هچ امێتے په درکپگ شه مالزانشتی ءُ سیاسی بن‌بستاں گندگ نه بیت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (14 آذر 1404/5 دسمبر 2025) درائێنت: کارمستراں بائد ماں سیاستاں بدلی بیار انت تاں مالزانشتی ءُ ملکاری مشکلاں جۆڑ به انت ءُ مردماں تره انت.

🔹آوان که مردمانی میانجین ءَ انت، زان انت که مردم چۆنێں مشکلانی آماچ انت

په سنی‌آنلاین ءِ سرهال ءَ مولانا عبدالحمید درشان کرت: ایران ءِ استمان گۆں وڑوڑێں سکیاں آماچ انت. رۆچ په رۆچ زندگی ءِ مشکلاں گێش به انت ءُ کارزانتانی دیدانکانی رد ءَ هچ امێتے په درکپگ شه اے مالزانشتی ءُ ملکاری مشکلاں نێست.

واجه ءَ گێش کرت: شه یک نێمگ ءَ ڈکال ءُ بےهوری ءُ شه دگه نێمگ ءَ گرانی ءُ زر ءِ بےارزشتی ءَ مردمانی زندگی ءَ سک کرتگ. آوان که مردمانی میانجین ءَ انت زان انت که مردم چۆنێں مشکلانی آماچ انت. هررۆچ دلار ءِ ارزشت برزَ رۆت ءُ تومن ناچل بیت.

🔹راجی مڈیاں بائد سرکار ءِ خزانگ ءَ اێر کنگ به انت

واجه ءَ گوشت: جمهوری کماش ءَ ماں یک گشتانکے گوشتگ که اے گرانیانی میاریگ کارمستر انت ءُ زر ءِ بےارزشتی ءِ میاریگ بانک انت که بےدمّێں زر چاپ کن انت. وهدے که جمهوری کماش اے بن‌گپ ءَ منّ ایت گڑا بائد په جوانی کارمستری بیت ءُ پهکێں درامد ءُ مڈیاں  که راجی انت، سرکار ءِ خزانگ ءَ که چوناهیا استمان ءِ خزانتگ انت، اێر کنگ به انت.

زاهدان ءِ آدێنگ ءِ امام ءَ گوشت: وهدےکه مچێن اداره ءُ ٹوهێں کارمستراں په وت کارءُبارَ کن انت، معلوم انت که مردمانی سۆباں پراوانی سۆباں ندر کنگ به انت ءُ مردم گۆں سکیاں آماچ به انت.

🔹بائد گۆں دیدانک‌واهنداں شۆر ءُ مردمانی دیدانک هم جست کنگ بیت

مولانا عبدالحمید سیاستانی ٹگلێنگ ءِ بابت ءَ کڈن کرت ءُ گوشتء: بائد انت سیاستاں ٹگلێن ات ءُ تعدیل کن ات. اگاں سیاستاں تعدیل به انت گڑا مردمانی مالزانشت ءُ گزران هم جۆڑ بیت. بائد انت سیاستاں وڑے ردءُبند به انت که راجی سۆباں پهازگ ءُ مردماں تره انت.

واجه ءَ ٹکاٹک گوشت: بائد انت گۆں دیدانک‌واهنداں شۆر ءُ مردمانی دیدانک هم جست کنگ بیت. مردماں رد کن انت، بلێں چاگرد ءُ استماں تاں وسے رد نه کنت، پمێشا دین اسلام ءَ مدام په شۆر ءُ دیدانکانی جست کنگ ءَ سۆگه کرتگ.