بلوچستان ابید شه بلوچاں په دگراں گْوَن ءِ ٹکے

ماں راجدپتر ءِ دراجی ءَ حکومت ءُ سرکاراں په بلوچ ءِ نام ءَ ءُ بلوچستان ءِ دێمروی ءِ نیمون ءَ کارجاه جۆڑ کرتگ ءُ زر ءُ مال دێم اش داتگ، بلے بلوچانی جند شه وتی ڈیه ءِ مڈیاں زبهر بوتگ انت ءُ اے سرڈگار ءِ سۆباں دگرانی کیتۆ ءَ شتگ انت.

اسلام کاظمیه که 1351 ءِ سال ءَ بلوچستان ءَ آتگ، ماں بمپور ءَ گۆں یک کارگس ءِ کارمسترے گپءُترانء کرتگ. آیی آ کارمستر ءَ گْوش ایت:

«پٹءُپۆلانی آسر ءَ بانک صادرت ءَ پنچ سال پێسر ءَ گوهرکوہ ءَ یک کشار ءُ باگے جوڑ کرتگ ات که آیرا جوانێں ءُ پرسۆبێں آسرے بوتگ. من ءُ تو شر زان اێں که هرجا سۆبے بیت درامداں همۆد ءَ ساڑی انت. بلوچستان ءِ کشت ءُ کشار ءِ نێمگ ءَ دلگوش کنگ، بزاں آ په بلوچستان ءِ آبادی ءَ گرانێں سالیگێں زرءُمالے مالوم کن انت. پد ءَ لهتے پجارێں تهرانی، کشاورزی آسراتی ءُ واماں کارمرز کن انت. زراں زور اَنت، چات جوڑ کن اَنت، شُمے وڑ ءَ نۆک نۆکێں کشت ءُ کشاری مشیناں کار انت، کشت ءُ کشاری مهندس/انجینئراں کار انت، کشت ءُ کشاری پوریاگراں شه بیرجند، قاینات، یزد ءُ کرمان ءَ کار اَنت، ماں کشت ءُ کشاری زمیناں مردمانی بدل ءَ مشینانَ کارمرد کن انت ءُ بلوچ ءَ شه آیی پسءُپیروکی کاهچر ءُ ڈگاراں در کن انت.»

اے پێشامد بس یک گونڈێں درورے شه اے ڈیه ءِ جاور ءَ، نون هم اگاں بلوچستان ءَ بچارئے اے گل زمین ءِ مڈیاں دگرانی کیتۆ ءَ رو انت ءُ بلوچ وت شه وتی سرڈگار ءِ مڈیاں بےبهر انت.