بلوچستان ءَ بے ایمنی ءِ ذمه‌واری ایف سی اِنت

ھک دو تھریک ءِ سروک مولانا ھدایت الرحمان بلوچ ءَ سےشمبے ءِ روچ ءَ دگہ ھمراھانی ھمراھی ءَ بلوچستان ءِ دمگ، کیچ ءِ بُنجاھی شھر تربت ءَ اَتکگ ءُ اے درگت ءَ پریس کلب ءَ یک پریس کانفرنسے ءَ چہ تران کنان ءَ جار جتگ آ زوت دہ لک مردمانی ھمراھی ءَ شال ءَ رو اَنت نندانک جن اَنت.

آئی ءَ گوشتگ کہ آئی ءِ زرمبشت کَسی سیاسی پارٹی یا کہ پردے ءِ بگیر ءَ نہ اِنت بلکیں بُنکی راجی جیڑاھانی سر ءَ اِنت ءُ گیبی تاکت وتی جاہ ءَ راج اے زرمبشت ءِ تاکت اِنت.

آئی ءِ گوشگ اِنت بیگواھیں مردمانی جیڑہ ءِ سر ءَ جُھد ءِ ھاتر ءَ راجدوست ھاسکار بی این پی مینگل ءُ نیشنل پارٹی ءِ کر ءَ شتگ ءُ یکجاھی جُھد ءِ ھاتر ءَ منارینگ ءِ جُھد کتگ پرچاکہ آ دومی نُکتے ءِ سر ءَ اناں کم چہ کم اے ھاسیں انسانی دردناکی ءِ سر ءَ اے گچینی پرمان ءِ ھاسیں جز اِنت.

آئی ءَ گوشتگ کہ سیمسر ءَ جاورانی چار ءُ ٹپاس کنگ ءَ رند صوبائی ھکومت ءِ گوم ءَ نبشتانکی مُھاد ءِ درگت ءَ چہ شور کن ایں چریشی ءَ پد زھرشانی ئیں نندانک کن ایں کیچ ءَ سنگتانی شور ءَ پد مزنیں نندانکے ءِ جار ءَ جن ایں.

آئی ءَ گوشتگ کہ ھک دو تھریک ءَ مزنیں کچے ءَ سوبمندی رس اتگ، ما ایف سی ءُ پھازوکی ادارھانی ودی کتگیں تُرس ھلاس کتگ اے وھد ءَ اگاں لھتے مردم تُرس آماچ اَنت اشاں نااُمیتی ءُ تُرس ءِ درکنگ ءِ ھاتر ءَ شعوری زُرمبشتے بندات کن ایں چرشی ءَ راج ءَ ھوار کن ایں.

آئی ءَ گوشتگ کہ انو اے وھد ءَ بے ایمنی ءِ وئیلانی سر ءَ کسی پوج ءَ اے جُست ءَ نہ کنت کہ اشانی کر ءَ اینچوکیں مزنیں بجٹے ھست آ وتی ھم پھازوکی ءَ کُت نہ کنت، بے ایمنی ءِ ذمه‌وار ایف سی اِنت، تباھی ءُ بربادی ءِ بُن، کُشت ءُ کوش ءُ بے کانودی کاراں ھواریں ایف سی ءَ بلوچستان ءَ چہ درایگ لوٹ اِیت اشی چہ ابید جاور شر بوت نہ کن اَنت.

آئی ءَ گوشتگ دانکہ ڈیتھ اسکواڈ ، منشیات باپاری، تُپنگی ئیں مردماں ھوار وتگڑیں واجکارانی سروکی بیت جاور شر نہ بنت، لَس مھلوک ذلیل ءُ بزگ اِنت منشیات پاباری عزتدار ءُ کُشکار ھاسیں مردم بنت گُڑا جاور بدل نہ بنت، ھک دو تھریک تُرس ءُ بےاُمیتی ھلاس کنت بُنکی راجی جیڑہ ءَ چست کنت راج ءِ تہ ءَ شری کار لوٹ اِیت، وتی لیکہ ءِ سر ءَ ھک دو تھریک جُیزے مدتے ءِ تہ ءَ مزنیں سوبمندی یے رس اتگ ئِے.

آؤکیں وھد ءَ پشتون ءُ بلوچاں ظُلم ءُ زوراکی ءِ بگیری ءَ یکجاہ کن ایں- بیگواھیں مردمانی یل کنائینگ ءُ سیمسر ءَ ٹریڈ سر ءَ راج اوشتارین ایں، صوبائی ھکومت ءَ مستری نیست ءُ آ وتی جیڑه‌ھاں پُشتکنز اِنت ھر روچ یک وزیرے دلرنج بیت ءُ آئی ءِ منّارینگ ءَ شرکینی ءِ وارینگ ءَ سرجمیں روچ گْوز اِیت دومی روچ ءَ پد ءَ یک وزیرے دلرنج بیت، بلوچستان ءِ تہ ءَ شری راج ءِ تاکت ءَ چہ کَیت، نو ھچ وڑ مئے ذلیل بوگ نہ بیت.

آئی ءَ گوشتگ کہ چیک پوسٹاں مئے پھازوکی ءِ ھاتر ءَ نہ اَنت ذلیل کنگ ءُ وتی باپاری ءُ کلدارگرگ ءِ ھاتر ءَ جوڑ کتگ اَنت پنجگور ءُ نوشکی ءِ وئیل ءَ مئے ھیال پدر کتگ.

آئی ءَ گْوشتگ کہ کیچ شھر ءِ تہ ءَ ایف سی ءِ اینچوکیں مزنیں بُنجاھی جوڑ کنگ چی معنا دار اِیت ھالانکہ ایف سی سیمسری پوجے اشی ءَ سیمسر ءَ بوگی اِنت آ شھر ءَ جاگہ گپتگ ءُ نشتگ.

آئی ءِ گوشگ اَت کہ صوبائی ھکومت گوم ءَ سیمسر ءِ درگت ءَ ھما مُھاد ءَ کہ بوتگ اَنت آ سرجم کنگ نہ بوتگ اَنت، ایف سی تنی وھدے سیمسری باپاری ءَ ھوار اِنت، مارا گوں سیمسر ءَ سرجمیں جیڑاہ دمگی انتزامیہ ءِ دست ءَ دیگ ءِ مُھاد ءَ کنگ بوتگ کہ آیانی سر ءَ انگت چُشیں گامگیج زورگ نہ بوتگ، سیمسر ءَ پچ کن پجّار کارڈ سر ءَ مھلوک ءَ باپاری ءِ موکل دیگ بہ بیت.

آئی ءَ گوشتگ کہ بلدیاتی گیچنکاری اگاں آزات بہ بنت گُڑا یک وشیں گپے بیت، گیچنکاری ءَ ھر وھد ءَ بلیک منی کارمرز بیت، آجوئی ءِ گچینکاری ءَ چہ راج ءِ جاورانی تہ ءَ شری کیت، اگاں گچینکاری جمھوری راھاں اوشتارینت گُڑا بے اُمیتی ءِ تہ گیشی کیت.

آئی ءَ گوشتگ کہ بیگواھیں مردمانی ایجنڈے سر ءَ راج دوستانی کر ءَ رو آں ءُ اے نُکتے سر ءَ مئے ھمراھداری کن اَنت یا نہ کن اَنت، مئے گھار وتی بیگواھیں براتانی یل کنائینگ ءِ ھاتر ءَ زھرشانی کنگ ءَ اَنت اشانی گوم ءَ یک راجدوستے ھم نیست کہ آ بژنگے گپے، بیگواھیں مردمانی واست ءَ زوت شال نیمگ ءَ جُنز ایں.

پریس کانفرنس ءِ وھد ءَ ھک دے تھریک راھشون مولانا نصیر احمد بلیدی، غلام یاسین بلوچ، غلام اغظم دشتی، یعقوب جوسکی، شاہ جھان بلوچ ءَ ھوار ساڑی بوتگ.

سرچمگ: دی بلوچستان پست