مردمانی مالزانشتی جاور سک نگێگ انت؛ کارمستراں مه گوش انت شه مئے دست ءَ کارے نه بیت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (21 آذر 1404/ 12 دسمبر2025) مردمانی مالزانشتی جاور ءَ سک نگێگ زانت ءُ کارمسترانی گوشت: شما نه توان ات وتی اگده ءَ نادلگۆش کن ات ءُ گوش ات شه مئے دست ءَ کارے نه بیت، شما بائد پسۆ دےات. اگاں شه شمے دست ءَ کارے نه بیت گڑا گهتر انت که گستا به ات تاں دگرے اے اگده ءَ وتی بڈ ءَ کنت.

🔹ماں آسمانی دیناں الله ءِ احکاماں جاور ءُ مردمانی وازمندیانی رد ءَ بدل کنگ بوتگ انت

په سنی‌آنلاین ءِ سرهال ءَ مولانا عبدالحمید درائێنت: مچێن آسمانی دیناں ما سے چیز ءَ «توحید»، «معاد» ءُ «نبوت» ءَ گۆں وت یکےانت ءُ هچ بدلی ئے ماں اے سے چیز ءَ نێست، بلێں دگه احکامانی میانجین ءَ جاور ءُ مردمانی وازمندیانی رد ءَ دگری بوتگ.

واجه ءَ گێش کرت: اے الله ءِ سنت بوتگ که هچبر په یک داب ءُ راهے پرمانء نه داتگ، بلکه مردمانی جاور ءِ رد ءَ داب ءُ راهانی هم بدل کرتگ، پمێشا ماں دگه شریعتاں وهد ءُ جاور ءِ رد ءَ احکاماں هم بدل کنگ بوتگ انت.

🔹آسمانی دیناں وتی وهد ءَ الله ءِ رحمت بوتگ انت

زاهدان ءِ آدێنگ ءِ امام ءَ کڈن کرت: الله پاک مهروان انت ءُ آسمانی دیناں وتی زمانگ ءَ الله ءِ رحمت بوتگ انت. الله پاک ءَ دین ءَ را آسان کرتگ. الله ءِ احکاماں مردم ءَ اپسله کن انت، بلے الله نه لۆٹ ایت که اے اپسله گۆں زۆر ءُ سکی ءَ بیت.

واجه ءَ درائێنت: ماں آسمانی دیناں مردمانی اپسله کنگ رنگ‌رنگ ءَ بوتگ، په درور ماں اسلام ءَ گۆں اێشی که مکه ءِ مردماں وس کرت که قرآن یکجا اێر آرگ بیت، بلێں الله پاک ءَ قرآن ءَ کم‌کم 23 سال ءِ ته ءَ اێر آورت. احکام ءُ فرض ءُ حراماں هم کم‌کم ءَ اێر آتگ انت تاں مردمانی سر ءَ سک مه بیت. اسلام ءِ اول ءَ که مسلمانانی جاور سک ات، نماز دو رکعت ات ءُ پد ءَ چار رکعت بوت. رۆچگ ءُ زکات ءُ حج هم چنکه سال پد ءَ فرض بوت انت.

🔹کانوداں بائد انت جاور ءِ رد ءَ که مردمانی سۆب ءَ بیت، بدل کنگ به انت

مولانا عبدالحمید گوشت: دنیا ءِ کانوداں آ وهد ءَ سۆبێن به انت که جاور ءَ دلگۆش کن انت ءُ شه الله ءِ سنت ءَ رندگیری کن انت. دنیا ءِ کانوداں بائد انت په مردمانی سۆب ءَ بدل کنگ به انت. کانودے که پنجاه سال پێسر ءَ نزّ آرگ بوتگ نونێں جاور ءِ درد ءَ نه وارت ءُ پمێشا ملک مشکلانی آماچ انت.

واجه ءَ گێش کرت: ملک ءِ نونێں جاور پنجاه سال دێم ءِ جاور نه انت ءُ بازێنے شه آ زمانگ ءِ مردماں بێران بوتگ انت ءُ نوکێں پدرێچ ءَ نۆکێں لۆٹ ءُ وازمندگی است. وهدےکه جاور ءُ وازمندگیاں نۆکێں انت، کانوداں هم بائد بدل کنگ به انت که اے چیز مردمانی سۆب ءَ انت ءُ آوانی وشنودی ءِ سوبَ بیت.

زاهدان ءِ آدێنگ ءِ امام ءَ درائێنت: نون که نۆکێں پدرێچے آتگ بائد شه آوانی بودیگاں کارگرگ بیت، پچےکه مردم که پیر بیت سست ءُ نزور بیت ءُ آ ورنایی ءِ وس ءُ تۆک ءَ نه دار ایت، پمێشا دنیا ءَ کارنشتی ءِ کانود ءَ جۆڑ کرتگ. هچ کس مدامی نه بائد یک کارے ءِ سر ءَ بیت.

🔹بائد انت گشتانک ءِ آزاتی بیت تاں مردماں ماں سیاسی ءُ عقیدهی مسائلاں وتی دیدانکاں درشان کن انت

مولانا عبدالحمید ءَ ماں دگه بهرے شه وتی هبراں په گشتانک ءِ آزاتی ءُ آزاتی ماں وتی دیدانک ءِ درشان کن ءَ کڈن کرت ءُ گوشت ء:  یک مردمے ماں قم ءَ یا دگه جاهے گپے کرتگ که آئی بگێر ءَ ترۆندی بوتگ. اگاں کسے وتی دیدانک ءَ درشان کنت بائد گشتانک ءِ آزاتی بیت ءُ آئی بےشرپی مه بیت. اگاں آ پسۆ دیگ بیت پروائے نێست، بلێں آئی بےشرپی مه بیت. همےرنگ ماں سیاسی مسائلاں بائد انت آزاتی بیت ءُ کسے که شمے چپ ءَ گپے جت آیرا دشمن مه زان ات. پهکێں ایران ءِ نندۆکانی حق انت که وتی دیدانکاں درشان کن انت.

🔹مهر ءُ محبت گۆں بی‌بی فاطمه ءُ اهل‌بیتاں شه اهل‌سنتانی باور ءُ اعتقاد ءَ انت

زاهدان ءِ آدێنگ ءِ امام ءَ وتی هبرانی دێمتر ءَ گوشت: مهتر فاطمه ءُ مهتر علی رضی‌الله‌عنهما ءَ مچێن مسلماناں منّ انت ءُ حرمتَ کن انت. واجه رسول الله صلی‌الله‌علیه‌وسلم ءِ سیادان که آیرا دیستگ ءُ هزمت اش کرتگ برزێں جاگه ءِ واهند انت ءُ پهکێں مسلمانان آوانی حرمت ءَ دار انت. مهر ءُ محبت گۆں اهل‌بیتاں شه اهل‌سنتانی باور ءُ اعتقاد ءَ انت.

🔹اهل‌سنتانی باور همێش انت که مهتر بی‎بی فاطمه رضی‌الله‌عنها ءَ «وفات» کرتگ

🔹اگاں کسے شه شیعه ئاں «وفات» ءِ منّۆک انت نه بائد آئی بےشرپی بیت

واجه ءَ اهل‌سنتانی باور ءَ مهتر فاطمه رضی‌الله‌عنها ءِ باروا درشان کرت ءُ گوشتء: اهل‌سنتانی باور همێش انت که مهتر بی‌بی فاطمه ءَ وفات کرتگ ءُ آئی شهادت یک آسمانکے ءُ اهل‌سنتاں آیرا نه منّ انت. همےرنگ پێسر ءِ شیعه ئانی باور هم همێش بوتگ ءُ آوانی کتابانی ته ءَ ءُ ماں سالدراں «وفات» نبشته بوتگ. پمێشا اگاں کسے شه شیعه ئاں وفات ءِ منۆک بیت نه بائد آئی بےشرپی ءَ کن ات.

🔹هر پێشامدے را بائد انت گۆں عقل ءَ سنج اێں

مولانا عبدالحمید درشان کرت: ما پهکاں بائد فکر کن اێں که مهتر فاطمه رضی‌الله‌عنها واجه رسول الله صلی‌الله‌علیه‌وسلم ءِ درێں جنک بوتگ ءُ آ وهد ءَ که انگت آ واجه ءِ قبر ءِ هاک هشک نه بوتگ انت ءُ دور هم اسلام ءِ اول ءُ صحابه ئانی دور بوتگ که ماں وڑوڑێں پڑاں وتی جان اش ندر کرتگ ءُ شه واجه رسول الله ءَ دێمپانی اش کرتگ، گڑا چۆن عقل اێشرا منّ ایت که کسے واجه رسول الله صلی‌الله‌علیه‌وسلم ءِ جنک ءَ مهتر علی ءُ آدگه صحابه ئانی دێم ءَ شهید کنت ءُ آوان بےبرمش ءَ چار انت؟!

واجه ءَ ٹکاٹک گوشت: هر پێشامد ءَ اول بائد انت گۆں عقل ءَ سنج اێں، اے پێشامد ءَ عقل نه منّ ایت. اے چیز که من گوشت سجێں مسلمانانی باور انت.

🔹پاهو ماں یک اسلامی حکومتے په دین ءَ تاوان دار ایت

مولانا عبدالحمید گوشت: ما پرێشا گۆں پاهو ءَ چپ اێں که پاهو ماں حکومتے که په نام دین ءَ انت، په دین ءَ تاوان دار ایت. هر مشکلے ماں اسلامی حکومتاں په دین ءِ نام ءَ بیت آ په دین ءَ تاوان دار ایت، همارنگ که هر جوانی ئے هم په دین ءِ سۆب ءَ انت. دین ءُ واجه رسول الله صلی‌الله‌علیه‌وسلم الله رحمت انت؛ ما هم بائد انت وڑے کردار کن اێں که دین په مردماں رنجے مه بیت.

🔹کارمستراں شه وتی اگده ءِ دێم ءَ مه جی انت؛ بلکه جاور ءَ کارمستری ءُ بدل کن انت

زاهدان ءِ آدێنگ ءِ امام ءَ وتی هبرانی گڈسر ءَ گۆں اشاره به مردمانی مالزانشتی ءُ معیشتی جاور ءَ گوشت: مردمانی مالزانشتی جاور سک نگێگ انت ءُ وسایلاں رۆچ په رۆچ گران به انت. مردماں هژدری ئێں وازمندیانی ٹهینگ ءِ وس ءَ نه دار انت ءُ سکیانی آماچ انت، بائد انت اے مردمانی فکر ءَ به ات.

واجه ءَ ٹکاٹک گوشت: کارمستراں مه گوش انت که شه مئے دست ءَ کارے نه بیت، اگاں شه شمے دست ءَ کارے نه بیت گڑا گستا به ات تاں دگه کسے اے اگده ءَ وتی بڈ ءَ زور ایت.

مولانا عبدالحمید کارمستراں گوشت: شما نه توان ات شه وتی اگده ءِ دێم ءَ جی ات ءُ گوش ات شه مئے دست ءَ کارے نه بیت، بلکه بائد په مردمانی وازمندیانی ٹهینگ ءَ جهد کن ات ءُ جاور ءَ بدل کن ات. ملک ءِ جاور نۆکێں جاورے ءُ نۆکێں پدرێچ ءِ وازمندی هم نۆکێں انت، پمێشا بائد تهے ءُ ڈن ءِ سیاستاں همے نۆکێں جاور ءِ رد ءَ بدل کنگ به انت.