ایران: زاہدانی اہل سنت بارہ سال کے بعد نئی عیدگاہ میں نماز ادا کریں گے

زاہدان (سنی آن لائن)ایران کے جنوب مشرقی شہر زاہدان کے سنی مسلمانوں کو بارہ سال جدوجہد کے بعد ایک نئی اور وسیع عیدگاہ دی گئی ہے، مولانا عبدالحمید نے اس خبر کے ساتھ ساتھ اعلان کیاہے عیدالاضحی 2014ءکی نماز نئی عیدگاہ میں ادا کی جائے گی۔

’سنی آن لائن‘ کے نامہ نگار کے مطابق، خطیب اہل سنت زاہدان شیخ الاسلام مولانا عبدالحمید نے جمعہ آٹھ ذوالحجہ (تین اکتوبر دوہزار چودہ)میں ہزاروں فرزندانِ توحید سے خطاب کرتے ہوئے کہا: اللہ تعالی کے فضل وکرم سے اور صوبائی وقومی حکام کی فراخدلی و تدبیر کے بعد آئندہ اہل سنت والجماعت زاہدان ایک کشادہ اور وسیع عیدگاہ میں عیدین کی نماز ادا کریں گے۔

انہوں نے امید ظاہر کی آئندہ نمازی مجبور نہ ہوں سڑکوں اور گلیوں میں نماز قائم کریں۔ مولانا نے کہا شہر کے مضافات میں واقع نئی عیدگاہ لگ بھگ بتیس ایکٹر ہے جو کئی نسلوں کے لیے کافی ہوگی۔

شیخ الحدیث دارالعلوم زاہدان نے نئی عیدگاہ کے الاٹمنٹ کو اسلامی جمہوریہ ایران کی طرف سے سنی عوام کوایک تحفہ قرار دیا جو بارہ سالوں کی جدوجہد اور محنت کے بعد انہیں نصیب ہوگئی۔

انہوں نے کہا: عیدالاضحی کے لیے نئی عیدگاہ کو دن رات کام کرکے تیار کی جارہی ہے۔ ان شاءاللہ اتوار کو یوم العید کے موقع پر نماز نئی جگہ پر ادا ہوگی۔ جن کے پاس گاڑیاں اور بسیں ہیں، وہ عید کی نماز کے لیے دوسروں کو پہنچائیں اور سب کو نئی عیدگاہ کے بارے میں اطلاع دی جائے۔