حکومتانی مانگ ءِ راه «عدالت ءِ اێر دارگ»، «باز بروردێں مالزانشت» ءُ «مردمانی وشنودی» انت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (2 مرداد 1405/ 24 جولای 2026)، عدالت ءِ اێردارگ، کانودی آزاتیانی پجائێنگ ءُ بازبروردێں مالزانشت ءَ شه حکومتانی مانگ ءِ راهاں زانت ءُ گۆں اێشی گوشگ ءَ که الله ءِ وشنودی گۆں مردمانی وشنودی ءَ انت، ٹکاٹک درائێنت ئی: هچ حکومتے بےمردمانی وشنودی ءَ نه توانت مان ایت.

🔹ماں جوانێں ءُ بازبروردێں مالزانشت ءَ گُشنگاں سێر به انت؛ نه که سێراں گشنگ به انت

په سنی‌آنلاین ءِ سرهال ءَ مولانا عبدالحمید گوشت: هر حکومتے ءِ مانگ ءُ پهازگ ءِ تهنائێں راه اسلامی بیت یا غیراسلامی، عدالت ءُ آمید ءِ اێردارگ، کانودی ءُ میان‌استمانی آزاتیانی پجائێنگ ءُ جوانێں سیاستانی اێر دارگ انت.

واجه ءَ وتی هبرانی دێمتر ءَ جوانێں ءُ بازبروردێں مالزانشت ءَ یکے شه حکومتانی مانگ ءِ سوباں زانت ءُ گوشت ئی: حکومتانی مانگ ءِ راه باز بروردێں مالزانشت انت که گشنگاں سێر به انت، نه که سێراں گشنگ به انت. مالزانشتے که ملک ءِ راجی زر ارزشت داشته بیت ءُ گۆں دنیا ءِ زراں رقابت کنت.

🔹اگه مردم وشنود به انت، الله هم وشنود بیت

زاهدان ءِ آدێنگ ءِ امام ءَ «الله ءُ مردمانی ساتگ» ءَ هم شه حکومت ءِ مانگ ءِ سوباں زانت ءُ درشان ئی کرت: الله ءُ مردم حکومتانی مانگ ءِ راه انت. هر حکومتے گۆں مردمداری، مردم‌دۆستی ءُ مردمانی پله‌مرزی ءَ مان ایت.

واجه ءَ گێش کرت: اگه مردم ناوشنود به انت، گڑا الله هم ناوشنود انت. کسے که وتی مچێں عُمر ءَ گۆں نماز ءُ رۆچگ ءُ حج ءَ گوازێن ایت، بلے مردمانی حقاں پادمالی کنت، بهشت ءَ راه نه دار ایت. الله پاک آ دینداری ءَ که مردمانی حقاں نادلگۆش کنت، نه من ایت. الله پاک ءَ واجه رسول الله صلی‌الله‌علیه‌وسلم ءَ گوشتگ که گۆں بےوس ءُ ناداراں گندءُنند کنت.

🔹گۆں نابرابری ءُ بےعدالتی، سیاستزانتانی بندیگ کنگ ءُ زهرشانی کنۆکانی پاهو دیگ ءَ حکومت دارگ نه بیت

🔹پاهو ملک ءِ ته ءَ باز بوتگ؛ اے پاهواں دین ءَ نقصان رسێن انت ءُ په ملک ءَ تهی ءُ ڈنی تاوان دار انت

مولانا عبدالحمید درشان کرت: من گۆں دلسۆچی ءُ دۆزواهی ءَ گوش آں که گۆں نابرابری ءُ بےعدالتی، گفتار ءُ ند ءِ آزاتیانی گرگ، سیاستزانتانی بندیگ کنگ ءُ زهرشانی کنۆکانی پاهو دیگ ءَ نه بیت که حکومت کن ات، اے حکومت ءِ مانگ ءِ راه نه انت.

واجه ءَ پاهوانی گێش بوگ ءَ سک اێر جت ءُ گوشت ئی: بژن انت که اے رۆچاں پاهو باز بوتگ. اے پاهواں هم په دین ءَ نقصان دار انت ءُ هم سوبَ به انت که مردم به دین ءَ بدبین به انت ءُ هم په ملک ءَ تهی ءُ ڈنی تاوان دار انت.

زاهدان ءِ آدێنگ ءِ امام ءَ کڈن کرت: الله پاک هم شه اے پاهواں ناوشنود انت، پچےکه ماں الله ءِ کانوداں پاهو نێست. ماں واجه رسول‌الله صلی‌الله‌علیه‌وسلم ءِ زندمان ءَ ءُ خلفای راشدین ءُ مهتر علی ءِ دۆر ءَ هم پاهو نه بوتگ. پمێشا گۆں دۆزواهی ءَ کڈن کن آں که پاهواں بند کن ات ءُ په عدالت ءُ آمید ءِ اێر دارگ ءُ مردمانی وشنودی ءِ کٹگ ءَ کۆشست کن ات ءُ آوانی لۆٹاں رندگیری به انت.