سالیگێں بودجه ءِ گێش کنگ ءِ بدل ءَ گرانیانی دێم گرگ بیت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (5 دی‌ماه 1404/ 26 دسمبر 2025) گۆں اشاره به نۆکێں سال ءِ بودجه ءِ گێش کنگ ءَ کڈن ئی کرت که په دێم‌گیری شه گرانیاں تهے ءُ ڈن ءِ سیاستانی تعدیل کنگ ءُ نرمی ماں ترانکاراں باز اثر دار ایت.

🔹گرانی ءُ زر ءِ بےارزشی ءَ سرجمێں مردماں پرێشان ءُ گنگ‌سر کرتگ

په سنی‌آنلاین ءِ سرهال ءَ مولانا عبدالحمید گوشت: جمهوری کماش ءَ 1405 ءِ سالیگێں مالبندی ءَ پارلمان ءَ پێش کرتگ که گرانی ءُ زر ءِ بےارزشی ءِ رد ءَ ادارهانی سالی زراں بیست درصد گێش بوتگ انت، هرچۆں که شه منی دیدانک ءَ اے گێشی اگه 50 درصد هم بیت مشکلے را نه بۆج ایت، پچےکه نهاداں زوت په زوت برز رو انت ءُ زر هم هررۆچ بےارزشَ بیت.

واجه ءَ درشان کرت: گرانی ءُ زر ءِ بےارزشی ءَ وڑوڑێں پاٹیانَ ماں هلک ءُ شهراں سکیانی آماچ کرتگ، کارگساں ءُ مردمانی کٹءُکاراں هم تاوان دیستگ ءُ مردماں پرێشان ءُ تکانسر انت.

🔹ڈن ءِ سیاستانی تعدیل کنگ ءُ نرمی ماں ترانکاریاں گرانیاں کمتر ءُ زر ءِ ارزش ءَ گێشتر کنت

زاهدان ءِ آدێنگ ءُ امام ءَ درائێنت: گهترێں راه همێش ات که سالیگێں مالبندی ءِ گێش کنگ ءِ بدل ءَ شه تورم/ گرانیاں دێمداری بیت ءُ زر ءِ ارزش برگرد ایت. وهدے تورم کمتر ءُ زر ءِ ارزش گێشتر بیت مردم امێتوار به انت ءُ ماں زندگی ءَ بن‌بست ءِ مارشت اش نه بیت.

واجه ءَ ٹکاٹک گوشت: جوانێں سیاستاں گرانی ءُ تورم ءَ کمَ کن انت ءُ زر ءِ ارزش برگرد ایت. زلورت انت که ڈنی سیاستاں تعدیل کن اێں ءُ گۆں نرمی ماں ترانکاریاں شه دوارگێں جنگ ءَ که اے رۆچاں باز شه آیی هبر بیت، دیمداری بیت.

🔹هردو پاٹی په نرمی گپءُتران کن انت، پچےکه جنگ په دوئێناں تاوان دار ایت

مولانا عبدالحمید گوشت: هر پاٹی ئے که جنگ ءِ گپ ءَ جنت اے چیز گرانی ءِ سوبَ بیت. دوئێناں بائد شه جنگ ءَ پهرێز کن انت، پچےکه جنگ تهنا په ایران ءَ تاوان نه دار ایت، بلکه په اسرائیل ءُ امریکا ءُ آدگراں ماں ڈیه ءَ‌ هم تاوان دار ایت. ، پمێشا دوئێں پاٹی په نرمی گپءُتران کن انت که اے چیز آوانی ءُ مچێن ڈیه ءِ سۆب ءَ انت.

واجه ءَ گێش کرت: بائد انت شه پێسر ءِ ترۆندێں اۆگام ءُ دیدانکاں که دشمنانی شۆرێنگ ءِ سوبَ بوت انت، پهرێز بیت. برے شه لهتے که لس مردم هم نه انت، بلکه ماں پارلمان یا نظامی ءُ سیاسی جاگهاں هوار انت، شۆرێنۆکێں هبر اشکنگَ بیت که ملک ءُ استمان ءِ چٹی ءُ ضرر ءَ انت.

زاهدان ءِ آدێنگ ءِ امام ءَ ته ءِ سیاستانی باره ءَ کڈن کرت: ته ءِ سیاستاں هم بائد تعدیل به انت. بائد مردمانی گپان گۆشدارگ به انت ءُ ایران ءِ نندۆکانی جوانێں شرگداریاں سگ ات ءُ مردماں دزگر ءُ بندیگ مه کن ات.

🔹دینی وانگجاه ءُ مذهبی بنجاهاں شه سرکاری زراں کارمرز مه کن انت؛ گۆں الله ءِ برۆسه ءُ مردمانی کمکاں جدءُجهد کن انت

مولانا عبدالحمید گۆں اشاره به دینی وانگجاه ءُ مذهبی بنجاهانی نۆکێں سال ءِ بودجه ءَ گوشت: قرار انت دینی وانگجاه ءُ مذهبی بنجاهاں نۆکێں سال ءَ ٹوهێں بودجهے دیگ به انت. مئے سۆگه همێش انت که دینی وانگجاه ءُ مذهبی بنجاهاں وتی وت‌واجهی ءَ سات انت ءُ شه سرکاری زراں کارمرز مه کن انت، بلکه گۆں الله ءِ برۆسه ءَ ءُ مردمانی کمک ءَ جدءُجهد کن انت ءُ وتی مردمی بوتن ءَ شه دست مه دےانت.

واجه ءَ گێش کرت: پاگواجه، مسیت ءُ دینی وانگجاهاں راجدپتر ءِ دراجی ءَ مردمانی کر ءَ ءُ مردم هم آوانی کر ءَ بوتگ انت. مسیتاں ءُ دینی وانگجاهاں مردمانی کمکانی کساس ءَ کار کن انت، همے کمێں کار که گۆں مردمانی کمکاں بیت گهتر انت شه بازێں کاراں که گۆں سرکار ءِ کمکاں بیت.

زاهدان ءِ آدێنگ ءِ امام ءَ درائێنت: الحمدلله مئے رهبند ءُ بازێنے شه دگه دینی وانگجاهاں همے بوتگ که هچبر شه سرکاری زراں کارمرز مه کن اێں ءُ ماں آیۆک ءَ هم ما را چشێں مولءُمرادے نێست. مئے باور همێش انت که مردمانی کمکانی ته ءَ برکت هست ءُ دێمروی ءِ سوبَ به انت.

🔹مولانا دین‌محمد «درویشێں عالم» ءُ «خیرخواهێں مردمے»ات؛ آئی بێرانی په ڈیه ءَ مزنێں تاوانے

مولانا عبدالحمید ماں دگه بهرے شه وتی هبراں گۆں اشاره به مولانا دین‌محمد درّکانی ءِ بێرانی ءَ گوشت: مولانا دین‌محمد رحمه‌الله ءِ بێرانی سک مزن ءُ گرانێں تاوانے ات. آ واجه درویشێں عالم، ندکار ءُ پۆلکار ءُ خیرخواهێں مردمےات. مولانا دین‌محمد رحمه‌الله ماں علم ءُ عمل ءَ په ڈیه ءِ مردماں ٹوهێں مڈی ئے ات. الله پاک اے تاوان ءَ په ڈیه ءِ مردماں جبران کنت.