمانی روچ ءِ درگت ءَ مراگش

نوشکی ءَ زند اکیڈمی ءُ پریس کلب ءِ نیمگ ءَ چہ میان اُستمانی ماتی زبان ءِ روچ ءِ درگت ءَ مروچی مراگش ءِ برجاہ دارگ بوتگ کہ اود ءَ شائر، ادیب، زانتکار، اھوالکاراں ھوار دگہ پگری منوگراں بھر زرتگ.

مراگش ءَ زند اکیڈمی ءِ کماش یارجان بادینی، شبیر رخشانی، نوشکی پریس کلب ءِ کماش حاجی طئیب یلانزئی ، اھوالکار سعید بلوچ ، لطیف الملک بادینی، غمخوار حیات، ڈاکٹر عالم عجیب، وحید عامر بلوچ ءُ دگہ مردماں وتی ھیال درشان اتگ انت.

مراگش ءَ تران کنان ءَ آھاں گوشتگ کہ ھر راج ءِ وتی ھیالانی درشان کنگ ءِ ھاتر ءَ درساں چہ شرتر آھانی ماتی زبان انت. ھر چاگرد ءِ زانتکار وتی ڈیھ ءَ گوں ھمگرنچ بنت، آھانی سیادی گوں ڈیھ ءِ ھاک ءَ مھکم بیت گڑا آ ڈیھانی راج وتی دود ءُ ربیدگ، وتی زبان ءُ وتی راجدپترے سر ءَ پھر کن انت.

آھانی گوشگ ات کہ چہ وتی ماتی زبان ءَ زانت ءِ دربرگ ھر چُک ءِ بُنکی ھک انت ، بلکیں اے گپ پدّر اِنت کہ دنیا ءِ دیمروئی کنوکیں راجاں چہ وتی ماتی زبان ءَ دربرتگ ءُ دیمروئی کُتگ.

مراگش ءِ گڈسر ءَ کراداد دیم ءَ آرگ بوتگ کہ آئی ءِ تہ ءَ ھمے بوتگ کہ بلوچی ءُ براھوی زبان بنداتی زانت ءِ تہ ءَ المّی کنگ بہ بیت، سبی بگر تاں مھر گڑ ءِ دگ ءُ اود ءَ میوزیم جوڑ کنگ ، بلوچی ءُ براھوی زبان ءَ تاکاری، چینلز ءُ بی بی سی ءُ وائس اف امریکہ چینلانی تہ ءَ بلوچی براہوی ءَ مراگش برجاہ دارگ بہ بنت.

سرچمگ: ڈی بلوچستان پوسٹ