اسلام آباد(این این آئی)قومی ا سمبلی سے حکومتی، اپوزیشن، فاٹا اورآزاد ارکان نے پیر کو”یوم ڈاکٹر عافیہ صدیقی “ قراردیتے ہوئے وقفہ سوالات کے بعد ایوان کی کارروائی کو ملتوی کرکے امریکی عدالت سے ڈاکٹر عافیہ صدیقی کو سز ا کیخلاف پارلیمنٹ ہاؤس سے سپریم کورٹ تک احتجاجی مارچ کیا.
قومی اسمبلی کے ارکان نے متفقہ طورپر امریکی حکومت سے مطالبہ کیاکہ وہ ڈاکٹرعافیہ صدیقی کو فی الفور رہا کرکے پاکستان بھجوائے.
احتجاجی مارچ کے دوران مرد وخواتین ارکان اسمبلی نے ڈاکٹر عافیہ صدیقی کو رہا کرو کے نعرے بھی لگائے، احتجاجی مارچ کی قیادت قائد حزب اختلاف چوہدری نثارعلی خا ن، قومی کشمیرکمیٹی کے چیئرمین مولانا فضل الرحمن ، اے این پی کے وزیر ریلوے حاجی غلام احمد بلور، ایم کیو ایم اورڈاکٹر عافیہ صدیقی کی بہن ڈاکٹرفوزیہ صدیقی نے کی جبکہ میڈیا اور سول سوسائٹی کے نمائندوں نے بھی اظہار یکجہتی کے طورپر احتجاجی مارچ میں شرکت کی۔
اس موقع پرخطاب کرتے ہوئے وزیرداخلہ رحمن ملک نے کہا کہ ڈاکٹرعافیہ صدیقی کی رہائی کیلئے ہرممکن اقدامات کئے جائیں گے، آج دنیا کو معلوم ہوگیا ہے کہ تمام اراکین نے ملکر عافیہ صدیقی کی سزا کیخلاف احتجاجی مظاہرہ کیا ہے۔
مولانا فضل الرحمن نے خطاب کرتے ہوئے کہاکہ ڈاکٹر عافیہ صدیقی کی سزا پر پوری قوم سراپا احتجاج ہے، انہوں نے کہاکہ کوئی خود کو کتنابھی طاقتورکیوں نہ سمجھے ظلم کے ساتھ اس کی طاقت پاش پاش ہوجاتی ہے ۔