مولانا فتح اللہ کے انتقال پر شیخ الاسلام مولانا عبدالحمید کا تعزیتی پیغام

اہل سنت ایران کے ممتاز دینی و سماجی رہ نما شیخ الاسلام مولانا عبدالحمید نے تعزیتی پیغام جاری کرتے ہوئے مولانا فتح اللہ سجاد کے سانحہ ارتحال پر افسوس کا اظہار کیا ہے۔
سنی آن لائن اردو کی رپورٹ کے مطابق، جامعہ عثمانیہ رحیم یارخان کے صدر و شیخ الحدیث مولانا محمدیوسف کے بڑے صاحبزادہ مولانا فتح اللہ کے انتقال پر گہرے رنج و غم کا اظہار کرتے ہوئے مولانا عبدالحمید نے مرحوم کی مغفرت کے لیے دعا مانگی ہے۔
خطیب اہل سنت زاہدان کے تعزیتی پیغام درج ذیل ہے:

بسم الله الرحمن الرحیم
شیخ التفسیر و الحدیث حضرت مولانا محمدیوسف رحیم‌یارخانی صاحب دامت برکاتہم
السلام علیکم و رحمة اللہ و برکاتہ،

آپ کے عالم و فاضل جوان سال صاحبزادہ «مولانا فتح اللہ سجاد» کا سانحہ انتقال بندہ اور جامعہ دارالعلوم زاہدان میں دیگر اساتذہ کے لیے انتہائی رنج و غم اور دلی صدمے کا باعث ہوا۔
اس میں کوئی شک نہیں کہ اعزہ و اقارب خاص کر اولاد کا انتقال والدین کے لیے بہت بڑی مصیبت اور ہلادینے والا واقعہ ہے۔ صرف اللہ رب العزت ہی کی مدد سے بندہ صبر کا دامن پکڑسکتاہے۔
آپ کے فرزند ارجمند نے آپ ہی کے سایہ شفقت میں تربیت پاکر پوری زندگی تعلیم و تعلم، دین کی خدمت اور طلبہ کی تربیت میں گزاری ہے۔ ان شاءاللہ ایسا شخص اللہ تعالی کے فضل و کرم سے اس ذات پاک کی رحمت خاصہ سے محروم نہیں رہے گا ۔
اللہ تعالی سے دعا مانگتاہوں کہ مولانا فتح اللہ رحمہ اللہ کو مکمل مغفرت سے نوازے اور آپ سمیت تمام پس ماندگان و متعلقین کو صبرجمیل اور اجر جزیل نصیب فرمائے۔
عظم الله أجركم و غفر لميتكم و ألهمكم الصبر و السلوان اللهم تقبله في رحمتك و أدخله فسيح جناتك يا أرحم الراحمين و إنا لله و إنا إليه راجعون

)مولانا) عبدالحمید
صدر دارالعلوم زاہدان