ایران ءِ مردماں سک‌ترێں گران‌نهادی ءِ آماچ انت/ سرکار، پارلمان ءُ حکومت مردمانی رۆزیگی جاور ءَ دلگۆش کن انت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (1 آبان 1405/ 23 اکتوبر 2026) گۆں اشاره به مالزانشتی جبر ءُ زۆراں که ایران ءِ سر ءَ بوگ ءَ انت، شه حکومت، سرکار، پارلمان ءُ فوجی فرماندهاں لۆٹ ات که وتی سیاست ءُ فیصلهانی ته ءَ مردمانی ناگێگێں رۆزیگی جاور ءَ دلگۆش کن انت ءُ اێشی بدل ءَ که یک سیاست ءُ رهبندے ءِ سر ءَ وس کن انت، ماں گپءُتران ءُ ترانکاریاں نرمی کن انت.

🔹ایران ءِ استمان ءَ په عدالت ءِ ایردارگ ءِ اُمێت ءَ به جمهوری اسلامی ءَ رأی دات

په سنی‌آنلاین ءِ سرهال ءَ مولانا عبدالحمید درشان کرت: ایران ءِ استمان شه دنیا ءِ گران‌مهزب ءُ کهنێں استماناں زانگ بیت. آئی گۆں وتی پجار ءَ شه اسلام ءِ اول سر ءِ واجهاں ءُ په عدالت ءِ اێردارگ ءِ امێت ءَ که ماں واجه رسول الله صلی‌الله‌علیه‌وسلم ءُ خلفای راشدیناں ءُ مهتر علی ءِ زندمان ءَ دربرتگ ات ئی،  چست بوت ءُ په «جمهوری اسلامی» ءَ رأی دات ءُ تیوگێں گوستگێں سالاں هم شه اے حکومت ءَ پله‌مرزی کرت.

🔹مردماں راجی سۆبانی بابت ءَ پرێشان انت

زاهدان ءِ آدێنگ ءِ امام ءَ درائێنت: ایران ءِ مردماں اے رۆچاں راجی سۆبانی بابت ءَ سک ءَ پرێشان انت. راجی سۆباں تیوگێں مردمانی مڈی انت ءُ مردمانی زندماں گۆں اے سۆباں همگرنچ انت ءُ راجی سۆبانی پهازگ حکومتانی اگده انت.

واجه ءَ گێش کرت: راجی سۆباں که مردمانی زندمان گۆں آوان همگرنچ انت، تاوان ءِ دۆچار انت؛ اے سۆبانی کارمستری کنگ کی دست ءَ انت ءُ کے بائد انت اے بابت ءَ پسو دنت؟

🔹 ابرمی مڈیاں شه زۆرواهندانی نێمگ ءَ دزجنی بوتگ انت

زاهدان ءِ آدێنگ ءِ امام ءَ گوشت: ابرمی مڈیاں چۆ جنگل ءُ معدن ءُ … که راجی مڈی انت، مئے ملک ءِ ته ءَ پهازگ نه بوتگ ءُ شه زۆرواهندانی نێمگ ءَ دزجنی بوتگ انت.

🔹گران‌نهادی ءُ راجی زر ءِ ارزشت ءِ واگ دارگ سرکار ءُ حکومت ءِ اگده انت

زاهدان ءِ آدێنگ ءِ امام ءَ درشان کرت: یکے شه راجی مڈیانی ٹوهترێں بهراں مالزانشت انت که بژن انت مئے ملک ءِ ته ءَ یله دیگ بوتگ ءُ هچ واگ دارگ نه بیت. پێسرتر ءَ سرکاراں راجی زر ءِ بابت ءَ آزگ‌سما ات انت، بلے پد ءَ یک راجکماشے ءِ زمانگ ءَ که دلار 60 هزار ءَ سر بوت، آئی گوشت که ما نهراں کارے نه دار اێں، بزاں واگ شه دستے در آت ءُ راجی زر ءِ مهار ءَ یله ئی کرت. مرۆچی گندگ ءَ اێں که کمے منتگ راجی زر پهک بےارزشت ءُ ناچل بیت.

واجه ءَ کڈن کرت: راجی زر ءِ ارزشت ءُ گران‌نهادیانی واگ دارگ سرکار ءُ حکومت ءِ اگده انت. حکومت وهدےکه شه وتی حقاں گپ جنت، پچے شه استمان ءِ حقاں گپ نه جنت؟ مرۆچی ایران ءِ مردماں سک‌ترێں گران‌نهادی ءِ آماچ انت ءُ وتی هژدری زلورتانی پجائێنگ ءِ وس ءَ نه دار انت. گێش شه ده سال ءَ انت که وانێنۆک، کارمند ءُ کارنشت ءُ پرستاراں اێراد دار انت که گۆں اے ماجب ءَ نه توان انت زند گوازێن انت. بازاری ءُ کاسب ءُ سوداگر ءُ وڑوڑێں پاٹیاں مشکلانی دۆچار انت ءُ کوکار کن انت.

🔹دنیا لۆٹ ایت ملک ءِ مالزانشتی شاهرگ ءَ گڈ ایت

مولانا عبدالحمید ٹکاٹک گوشت: مرۆچی دنیا ملک ءِ زندگێں شاهرگانی سر ءَ زۆر دیگ ءَ انت ءُ مالزانشت ءِ شاهرگ ءَ گڈ ایت. ماں اے جاور ءَ که ملک شه دریاب ءِ نێمگ ءَ بێڑو انت ءُ نفت ءِ بها کنگ ءُ آدگه دریابی سوداگریاں مکن بوتگ انت، چۆنکا ملک ءِ کارمستری بوت کنت؟

واجه ءَ گوشت: هوار گۆں دریابی بێڑو ءَ سیمسر ءُ هشکی راهاں گۆں ترکیه، عراق ءُ پاکستان ءَ چۆ ریمدان ءُ تفتان ءِ راهاں هم بند بوتگ انت که صداں ٹرک گۆں ورگی ئێں باراں سیمسرانی پشت ءَ منتگ انت ءُ بار اش بۆدار ءُ ابێر به انت. وهدےکه دریابی ءُ هشکی ئێں راهاں بستگ به انت گڑا هشتاد، نود ملیونی ئێں آباتی چۆنکا زند گوازێن انت؟!

🔹سرکار، پارلمان ءُ حکومت مردمانی پگر ءَ به انت/ فوجی فرماندهاں مردمانی زندمان ءَ دلگۆش کن انت

مولانا عبدالحمید ملک ءِ کارمسترانَ گوشت: شما بائد مردمانی پگر ءَ به ات ءُ شه مردمانی زندمان ءَ بےهیال مه به ات. مردم گشنگ ءُ ناداری ءِ آماچ انت ءُ پمێشا اێراد دار انت. اے جاور ءَ هچ پاٹی ئے سگ ات نه کنت.

واجه ءَ ٹکاٹک گوشت: اے جاور ءِ ته ءَ سرکار، پارلمان ءُ حکومت ءِ اگده سک گران انت ءُ بائد مردمانی پگر ءَ به انت. فوجی فرماندهاں بس مه گوش انت که ما سلاه ءُ آسراتی ئے واهندێں ءُ توانێں جنگ کنێں، بلکه مردمانی رۆزیگی جاور ءَ هم دلگۆش کن انت.

🔹امنیت بس گۆں ناامنی ءِ اێر جنگ ءَ نه بیت؛ بائد گۆں مردم ءُ مخالفاں گپءُتران بیت

زاهدان ءِ آدێنگ ءِ امام ءَ گوشت: گۆں مردماں نند ات ءُ گپان اش گۆش دار ات. گۆں تهے ءُ ڈن ءِ مخالفاں ءُ گۆں آوان که ناامنی جۆڑ کن انت گپءُتران کن ات. ترانکاری مشکل ءُ ناامنیاں کم کنت.

واجه ءَ دێمتر ءَ لهتے شرگداریانی باروا گوشت: لهتے گوش انت که شما پچے ناامنیان اێر نه جن ات؛ ما پێسر ءَ باز بر اێر جتگ. بژن انت که لهتے شه امنیت ءَ بس اێر جنگ ءَ زان انت؛ وهدےکه امنیت تهنا گۆں اێر جنگ ءَ جۆڑ نه بیت، بلکه ترانکاری مهم انت. بائد وتی هبر ءَ گوش اێں ءُ دگرانی هبراں هم گۆش دار اێں.

🔹رۆشنائێں بانداتے په نونێں جنگ ءَ گندگ نه بیت

واجه ءَ وتی گڑتی ءَ شه ایران ءُ امریکه ءِ جنگی جاور ءَ درشان کرت ءُ ٹکاٹک گوشت ئی: نونێں جنگی جاور ءَ ایران ءِ مردمان بازێں سکیانی آماچ کرتگ ءُ هچ رۆژنائێں بانداتے پرائی گندگ نه بیت. رۆژنائێں باندات هما وهد ءَ بیت که ماں سیاستاں بدلی بیارێں ءُ گۆں دنیا ءِ حکومتاں ترانکاری بیت ءُ په ایران ءِ استمان ءِ سۆباں وتی بازێں لێکه ئے را یله دئێں.

🔹زۆر ءُ تنک‌چمیاں گێش بوتگ انت؛ ماں نونێں آزگ‌سمائێں جاور ءَ مردمانی آزاتیاں گێشتر کن ات

مولانا عبدالحمید ماں دگه بهرے شه وتی هبراں گوشت: ارمان که ماں نونێں آزگ‌سمائێں جاور ءَ زۆر ءُ تنک‌چمیاں ملک ءِ ته ءَ باز بوتگ انت. بازێنے شه جهدکار، دۆدربێدگی ءُ زهرشانی کنۆکاں دزگر کن انت. پاهو هم سک باز بوتگ. ماں اے جاور ءَ بائد مردمانی آزاتیاں گێشتر به انت تاں آوانی دل ءَ دست ءَ بیار ات.

🔹آزاتێں سفر ملک ءِ کنڈکنڈاں شه ایران ءِ مردمانی شهری حقان انت؛ اے حق ءِ مکن کنگ ءَ چپدێمێں برورد است

مولانا عبدالحمید گۆں اشاره به شیخ محمدصالح پردل ءِ سفر ءَ به کردستان ءَ ءُ اۆد ئے پابندیاں گوشت: یکے شه ملک ءِ زبردست ءُ نام‌پرشتێں زانتکاراں به هلاکهے سفر کرتگ که گۆں آئی بےشرپی بوتگ، وهدےکه آئی په هچ کسے تاوانے نه داشتگ ءُ سالم ءُ بےادعا زند ئی گوازێنتگ.

واجه ءَ گێش کرت: بژن انت که لهتے کارمستراں زبردستێں عالمانی سفراں په دگه شهراں سگ ات نه کن انت، وهدےکه آزاتێں سفر ایران ءِ کنڈکنڈاں شه ایران ءِ مردمانی شهری حقان انت ءُ اے حق ءِ مکن کنگ ءَ چپدێمێں برورد است. علما، زانشتجاهی ءُ آدگه سنی ءُ شیعهانی سیاسی ءُ مذهبی مردماں بائد توان انت په‌آزاتی سفر کن انت.

🔹امنیت ءِ پهازگ پهکانی سۆب ءَ انت

زاهدان ءِ آدێنگ ءِ امام ءَ وتی هبرانی گڈسر ءَ گوستگێں هپتگانی روگه ءَ په امنیت ءِ پهازگ ءَ کڈن کرت ءُ گوشت ئی: مچانَ په امنیت ءِ پهازگ ءَ سۆگه کن آں. ملک ءُ هلاکه ءِ امنیت شه راجی سۆبان ءُ پهکانی سۆب ءَ انت.