لگوری یا وشنامی

زاهدان و سرحد ءِ نمازیانی ناحقین کوش ءَ، مروچی اگان بلوچ گون هر فکر و نگاهے ایر مه جنت منی هیال ءَ آیی ءِ بلوچ بیگ ءَ مردم باید شک به کنت. گوستگین روچ ءَ چهبار ءِ وکیل بلوچ و بلوچستان ءِ مظلومیت ءِ توار چِست کت. اے جوانین کارے اَت.هر وکیلے اُگده و ذمّه اِنت. البت مروچیگین پرلَبّ و تماهین دور ءَ که هر کس وتی ذاتی نپ و تاوان ءَ چاراِیت وکیل ءَ شاباش اِنت. دریچے وکیل صاحب واے دگه وکیلان هما اَولی روچان بلوچ ءِ مظلومیت اِش جار به جتین. مروچی سرجمین جهان زانت که گون بلوچ راج ءَ دان چه حدّ ءَ ظلم و بے انصافی بیگ اِنت. مروچی معین سعیدی ءَ مخالف و موافق ساڑا اَنت بلے مارا دگه ۷ بلوچ و غیر بلوچین وکیل هم هست آ پرچا بے توار اَنت.اے سَکّین وهد ءَ اگان کسے حق ءِ نیمگ ءَ مه اُوشت اِیت،اَلّم ءَ تاریخ آئی ءَ هچ رنگ ءَ نه بکش اِیت. ما را چه سیستانی نمایندهان که لهتے مان زاهدان ءِ حوزه بلوچانی نمایندگی ءَ کنگ اَنت هم همے توقع و امیت هست اِنت، که وتی موکّلانی ناحقین کوش ءَ توارے چست به کن اَنت. بلوچ گوش اَنت که بنّامی و وشنامی ءِ درمیان ءَ کسانین راهے، مروچی هر بلوچے اگان شیخ الاسلام ءِ کش ءَ په مردی مه اُوشت اِیت آ تُورے هرکس به بیت تاریخ آیی ءَ میاریگ کنت مروچی لگوری و وشنامی جو په دور کنگ ءَ تَنک اِنت قول شاعر علامه روانبد ءَ:” تنک په دور ءَ لَجّ ءِ جو/جُتک جن اَنت شُومین کسو” بلوچ اگان ظلم و زیادتی هم دیستگ بلے په ٹهل و مڑا سرئے چِست اِنت که ظلم و زور ءِ دیم ءَ نه جُکّ اِتگ. بلوچ په وت تهنا نه ، په میار ءَ هم مرتگ. گڑا وشنیاتک به زان اَنت اے سَکّین وهد ءَ هم بلوچ وت ءَ وژنام کنت.
سَرجَهلی و چم جَهلی جَهل گِندان مراد بات اَنت/ سَر بُرز بلند بات اَنت سَربُرز و بُلندانی(سید)

۱۶آبان۱۴۰۱