ماں اے ماهاں گێشتر عبادت کن اێں ءُ په خودسازی ءُ تزکیه ءَ جهد کن اێں

سنی‌آنلاین| مولانا عبدالغنی بدری ماں زاهدان ءِ جمعه نماز ءِ دیوان ءَ (29 بهمن 1400/ 18 فبروری 2022)، گۆں اێشی بیان ءَ که «رجب ءُ شعبان ءُ رمضان، خودسازی ءُ اصلاح ءِ خاصێں ماه انت»، پرێشی که په عبادت ءَ ماں اے ماهاں گێشتر وخت به هل اێں، زکات دےاێں، نماز بوان اێں، الله ءِ دادانی شکر ءَ کن اێں، سکّ سۆگه ئِے کرت.

په سنی‌آنلاین ءِ سرهال ءَ، مولانا عبدالغنی بدری، زاهدان ءِ جمعه ءِ ادارکێں امام ءَ درشان کرت: سال ءِ تیوگێں ماهاں په عبادت ءَ انت، بلێں رجب ءُ شعبان ءُ رمضان ءِ ماهاں رهوت گۆں الله ءُ آیی عبادت ءِ خاصێں ماه انت. مهتر رسول الله صلّی‌الله‌علیه‌وسلّم ءَ مدام اے دعا ءَ کرتگ منی پاکێں الله رجب ءُ شعبان ءِ ماهانی تها برکت دے ءُ ما را به رمضان ءَ رس اێں. واجه رسول الله صلّی‌الله‌علیه‌وسلّم ءَ ماں هچ ماه ءِ اے ماهانی کساس ءَ عبادت نه کرتگ.

دارالعلوم زاهدان ءِ تفسیر ءِ استاد ءَ درشان کرت: نێکێں اعمالانی کنگ الله ءِ پرمان انت؛ الله پاک ءَ ماں هر آیتے وهدے که «ایمان» ءَ را آۆرتگ، «نێکێں عمل» ءَ شه آیی ءُ پد ئِے آۆرتگ. اێشی بزانت اێش انت که نێکێں اعمالاں چۆ توحید ءُ ایمان ءَ هژدری انت ءُ هماپێم که انسان بےایمان ءَ شه عذاب ءَ نه رکّ ایت، بےاعمال ءَ هم بچّگے نێست.

مولانا بدری وتی هبرانی دێمتر ءَ گۆں یک درورے ءِ بیان ءَ نێکێں عمل ءِ ارزشت ءِ بارو ءَ که شه واجه رسول الله صلّی‌الله‌علیه‌وسلّم ءَ نکل بوتگ، درشان ئِے کرت: زر، هنتکان، مال ءُ جن ءُ زهگ که مردم پراوانی کٹگ ءَ وتی واب ءُ راحتی ءَ ندر کنت ءُ وڑ وڑێں سکّی‌سۆریان ءَ سگّ ایت، بس تاں قبرستان ءَ آیرا همراهداری کن انت.

مولانا عبدالغنی گێش کرت: نباید شه کار ءَ دست زور اێں، بلێں مال ءَ یک اسبابے زان اێں. بازێں مردمے ءِ مشکل اێش انت که زرّانی دۆستی آوانی دلانی تها پترتگ ءُ په زرّے کٹگ ءَ الله ءُ بندگانی حقانَ پادمالیَ کن انت، وتی براس ءَ ناراضَ کن انت، گناه کن انت، زکات نه دےانت ءُ الله ءَ هم ناراضَ کن انت.

آیی گوشت: نباید زرّ ءُ مال ءِ دۆستی ءَ دلے تها بیار اێں، بلکه دلے تها باید تهنا الله ءِ دۆستی بیت. اگاں ما چیزے را گناه ءُ باطل زان اێں، حتا اگاں مئے دست ءُ پاداں آیرا کن انت ءُ وشی کٹ انت، بلێں دل ءُ زِرد آیرا ملامت کنت، پچےکه دل باطل ءِ جا نه انت.

دارالعلوم زاهدان ءِ هێلکاری ءِ معاون ءَ گوشت: انسان ءِ ڈڈر ءِ تها چنڈے گۆشتے هست که اگه آ اصلاح بیت سجّوێں ڈڈر اصلاح بیت، اگاں دلے تها بهادری ءُ دادءُ دهشت بیت دست ءُ پاد هم پدگیریَ کن انت، شه هچی ءَ نه ترس انت ءُ ماں الله ءِ راه ءَ هرچَ کن انت. اگه کسے ءِ دلے تها الله ءِ دۆستی بیت، وت په شپ ءِ نماز ءَ چستَ بیت، زرّ ءَ په الله ءِ راه ءَ ندر کنت ءُ نێکێن کارانی نێمگ ءَ رۆت. پرے واستا جهد کن ات که شمے دلے تها تهنا الله ءِ دۆستی بیت، په الله ءِ دۆستی ءِ گێش کنگ ءُ زرّ ءُ مال ءِ دۆستی ءِ کم کنگ ءَ زکات ءُ خیرات دےات ءُ په پُست ءُ مقام ءِ دۆستی ءِ علاج ءَ نماز بوان ات.

زاهدان ءِ جمعه ءِ ادارۆکێں امام ءَ گێش کرت: جن ءُ زهگاں چکاسگ ءِ سبب انت که توان انت یا مردم ءَ شه الله ءَ دور کن انت یا به الله ءَ نزیک کن انت. خیرات ءُ نێکێن کردار ءُ عبادتاں قبر ءِ تهاری ءُ قیامت ءِ تهاری ءَ دورَ کن انت ءُ قیامت ءِ رۆچ ءَ که گونڈترین تریشک ءِ شه نور ءَ نێست، رۆشناییَ کار انت.

🔸 مولانا عبدالغنی بدری وتی هبرانی گڈسر ءَ گۆں اشاره به چار زبردستێں پاگواجه ءِ وفات ءَ ماں ملک ءِ وڑ وڑێں استاناں، درشان ئِے کرت: ارمان که ماں گوستگێں هپتگ ءَ زبردستێں پاگواجهاں شه ملک ءِ وڑ وڑێں ڈیهاں بێران بوت انت، مولانا عبدالاحد مالکی (نهتانی)، شه خراسان رضوی ءِ زبردستێں پاگواجهاں ءُ جنت آباد ءِ جمعه ءِ امام، شیخ سید عبدالرؤف قتالی، بندرخمیر ءِ جمعه ءِ امام، حاجی محی‌الدین آخوند احمدی (کعبه‌جان)، استان گلستان ءِ کلاله ءِ شهر ءِ جمعه ءِ امام ءُ مولانا محمدگل گرگیج، شه زاهدان ءِ قاسم‌العلوم وانگجاه ءِ زبردستێں استاداں اے کۆڑَهێں دنیا ءَ یله اش دات. الله پاک آوان ءَ وتی خاصێں رحمتانی ساهگ ءَ جاگه دنت ءُ ما پهکان ءَ شه فتنهاں حفاظت کنت. پراستی که اے پاگواجهانی وفات سبب بیت که شه آوانی دعائاں زبهر به اێں ءُ فتنهانی در پچ بےانت.